Лука 17:1—37
17 Анан Иса шакирттерине: «Адамды күнөөгө түрткөн нерселер* болбой койбойт. Бирок андай нерселерге ким себепкер болсо, ошонун башына каран түн түшөт!
2 Эгер ал киши ушул кичинекей балдардай болгондордун бирин күнөөгө түртсө, анын мойнуна тегирмен ташын байлап, деңизге ыргытып жиберишсе, ага жакшыраак болмок.+
3 Өзүңөргө сак болгула. Кимдир бирөө* күнөө кылса, аны ашкерелегиле.+ Эгер өкүнсө, кечиргиле.+
4 Бир күндүн ичинде силерге каршы атүгүл жети жолу күнөө кылып, кайра жети жолу келип: „Өкүнүп жатам, кечирип койчу“,— десе, кечиргиле»,+— деди.
5 Ошондо Исага элчилери: «Ишенимибизди арттыра көр»,— дешти.+
6 Иса аларга мындай деди: «Эгер сары кычы данындай эле ишенимиңер бар болсо, анан бул тыт дарагына: „Тамырың менен суурулуп, деңизге көч!“ — десеңер, көчмөк.+
7 Араңардан кимиңер жер айдаган же мал кайтарган кулуңар талаадан келгенде, ага: „Кел тезирээк, дасторконго отур“,— дейсиңер?
8 Тескерисинче, ага: „Алжапкыч тагынып, мага кечки тамак даярда да, мен ичип-жегиче, кызмат кыл. Андан кийин өзүң ичип-жейсиң“,— дейсиңер да.
9 Тапшырылган иштин баарын аткарганы үчүн кожоюн кулуна ыраазычылык билдирбейт да, чынбы?
10 Силер да өзүңөргө тапшырылгандын баарын аткаргандан кийин: „Биз эч нерсеге татыбаган кулдарбыз. Аткарышыбыз керек болгон нерсени гана аткардык“,— деп айткыла».+
11 Иса Самария менен Галилеянын чектешкен жерлерин бойлой Иерусалимге баратып
12 бир айылга кирди. Аны пес оорулуу 10 киши көрдү. Бирок алар алыста турушту+.
13 Анан: «Иса, Устат, бизге кайрымдуулук кыла көр!» — деп кыйкырышты.
14 Аларды көрүп Иса: «Барып, дин кызматчыларга көрүнгүлө»,— деди.+ Тигилер ал жактан кетип, жолдо баратканда айыгып калышты.+
15 Арасынан бири өзүнүн айыкканын көргөндө үнүн бийик чыгара Кудайды алкап, Исага кайтып келди да,
16 бут алдына жүзтөмөндөп жыгылып, ыраазычылык билдирди. Ал самариялык болчу.+
17 Ошондо Иса: «10 киши айыкпады беле, калган тогузу кана?
18 Кудайды даңкташ үчүн бөтөн элден болгон ушул кишиден башка эч ким кайтып келген жокпу?» — деди.
19 Анан тиги кишиге: «Тур да, бара бер. Сени ишенимиң айыктырды»,— деп айтты.+
20 Бир күнү фарисейлер Исадан Кудайдын Падышалыгы качан келерин сурашты.+ Иса аларга: «Кудайдын Падышалыгы көзгө көрүнүп келбейт.
21 Ал жөнүндө: „Мына, ал бул жерде!“ же „Тиги жерде!“ — деп айтышпайт. Анткени Кудайдын Падышалыгы силердин араңарда»,— деп жооп берди.+
22 Анан шакирттерине мындай деди: «Адам Уулу силер менен болчу күндү көргүңөр келе турган убак келет, бирок көрбөйсүңөр.
23 Башкалар силерге: „Ал тиги жерде!“ же „Мына, бул жерде!“ — дешет. Бирок ал жакка барбагыла, аларды ээрчибегиле.+
24 Себеби адам Уулунун+ кайра келиши чагылган жарк этип, асмандын бир четинен экинчи четине чейин жаркырагандай эле айкын болот.+
25 Бирок ал адегенде көп азап чегиши, бул муун тарабынан четке кагылышы керек.+
26 Нухтун убагында кандай болсо,+ адам Уулу кайра келген убакта да ошондой болот:+
27 Нух кемеге кирген күнгө чейин,+ топон суу каптап, баарын жок кылганга чейин,+ адамдар ичип-жешкен, аял алышкан, күйөөгө тийишкен.
28 Лоттун күндөрүндө да ошондой болгон:+ адамдар ичип-жешкен, соода-сатык кылышкан, жер иштетишкен, үйлөрдү салышкан.
29 Бирок Лот Содомдон чыккан күнү асмандан от менен күкүрт жаап, баарын жок кылган.+
30 Адам Уулу кайра келген убакта да ошондой болот.+
31 Ошол күнү ким үйдүн үстүндө болсо, буюмдарын алыш үчүн үйүнө кирбесин. Ким талаада болсо, үйүндө калган нерселерин алыш үчүн кайтып келбесин.
32 Лоттун аялы эмне болгонун эстен чыгарбагыла.+
33 Ким жанын сактагысы келсе, андан айрылат, ал эми ким жанынан айрылса, аны сактап калат*.+
34 Силерге айтып коёюн, ошол түнү бир төшөктө жаткан эки адамдын бири алынат, бири калтырылат.+
35 Жаргылчак тартып отурган эки аялдын бири алынат, бири калтырылат».
36 *——
37 Ошондо алар Исадан: «Мырзам, булар кайсы жерде болот?» — деп сурашты. Ал: «Өлүк каерде болсо, бүркүттөр* ошол жерге чогулат»,— деп жооп берди.+
Шилтемелер
^ Сөзмө-сөз: «Мүдүрүлгөнгө себептер».
^ Сөзмө-сөз: «Бир тууганың». Бул Кудайга чогуу сыйынып, бир динди туткан кишини билдирет.
^ Же: «кайра жашайт».
^ Бул аят Ыйык Китептин айрым котормолорунда бар болсо да, грек тилиндеги байыркы негизги кол жазмаларда кездешпейт. А3 тиркемесин кара.
^ Бүркүттүн кээ бир түрлөрү тарп жейт.
