Лука 1:1—80
1 Болуп өткөнүнө көзүбүз жеткен окуялар жөнүндө көптөр баяндап жаза башташты.+
2 Ал окуяларды бизге башынан бери өз көзү менен көргөн,+ Кудайдын жакшы кабарын тараткан кызматчылар да айтып беришкен.+
3 Ошон үчүн, улуу урматтуу Теопил,+ бардыгын башынан баштап кылдат изилдеп чыккандан кийин мен да сизге буларды ирети менен жазайын деп чечтим.
4 Муну Исанын шакирттери өзүңүзгө окутуп-үйрөткөн нерселердин чындык экенине ынанышыңыз үчүн жазайын дедим.+
5 Жүйүт жеринин падышасы Ироддун* күндөрүндө+ Абиянын+ тобуна* кирген Закарыя деген дин кызматчы* бар эле. Аялы Элизабет Арундун тукумунан болчу.
6 Экөө тең Жахаба* Кудайдын алдында адил адамдардан болушкан, анын бардык осуяттары менен мыйзамдарын так аткарышчу.
7 Бирок Элизабет төрөбөс болгондуктан, алардын балдары жок эле. Экөө тең карып калган болчу.
8 Бир жолу Закарыя, өзүнүн тобунун кезеги келип, Кудайдын алдында дин кызматчылык милдетин аткарып жүргөн убакта,+
9 дин кызматчылардын тартиби боюнча, ага Жахабанын ибадатканасына кирип, жыпарзат* түтөткөнгө+ кезек келди.+
10 Жыпарзат түтөтүлүп жаткан маалда, элдин баары сыртта Кудайдан тиленип турган эле.
11 Бир убакта Закарыяга жыпарзат түтөткүчтүн оң жагынан Жахабанын периштеси көрүндү.
12 Аны көргөндө Закарыя апкаарып, аябай коркуп кетти.
13 Ошондо периште ага: «Коркпо, Закарыя, Кудай сенин жалынычыңды укту. Аялың Элизабет уул төрөп берет, атын Жакан коёсуң.+
14 Сен кубанычка, шаттыкка бөлөнөсүң. Анын төрөлгөнүнө көптөр сүйүнөт,+
15 анткени ал Жахабанын көз алдында улуу адам болот.+ Бирок балаң шарап же башка ичимдик ичпеши керек.+ Ал энесинин курсагында жатканда эле Кудайдын ыйык рухуна* толот,+
16 ысрайылдыктардын көптөрүнө кайрадан Жахаба Кудайына баш ийгенге жардам берет.+
17 Кудай уулуңду өзүнөн мурун Илиястыкындай рух менен, күч менен жиберет.+ Уулуң аталардын жүрөгүн балдардыкындай кылат*,+ баш ийбегендерге адил адамдардай болуп акылмандык менен иш кылганга жардам берет. Элди ошентип Жахаба үчүн даярдайт»,— деди.+
18 Ошондо Закарыя периштеге: «Кантип эле ушундай болсун? Мен карып калдым, аялымдын да жашы өтүп калды»,— деди.
19 Периште: «Мен Кудайдын алдында турган+ Жебирейилмин.+ Мен сени менен сүйлөшүп, ушул жакшы кабарды айтыш үчүн жиберилдим.
20 Бирок сен белгиленген убакта орундала турган сөздөрүмө ишенбей койдуң. Ошон үчүн тилден калып, бул сөздөр аткарыла турган күнгө чейин сүйлөбөй каласың»,— деди.
21 Ал ортодо эл Закарыяны күтүп жатты. Алар анын ибадатканада ушунча көпкө кармалганына таң калып жатышты.
22 Закарыя сыртка чыкканда элге сүйлөй албай койду. Ошондо алар анын ибадатканадан табияттан тыш бир нерсе* көргөнүн түшүнүштү. Тилден калгандыктан Закарыя эмне болгонун жаңсап түшүндүрүп жатты.
23 Анан ыйык кызмат кылган күндөрү аяктаганда, үйүнө кетти.
