Tala mambu

Tala ntu mia mambu

Mbangi za Yave

Sola ndinga Kikongo

Yangalela e Nluta mia Kayila Akaka

Yangalela e Nluta mia Kayila Akaka

“E KALU dienda kwandi, kansi o toko dia mwisi China kafwete sala!” I diau Alexandra kawá ekolo kakala wavuanda muna kalu yo vingila bavioka vana mwingilu wa América do Sul yo kwenda ku nsi yankaka. Alexandra wakulumuka muna kalu kimana kazaya e diambu diabwa yo monana yo toko dia China ona katoma vovanga Espanhol ko ekolo kamokenanga yo soladi. Wau vo Alexandra walongoka e chinês muna nkuntakani a Mbangi za Yave, wakivana muna sekola muna ndinga Espanhol o mambu kavovanga o toko dia china.

Toko dia china wavova vo, nkanda miandi miayilu kumosi ye nzimbu zandi. Soladi diantete kakwikila mu mvovo miandi ko, wabanza vo Alexandra mpe muivi a wantu. Kuna kwa landa wakwikila muna mvovo mia toko dia china. Kansi walombwa nzimbu wau vo kakala ye nkanda ko. O toko kakala ye nzimbu ko, Alexandra wankayila nzimbu lutila 20 ma dollar. Alexandra wavova vo kazola tambula nsendo ko, kansi wayangalela sadisa nkwandi kadi i diambu diansongi kavanga. Wakayila toko dia China e nkanda yo kunkasakesa kayantika longoka Nkand’a Nzambi ye Mbangi za Yave.

Diakiese mu wá e nsangu za wantu besonganga o zola kwa nzenza. Dia ludi vo, wantu ayingi besonganga o zola kwa nzenza kiakala awana besambilanga ye awana belembi sambilanga. Nga ozolele kuyivana muna sadisa akwaku? E kiuvu kiaki kiamfunu, e kuma kadi Yesu wavova vo: “Edi disundidi e kiese dia vana, ke mu tambula ko.” (Mavangu 20:35) Akwa ngangu bevovanga vo, o kayila akaka diambote kwa ngeye kibeni. Yambula twazaya una tulenda wo vangila.

“MVANI AMVEVO”

Muna mona e kiese ofwete kayilanga akaka. Paulu wa ntumwa wasoneka vo: “Nzambi mvani amvevo kezolanga.” Muna mvovo miami, Paulu wavovela Akristu ana bavana tukau twa mvevo mu sadisa mpangi zau bakala mu mpasi. (2 Korinto 8:4; 9:7) Paulu kayika ko vo akwa kiese bakala i dianu bakayila akaka. E sono kisongele vo bamona e kiese kadi bakayila akwau.

Lufimpu lumosi lwavangamene lwasongele vo, e fu kia kaya “kisikamesanga mianzi mia tomfo mina misadisanga muntu mu mona kiese, vanga kikundi yo bunda akaka e vuvu. Ediadi kiese kiayingi ditwasanga kwa muntu.” Lufimpu lwankaka lwasonga vo, “o kayila muntu e nzimbu, ditoma yangidikanga o wantu bena vana ndambu.”

Nga oyindulanga vo mu kuma kia usukami waku kulenda kayila akaka ko? E ludi i kiaki: wantu awonso balenda mona e kiese kia kala “mvani amvevo.” Ke dina kwandi mfunu ko vo twakaya lekwa yayingi, edi disundidi o mfunu i kaya yo ntim’amvevo. Mbangi a Yave mosi wasonekena amwangi a Eyingidilu yo kubatwikila lukau lwandi lwa mvevo. Muna nkand’andi wasoneka vo: “Se mvu miayingi miviokele kala kilendanga diaka vana lukau ko  muna Seka dia Kintinu.” Wakudikila vo: “Yave wa Nzambi okumpananga lekwa yayingi lutikila nkutu lukau lwame. . . Ntondele muna kumpana o nswa wavana lukau lwalu, dimfiaulwisi kikilu.”

Muna kaya ke divavanga kaka ko vo twakala ye nzimbu. Vena ye mpila zayingi tulenda kayila wantu.

