Башталыш 37:1—36
37 Жакып атасы келгин болуп жашаган+ Канаан жеринде жашап калды+.
2 Жакыптын жашоосу жөнүндөгү билдирүү.
Жусуп+ атасынын аялдары Била менен Зилпанын уулдары+ менен бирге кой бакчу+. Ошол кезде ал он жети эле жашта болчу. Бир күнү ал атасына бир туугандарынын кылып жүргөн жаман иштери жөнүндө айтып койду+.
3 Ысрайыл Жусупту башка уулдарынын+ баарынан жакшы көрчү, анткени ал карыганда көргөн уулу эле. Ал Жусупка узун кооз кийим тиктирип берди+.
4 Бир туугандары атасынын аларга караганда Жусупту көбүрөөк жакшы көрөрүн көрүшкөндө аны жек көрүп+, ага жөн* сүйлөбөй калышты+.
5 Бир күнү Жусуп түш көрүп, түшүн бир туугандарына айтып берди+. Алар аны ого бетер жек көрүп калышты.
6 Жусуп аларга: «Уксаңар, мен мындай түш көрдүм+.
7 Биз талаада боо байлап жүрүптүрбүз. Бир убакта мен байлаган боо тикесинен туруп калды. Анан силердин боолоруңар менин боомду тегеректеп алып, ага жүгүнүштү»+,— деди.
8 Ошондо бир туугандары: «Эмне, бизге падыша болгуң барбы?+ Бизге бийлик кылгың барбы?»+ — деп, аны айтып берген түшү, сөздөрү үчүн ого бетер жек көрүп калышты.
9 Андан кийин Жусуп дагы бир түш көрүп, аны да бир туугандарына айтып берди. Ал: «Мен дагы бир түш көрдүм. Бул жолу түшүмдө мага күн, ай жана он бир жылдыз жүгүнүп жатыптыр»,— деди+.
10 Жусуп түшүн агаларына эле эмес, атасына да айтып берди. Ошондо атасы аны: «Эмне деген түш көргөнсүң? Кантип эле мен да, апаң да, бир туугандарың да сага жерге чейин ийилип таазим кылалы?» — деп кагып койду+.
11 Жусуптун айткандарын укканда бир туугандарынын ичи тарый баштады+, атасы болсо анын сөздөрүн көкүрөгүнө түйүп алды+.
12 Бир күнү Жусуптун бир туугандары атасынын койлорун Шекемдин жанына+ жайганы кетишти.
13 Бир канча убакыттан кийин Ысрайыл Жусупка: «Сени Шекемдин жанында мал жайып жүргөн агаларыңа жиберейин, барып келбейсиңби»,— деди. Жусуп: «Мейли, барып келейин»,— деди+.
14 Ысрайыл ага: «Барып, агаларың аман-эсен жүрөбү, малы түгөлбү, көрүп кел»,— деди+. Ошентип, аны Хеброн өрөөнүнөн+ Шекемге жөнөттү.
15 Кийинчерээк бир киши Жусуптун талаада жүргөнүн көрүп, андан: «Эмне издеп жүрөсүң?» — деп сурады.
16 Ал: «Агаларымды издеп жүрөм. Алардын каякта мал жайып жүргөнүн билбейсизби?» — деди.
17 Тиги киши: «Алар бул жерден кетип калышкан. Мен алардын: „Дотанга баралы“,— деп жатышканын уккам»,— деди. Жусуп агаларынын артынан барып, аларды Дотандан тапты.
18 Агалары Жусупту алыстан эле көрүп, ал жакындай электе, аны өлтүрөбүз деп сүйлөшө башташты+.
19 Алар бири-бирине: «Карасаңар, түш көргүч келатат+.
20 Келгиле, аны өлтүрүп, суу сакталчу чуңкурга таштап салалы да+, жырткыч жеп кетти деп коёлу+. Ошондо түштөрү кантип аткарыларын көрөбүз»,— дешти.
21 Бул сөздөрдү укканда Рубейин Жусупту алардын колунан куткарып калганга аракет кылып+: «Анын жанын кыйбай эле коёлу»,— деди+.
22 Анан аларга: «Кан төкпөгүлө+. Андан көрө, аны бул жердеги, талаадагы, суу сакталчу чуңкурга таштап салгыла. Ага тийбегиле»,— деди+. Ал Жусупту алардын колунан бошотуп алып, кайра атасына жибергиси келгендиктен ошентти.
23 Жусуп жакын келери менен, агалары анын үстүндөгү кооз кийимин сыйрып алып+,
24 өзүн чуңкурга таштап салышты+. Чуңкур бош эле, суусу жок болчу.
25 Анан тамактанганы отурушту+. Бир убакта Гилат жактан келаткан Ысмайылдын тукумдарынын+ кербенин көрүштү. Алар төөлөрүнө ладан, бальзам*, чайыры бар кабыктарды жүктөп алып+, Мисирге жол тартып баратышкан эле.
26 Ошондо Жүйүт бир туугандарына: «Бир тууганыбызды өлтүрүп, аны жашырып койгондон эмне пайда?+
27 Ага зыян кылгандан көрө+, Ысмайылдын тукумдарына сатып жибербейлиби+. Кантсе да, бир тууганыбыз, бир боорубуз* эмеспи»,— деди. Тигилер Жүйүттүн айтканына макул болушту+.
28 Ошол учурда Мидиандын тукумдарынан чыккан соодагерлер+ алардын жанынан өтүп баратышкан эле. Агалары Жусупту чуңкурдан алып чыгып+, Ысмайылдын тукумдарына жыйырма күмүш тыйынга сатып жиберишти+. Алар болсо Жусупту Мисирге алып кетишти.
29 Кийинчерээк Рубейин суу сакталчу чуңкурга барып, Жусуптун ал жерде жок экенин көргөндө, кийимин айрып жиберди+.
30 Анан бир туугандарынын жанына келип: «Бала жок экен, эми эмне кылам?» — деп кыйкырды+.
31 Алар бир текени союп, Жусуптун кийимин анын канына малып+,
32 атасына берип жиберишти да: «Биз муну таап алдык. Карап көрсөңүз+, уулуңуздун кийими эмеспи?» — деп айттырып жиберишти+.
33 Жакып анын кийимин таанып: «Бул — уулумдун кийими. Жусупту жырткыч жара тартып, жеп кеткен турбайбы»,— деп катуу боздоду+.
34 Анан үстүндөгү кийимин айрып, белине таар* курчанып, уулун жоктоп көп күн ыйлады+.
35 Уул-кыздарынын баары аны соороткону келип жатышты+. Бирок ал сооронбой+: «Кайгырып жүрүп уулума, көргө* барам» — деп, уулун жоктоп ыйлай берди.
36 Мисирден Мидиандын тукумдары Жусупту жан сакчылардын башчысына+, фараондун ак сарайында кызмат кылган Потипарга, сатып жиберишти+.
Шилтемелер
^ Сөзмө-сөз: «тынчтыкта».
^ 1 896-беттеги «Сөздүктү» кара.
^ Сөзмө-сөз: «денебиз».
^ Салт боюнча, аны кайгырганда, күйүт тартканда ж. б. у. с. учурларда кийишчү же колдонушчу.
^ Евр. шеол. Кара: 8-тирк.
