Башталыш 8:1—22
8 Андан кийин Кудай Нухка, аны менен кемеге кирген+ жапайы айбанаттарга, үй жаныбарларына назар салып, жер бетине шамал жиберди. Ошондо суу тартыла баштады.
2 Суу туңгуюктарынын булактары менен асмандагы суу дарбазалары жабылып, нөшөрлөп төккөн жаан басылды.+
3 Жер бетиндеги суу акырындап тартыла баштады да, 150 күндөн кийин бир топ азайып калды.
4 Жетинчи айдын* он жетинчи күнү кеме Арарат тоолоруна барып токтоду.
5 Суу онунчу айга* чейин акырындап азая берди. Онунчу айдын биринчи күнү тоолордун чокулары көрүндү.+
6 Кырк күндөн кийин Нух кеменин терезесин ачып,+
7 кузгунду учурду. Жер бети кургагыча, ал учуп кетип, кайра учуп келип турду.
8 Анан Нух жер бетинен суунун тартылган-тартылбаганын билиш үчүн көгүчкөндү учурду.
9 Бирок бүт жер жүзүн дагы эле суу каптап тургандыктан,+ көгүчкөн конорго жер таппай, кайра кемеге учуп келди. Нух колун сунуп, көгүчкөндү кемеге киргизип алды.
10 Анан дагы 7 күн коё туруп, кайра учурду.
11 Көгүчкөн Нухка кечке маал кайтып келди. Ал зайтун дарагынын жаңы үзүлгөн жалбырагын тиштеп келиптир. Ошондо Нух жер бетиндеги суунун тартылып калганын билди.+
12 Ал дагы 7 күн коё туруп, көгүчкөндү кайра учурду. Бирок ал ошол бойдон кайтып келген жок.
13 Нухтун өмүр сүргөнүнө 601 жыл болгондо,+ биринчи айдын* биринчи күнү жер бетиндеги суу тартылды. Нух кеменин чатырын ачып караса, жердин бети кургай баштаптыр.
14 Экинчи айдын жыйырма жетинчи күнү жер толугу менен кургап калды.
15 Ошондо Кудай Нухка:
16 «Аялың, уулдарың, келиндериң менен кемеден чык.+
17 Тукумдап, көбөйүп, жер бетин толтурушу үчүн, өзүң менен кошо тирүү жандыктардын баарын:+ канаттууларды, үй жаныбарларын, жер бетинде жашаган башка жаныбарлардын бардыгын алып чык»,— деди.+
18 Нух уулдары,+ аялы жана келиндери менен кемеден чыкты.
19 Бардык жаныбарлар, майда жан-жаныбарлар менен канаттуулар — жер бетинде кыбыр эткендин баары түр-түрү менен кемеден чыкты.+
20 Анан Нух Жахабага арнап курмандык жайын* куруп,+ адал жаныбарлар менен канаттуулардын бардык түрүнөн+ бүтүндөй өрттөлчү курмандыктарды* чалды.+
21 Ошондо Жахаба алардын жагымдуу жытын искеди. Анан Жахаба ичинен мындай деди: «Мындан ары адам баласы үчүн жерди эч качан каргабайм,+ анткени адамдын ою, ниети жаштайынан эле бузук, жаман жакка ооп турат.+ Эми эч качан тирүү жандардын баарын жок кылбайм.+
22 Мындан ары дайыма жер бетинде себе турган, оруп-жыя турган мезгил, суук менен ысык, жай менен кыш, күн менен түн болот».+
Шилтемелер
^ Болжолу, марттын экинчи жарымы менен апрелдин биринчи жарымына дал келет. Б15 тиркемесин кара.
^ Болжолу, июндун экинчи жарымы менен июлдун биринчи жарымына дал келет. Б15 тиркемесин кара.
^ Болжолу, сентябрдын экинчи жарымы менен октябрдын биринчи жарымына дал келет. Б15 тиркемесин кара.