24 Бир нече күндөн кийин аялы Элизабеттин боюна бүтүп, беш ай бою үйүнөн чыккан жок.
25 Ал: «Мына, Жахаба мага ушундай жакшылык кылды. Мага назарын салып, элдин шылдыңынан арылтты»,— деди.+
26 Анын кош бойлуу болгонуна алты ай болуп калганда, Кудай Жебирейил+ периштени Галилеядагы Назарет шаарына,
27 Дөөтүнүн тукумунан чыккан Жусуп менен баш кошконго убадалашып койгон кызга+ жөнөттү. Анын аты Мариям эле.+
28 Жебирейил ага келип: «Кандайсың, Жахабанын көңүлүнө жаккан, ал батасын берген кыз?!» — деди.
29 Муну угуп, катуу толкунданган Мариям анын эмне үчүн ушинтип учурашканын түшүнгөнгө аракет кылып жатты.
30 Ошондо периште: «Коркпо, Мариям. Сен Кудайдын көңүлүнө жаккан кызсың.
31 Боюңа бүтүп, уул төрөйсүң,+ атын Иса* коёсуң.+
32 Ал улуу адам болот,+ Эң Жогорку Кудайдын Уулу деп аталат.+ Жахаба Кудай ага атасы Дөөтүнүн тактысын берет.+
33 Ал Жакыптын урпактарына түбөлүккө Падыша болот, анын Падышалыгынын акыры болбойт»,— деди.+
34 Мариям периштеден: «Эркек көрө элек болсом, бул кандайча болот?» — деп сурады.+
35 Буга периште: «Сага Кудайдын ыйык руху түшөт.+ Сени Эң Жогорку Кудайдын күчү каптап турат. Ошондуктан төрөлө турган бала Кудайдын Уулу,+ ыйык деп аталат.+
36 Мына, төрөбөс деп айтышкан тууганың Элизабеттин да улгайганда боюна бүтүп, курсагындагы уулуна алты ай болуп калды.
37 Анткени Кудайдын бир да сөзү аткарылбай калбайт*»,— деди.+
38 Мариям ага: «Мен Жахабанын кулумун! Мен жөнүндө айткандарыңдын баары аткарылсын»,— деди. Ошондо периште анын жанынан кетти.
39 Ошондон көп өтпөй эле Мариям камданып, шашылыш түрдө Жүйүт жеринин тоолуу аймагындагы шаарга жөнөдү.
40 Ал Закарыянын үйүнө кирип, Элизабет менен учурашты.
41 Элизабет Мариямдын учурашканын укканда, курсагындагы баласы туйлап жиберди. Ошондо Элизабет Кудайдын ыйык рухуна толуп,
42 үнүн бийик чыгара: «Аялдардын ичинен сен баталуусуң, курсагыңдагы балаң да баталуу!
43 Мырзамдын энеси мага келгидей, мен ким болуп калыптырмын?
44 Сенин саламыңды укканымда, курсагымдагы балам кубанганынан туйлап жиберди.
45 Сен өзүңө айтылган сөздөргө ишенгениң үчүн бактылуусуң, анткени Жахабанын сага айткандары толугу менен аткарылат»,— деди.
46 Мариям: «Мен Жахабаны даңазалайм.+
47 Куткаруучу Кудайымдын мен үчүн кылгандарын ойлогондо жан дүйнөм шаттанат,+
48 себеби ал карапайым кулуна назарын салды.+ Эми мындан ары бардык муундар мени бактылуу дешет,+
49 анткени Кудуреттүү Кудай мен үчүн улуу иштерди жасады. Анын ысмы ыйык.+
50 Ал андан корккондорго муундан муунга кайрымдуулук кылат.+
51 Ал өз колу менен кереметтерди жасады, текеберлерди чачыратып жиберди.+
52 Бийлиги барларды тактыларынан түшүрүп,+ карапайымдарды жогору көтөрдү.+
53 Ачка жүргөндөргө ырыскысын мол берди,+ байларды болсо куру кол кетирди.
