Матай 21:1—46
-
Иерусалимдеги эл Исаны салтанат менен тосуп алат (1—11)
-
Иса ибадатканадан соода-сатык жүргүзгөндөрдү кууп чыгат (12—17)
-
Анжир дарагы куурап калат (18—22)
-
Исанын бийлиги талашка салынат (23—27)
-
Эки уул жөнүндөгү мисал (28—32)
-
Зулум багбандар жөнүндөгү мисал (33—46)
-
Бурчка коюла турган негизги ташты жаратпай коюшат (42)
-
21 Иерусалимге жакындап, Зайтун тоосундагы Бетфагияга келишкенде, Иса эки шакиртин жөнөтүп:+
2 «Тээтиги көрүнүп турган айылга баргыла. Ал жерге жетериңер менен байланып турган эшек менен кодигин* көрөсүңөр. Аларды чечип алып, мага алып келгиле.
3 Эгерде бирөө бирдеме десе, ага: „Булар Мырзабызга керек“,— деп айткыла. Ошондо ал дароо берет»,— деди.
4 Бул бир пайгамбар аркылуу айтылган төмөнкү сөздөр аткарылышы үчүн болду:
5 «Сион кызына*: „Мына, сага мүнөзү жумшак+ Падышаң келатат,+ ал эшек минип келатат, жүк ташыган эшектин кодигин минип келатат“,+— деп айткыла».
6 Шакирттер барып, Иса айткандай кылышты.+
7 Алар эшек менен кодигин алып келип, үстүлөрүнө сырт кийимдерин салышты. Иса кодикке минди.+
8 Элдин көбү жолго сырт кийимдерин төшөсө,+ башкалары дарактардын бутактарын кесип алып, төшөп жатышты.
9 Исанын алды-артында келаткан калың эл: «Оо, Кудай, суранабыз, Дөөтүнүн Уулун сактай көр!+ Жахабанын атынан келатканга анын батасы тийсин!+ Асмандагы Кудай, суранабыз, муну сактай көр!» — деп кыйкырып жатты.+
10 Иса Иерусалимге киргенде, бүт шаар толкуп, баары: «Бул ким?» — деп сурап жатты.
11 Исанын жанындагы эл болсо: «Бул — Галилеядагы Назареттен чыккан Иса пайгамбар!»+ — деп жооп берип келатты.
12 Иса ибадатканага кирип, сатуучулар менен сатып алып жаткандардын баарын кууп чыкты. Акча алмаштыргандардын үстөлдөрүн, көгүчкөн саткандардын отургучтарын көңтөрүп салды.+
13 Анан аларга: «Ыйык Жазмада: „Менин үйүм тиленүү үйү деп аталат“,+— деп жазылган. Силер болсо бул жерди каракчылардын уюгуна айландырып салдыңар»,— деди.+
14 Анан жанына келген сокурлар менен аксактарды айыктырды.
15 Жогорку дин кызматчылар менен диний мыйзамдарды окуткандар Исанын жасаган кереметтерин көргөндө жана балдардын ибадатканада: «Оо, Кудай, суранабыз, Дөөтүнүн Уулун сактай көр!»+ — деп кыйкырып жатканын укканда кыжырданып,+
16 Исага: «Булардын айткандарын угуп жатасыңбы?» — дешти. Ал: «Ооба. „Өзүңдү жаш балдар менен наристелерге даңктаттың“,+— деген сөздөрдү эч качан окуган эмес белеңер?» — деди.
17 Анан шаардан чыгып, Бетанияга барды да, ошол жерде түнөдү.+
18 Иса эртең менен эрте шаарга кайтып келатып ачка болду.+
19 Анан жол боюндагы анжир дарагын көрүп, жанына басып барды. Бирок жалбырактарынан башка эч нерсе таппагандыктан,+ ага: «Мындан ары мөмө байлабай кал»,+— деди. Анжир дарагы ошол замат куурап калды.
20 Муну көргөн шакирттери таң калып: «Анжир дарагы кантип бир заматта куурап калды?»+ — деп сурашты.
21 Иса: «Силерге айтып коёюн, эгер ишенимиңер болсо, эч шектенбесеңер, муну эле эмес, мындан да көптү кыласыңар. Атүгүл бул тоого: „Ордуңан көтөрүлүп, деңизге түш“,— десеңер, түшөт.+
22 Ошентип, Кудайдан эмнени тилебегиле, эгер ишенимиңер болсо, баарын аласыңар»,+— деди.
