Корунттуктарга 2-кат 6:1—18
6 Кудайдын кызматташтары+ катары силерден анын силерге эмне үчүн ырайым кылганын көз жаздымында калтырбашыңарды да суранабыз.+
2 Анткени ал: «Мен сени ырайым кылганга ылайыктуу убакта уктум, куткара турган күнү жардам бердим»,— дейт.+ Мына, азыр өзгөчө ылайыктуу убак! Мына, азыр Кудай бизди куткара турган күн!
3 Кызматыбыз кынтыксыз болушу үчүн, башкалардын иренжип калышына* эч бир жагынан себепкер болбойбуз.+
4 Кайра, Кудайдын кызматчылары экенибизди бардык жагынан көрсөтөбүз.+ Муну ар кандай сыноолорго туш болгондо, башыбызга мүшкүл түшкөндө, муктаж болгондо, кыйынчылыктарга кабылганда,+
5 таяк жегенде, түрмөгө түшкөндө,+ жаалданган сүрмө топко кабылганда, оор эмгектенгенде, уйкусуз түндөрдү өткөргөндө, тамак-ашсыз калганда туруктуу болуп көрсөтөбүз.+
6 Ошондой эле таза жашап, алган билимибизге жараша иш кылып, чыдамкай,+ боорукер болуп,+ Кудайдын ыйык рухуна жетектелип, башкаларды эки жүздүүлөнбөй, чын жүрөктөн сүйүп,+
7 чындыкты айтып, Кудайдын күчүнө таянып көрсөтөбүз.+ Кудайдын кызматчылары экенибизди туура иштерди кылганга жардам берген каймана куралдарды*+ оң колубуз менен сол колубузга* алганда да,
8 даңкталганда да, кордолгондо да, жамандалганда да, макталганда да көрсөтөбүз. Башкалар бизди калпычы десе да, биз чынчылбыз,
9 таанымал эмес деп эсептешсе да, Кудайга таанымалбыз, бизди өлөт* деп ойлошсо да, тирүү жүрөбүз,+ жазаланып* жаткандай көрүшсө да, өлүмгө кыйылган жокпуз,+
10 кайгылуу көрүнсөк да, дайыма кубанып жүрөбүз, жарды дешсе да, көптөрдү байытып жатабыз, эч нерсеси жок дешсе да, бизде баары бар.+
11 Корунттуктар, биз силерге ачык айтып, ак сүйлөдүк, баарыңарга жүрөгүбүздөн орун бердик*.
12 Силерден сүйүүбүздү эч аяган жокпуз,+ силер болсо аяп жатасыңар.
13 Силерди балдарымдай көрүп айтып жатам: биз силерге кандай мамиле кылсак, силер да бизге ошондой мамиле кылып, жүрөгүңөрдөн орун бергиле.+
14 Машаяктын жолдоочусу болбогондор менен бир моюнтурукту кийбегиле*.+ Себеби адилдик менен мыйзамсыздыктын ортосунда кандай жалпылык бар?+ Же жарык менен караңгылыктын ортосунда кандай жалпылык бар?+
15 Ошондой эле Машаяк менен Шайтандын* ортосунда кандай биримдик бар?+ Же Машаякка ишенген киши* менен ишенбеген кишинин ортосунда кандай жалпылык болмок эле?+
16 Кудайдын ибадатканасы менен буркандардын ортосунда кандай жалпылык болмок эле?+ Себеби биз тирүү Кудайдын ибадатканасыбыз.+ Бул жөнүндө Кудай: «Алардын арасында жашап,+ арасында жүрөм. Мен алардын Кудайы болом, алар менин элим болот»,— деген.+
17 Ошондой эле Жахаба: «„Ошондуктан алардын арасынан чыккыла, бөлүнгүлө. Мындан ары арам нерсеге жолобогула“,+ „ошондо мен силерди кабыл алам“»,— деген.+
18 «Кудурети Чексиз Жахаба: „Мен силерге ата болом,+ силер менин уул-кыздарым болосуңар“,+— деп да айткан».
Шилтемелер
^ Же: «мүдүрүлүп калышына».
^ Сөзмө-сөз: «адилдиктин куралдарын».
^ Же: «чабуул коюу жана коргонуу үчүн».
^ Же: «тартипке салынып».
^ Же: «өлүшү керек».
^ Же: «жүрөгүбүздү кенен ачтык».
^ Б. а. күчү жагынан тең келбеген эки малга бир моюнтурук салбагандай эле, силер да Машаяктын жолдоочусу болбогондор менен бир моюнтурук кийбегиле.
^ Же: «ишенимдүү киши».
^ Сөзмө-сөз: «Белиардын». Еврей тилиндеги бул сөз «эч нерсеге жарабаган» дегенди билдирет.