54 Кызматчыларына, ысрайылдыктарга, жардамга келди, ошентип убадасын унутпаганын көрсөттү.+
55 Себеби ата-бабаларыбызга, Ыбрайым менен анын тукумдарына, түбөлүккө кайрымдуулук кыларын убадалаган болчу»,— деди.+
56 Ошентип, Мариям Элизабеттин жанында үч айдай жүргөндөн кийин үйүнө кайтты.
57 Ай-күнүнө жетип, Элизабет уул төрөдү.
58 Коңшулары менен туугандары Жахабанын ага кандай чоң жакшылык кылганын* угуп, кубанычын тең бөлүшүштү.+
59 Сегизинчи күнү болсо баланы сүннөткө отургузуш үчүн келишти да,+ ага атасы Закарыянын атын коймокчу болушту.
60 Бирок баланын энеси: «Жок, атын Жакан коёбуз»,— деди.
61 Ошондо алар: «Туугандарыңдын арасында мындай аты бар эч ким жок го»,— дешти.
62 Анан атасынан ага кандай ат койгусу келерин жаңсап сурашты.
63 Ал тактайча сурап, ага: «Аты Жакан болот»,— деп жазды.+ Буга баары таң калды.
64 Ошол замат Закарыяга тил бүтүп,+ Кудайды алкап-даңктай баштады.
65 Алардын тегерегинде жашагандардын баарын коркунуч басты. Бул окуя жөнүндө Жүйүт жеринин бүт тоолуу аймагында сөз жүрүп жатты.
66 Уккандардын бардыгы: «Бул бала ким болор экен?» — деп ойлонуп жатты. Анткени Жахабанын аны колдогону айкын көрүнүп турду.
67 Ошондо атасы Закарыя Кудайдын ыйык рухуна толуп, пайгамбарлык кылып мындай деди:
68 «Ысрайылдын Кудайы Жахаба даңкталсын!+ Себеби ал өз элин куткарып калыш үчүн назарын салды.+
69 Өзүнүн кызматчысы Дөөтүнүн тукумунан+ бизге күчтүү куткаруучу* берди.+
70 Муну ал байыркы убактан бери ыйык пайгамбарлары аркылуу айтып келген.+
71 Ал бизди душмандарыбыздан, жек көргөндөрдүн баарынан куткарарын убада кылган.+
72 Ата-бабаларыбызга убада кылгандай, элине кайрымдуу болуп, өзүнүн ыйык келишимин эстейт.+
73 Ал муну ата-бабабыз Ыбрайымга убада кылып, ант берген.+
74 Душмандарыбыздын колунан куткаргандан кийин бизге ага тайманбай ыйык кызмат кылуу сыймыгын ыйгарарын,
75 өмүр бою анын алдында адил болуп, ага берилип кызмат кылуу сыймыгын ыйгарарын убада кылган.
76 Сен болсо, балам, Эң Жогорку Кудайдын пайгамбары деп аталасың, анткени Жахаба сени өзүнөн мурун жиберет, сен ага жол даярдайсың.+
77 Кудайдын элине анын чексиз боорукердигинен улам күнөөлөрү кечирилип, куткарылганга жол ачыларын жар саласың.+
78 Ушул боорукердиктин аркасында бизге жогорудан таң жарыгы тийип,
79 караңгылыкта, өлүм көлөкөсүндө отургандарга жарык чачат,+ бутубузду тынчтык жолуна багыттайт».
80 Бала болсо чоңоюп, Кудайдын рухунун таасири менен жетилип,* калыптана берди. Ысрайыл элине барып кабар айтканга чейин ал чөлдө жашады.
Шилтемелер
^ Дин кызматчылар тобу.
^ Б. а. ыйык күчүнө.
^ Сөзмө-сөз: «аталарынын жүрөгүн балдарына бурат».
^ Же: «аян».
^ Еврейче Жешуа. Мааниси: «Жахаба — куткаруучу».
^ Же: «Кудай үчүн мүмкүн эмес эч нерсе жок».
^ Же: «кайрымдуулук кылганын».
^ Же: «Бала болсо чоңоюп, акыл-эс жагынан жетилип».