23 Иса ибадатканага кирип, элди окутуп жатканда, жанына жогорку дин кызматчылар менен эл аксакалдары келип: «Буларды кылганга кандай укугуң бар? Мындай укукту сага ким берди?» — деп сурашты.+
24 Иса аларга: «Мен да силерден бир нерсе сурайын. Эгер жооп берсеңер, мага буларды кылганга ким укук бергенин айтам.
25 Жаканга элди чөмүлдүргөнгө ким укук берди эле? Асмандагы Кудайбы же адамдарбы?» — деди. Ошондо алар: «Эгер: „Кудай“,— десек, ал бизге: „Анда эмне үчүн ага ишенген жоксуңар?“ — дейт.+
26 „Адамдар“,— деп айталы десек, элден коркобуз, анткени баары Жаканды пайгамбар деп эсептешет»,— деп өз ара сүйлөшө башташты.
27 Анан Исага: «Билбейбиз»,— деп жооп беришти. Ошондо ал мындай деди: «Анда мен да буларды кылганга мага ким укук бергенин айтпайм.
28 Кандай деп ойлойсуңар? Бир кишинин эки уулу болгон экен. Ал биринчисине барып: „Балам, бүгүн жүзүмзарга барып иштеп кел“,— деп айтат.
29 Баласы: „Барбайм“,— дейт, бирок кайра өкүнүп, иштегени барат.
30 Атасы экинчисине да барып, ошентип айтат. Ал баласы: „Макул, ата*, барайын“,— дейт, бирок барбай коёт.
31 Экөөнүн кимиси атасынын эркин аткарды?» Алар: «Биринчиси»,— дешти. Ошондо Иса мындай деди: «Ишенип койгула, салык жыйнагандар менен сойкулар Кудайдын Падышалыгына силерден мурун киришет.
32 Себеби Жакан силерге туура жолду* көрсөткөнү келген, бирок ага ишенбей койдуңар. Салык жыйнагандар менен сойкулар болсо ишеништи.+ Силер болсо муну көргөндөн кийин да өкүнүп, оюңарды өзгөрткөн жоксуңар, ага ишенген да жоксуңар.
33 Дагы бир мисал айтайын: бир киши жерине жүзүм отургузат да,+ жүзүмзарын айландыра тосуп коёт. Анын ичине жүзүм сыга турган жай казып, мунара салат.+ Анан жүзүмзарын багбандарга ижарага берип, өзү башка өлкөгө кетет.+
34 Түшүм жыйнай турган убак келгенде, ал өзүнө тиешелүү түшүмдү алыш үчүн кулдарын багбандарга жөнөтөт.
35 Бирок багбандар аларды кармап алып, бирин сабап, башкасын таш бараңга алып, дагы бирин өлтүрүп салышат.+
36 Ошондо жүзүмзардын ээси мурункудан да көп кулдарын жөнөтөт, бирок багбандар аларды да ошондой кылышат.+
37 Акырында ал: „Уулумду сыйлашар“ — деп, уулун жөнөтөт.
38 Аны көрүп, багбандар бири-бирине: „Бул мурасчы да!+ Жүргүлө, өлтүрүп, мурасын ээлеп алалы!“ — дешет.
39 Анан аны кармап алып, жүзүмзардын сыртына сүйрөп чыгып, өлтүрүп салышат.+
40 Кийин жүзүмзардын ээси келгенде ал багбандарды эмне кылат?»
41 Тигилер: «Ал зулумдарды өлтүрүп, жүзүмзарын түшүмүн өз убагында жыйнап бере турган башка багбандарга берет да»,— дешти.
42 Ошондо Иса аларга: «Ыйык Жазмадан: „Куруучулар жаратпай койгон таш бурчка коюла турган негизги таш болуп калды.+ Муну Жахаба кылды. Бул биз үчүн керемет“,— деген сөздөрдү эч качан окуган эмес белеңер?+
43 Ошондуктан силерге айтып коёюн, Кудайдын Падышалыгы силерден тартылып алынып, Кудайдын эркин аткарган* элдерге берилет.
44 Ким бул ташка жыгылса, соо калбайт.+ Ал эми таш кимдин үстүнө куласа, ал жанчылып калат»,— деди.+
45 Бул мисалдарды укканда жогорку дин кызматчылар менен фарисейлер Исанын алар жөнүндө айтып жатканын түшүнүштү.+
46 Алар аны кармагысы келди, бирок элден коркушту. Анткени эл Исаны пайгамбар деп эсептечү.+
Шилтемелер
^ Такайын.
^ Бул поэтикалык сөз айкашы Сион тоосунда жайгашкан Иерусалим шаарын же анын тургундарын билдириши мүмкүн.
^ Сөзмө-сөз: «мырзам».
^ Сөзмө-сөз: «адилдиктин жолун».
^ Же: «жемиш берген».