E FU KIA KAYA MAVIMPI KITWASANGA MUNA NITU

O kaya kiese ditwasanga kwa ngeye ye kwa akaka

Muna Nkand’a Nzambi tutanganga vo: “O nkwa nkenda, wandi moyo kevanga wete; o munkondwa nkenda, eyandi nitu i ketokanisa.” (Ngana 11:17) Nkwa nkenda okayanga kuna mvevo, osadilanga e ntangw’andi ye ngolo zandi muna wete dia wantu akaka. O nkanikinu wau nluta miayingi utwasanga, ke mavimpi kaka ko muna nitu.

Ziku yayingi isonganga vo awana besadisanga akwau ke betoma bwanganga ntu ko yovo ndunzi zankaka, ke betokana mpe kwayingi ko. Edi disundidi o mfunu mavimpi mambote bekalanga wau. E fu kia kaya kuna mvevo kitomesanga mavimpi ma wantu beyelanga yivembo ilembi sasukanga, nze SIDA. Nduvu zayingi za malavu bayambula e nkolwa, bekuyivananga muna sadisa nduvu zankaka bavanga diau dimosi, ke bekuyibanzanga ko wau bayambula e nkolwa ye diampasi dikalanga kwa yau mu vutukila e nkolwa.

Ekuma divangamenanga? E kuma kadi wantu bevovanga vo “avo muntu nkwa nkenda, nkwa walakazi yo wete, ke kalanga ye ngindu zambi ko.” E fu kia kaya kilenda mpe vuvika e ngindu za muntu yo kulula e tenção kele vo ya manta ina. O wantu ana bafwila mayakala yovo akento besundanga e ntantu zau mu nzaki kele vo bena ye fu kia kayila akaka.

Kieleka, e fu kia kaya mavimpi ma wantu kitomesanga.

E FU KIA KAYA SAMBUKILA KISAMBUKILANGA

Yesu wakasakesa alongoki andi vo: “Nukayanga, ozevo nukayilwa. Nuvaninwa muna mfokola zeno e nzongo ambote, waniemenenwa, wabandilwa, yo siwa mabetomona. Kadi muna nzongo una nuzongela i nuzongelwa mpe.” (Luka 6:38) Avo una ye fu kia kaya, o wantu mpe bekukayila kuna mvevo yo tanginina e fu kiaku. E fu kia kaya kisadisanga mu kala ye ngwizani ambote yo wantu yo vanga yau kikundi.

O kaya disiamisanga e ngwizani yo kumika kikundi

Akwa ngangu ana belongokanga mambu matadidi ngwizani vana kati kwa wantu, bayiza bakula vo “awana bekayanga ntangwa zawonso bekasakesanga akaka mu vanga diau adimosi.” O tanga kwa nkatu o lusansu lwa wantu basadisa akaka muna ntangw’ampasi dilenda fila muntu mu yantika kayila akaka.” Muna kuma kiaki, lufimpu lumosi lwasonga vo, “konso muntu osadilanga rede sociais olenda tunta e sungididi kia wantu ayingi ana ka zeye ko ngatu mona.” Muna mvovo miankaka, e vangu dimosi dia kaya dilenda zayakana kwa wantu awonso muna zunga. Nga ozolele zingila muna zunga kiaki? Kieleka, e fu kia kaya nluta miayingi kitwasanga.

Diambu dimosi diavangama muna mbanza Florida kuna  Estados Unidos disonganga e ziku kia diambu diadi. Buka kia Mbangi za Yave bakivana mu sadisa wantu vava tembwa kiangolo kiafwasa e mbanza yayi. Ekolo bavingilanga e salanganu ya salu muna vangulula e nzo imosi, bamona vo o lûmbu lwa nzo imosi vana ndambu lwafwaswa kwa tembwa, bakivana mu vangulula lo. Kuna kwalanda, mfumu a nzo yayi wasonekena Vula dia Sina dia Mbangi za Yave muna “vutula matondo mayingi.” Wakudikila vo, “mbuene vo o wantu awaya i yau basundidi o wete kuna kwa mono.” E fu kia vutula matondo kiamfila mu vana lukau lwa nzimbu muna nungununa e salu kiampwena kisalwanga kwa Mbangi za Yave.

TANGININA NDIONA OSUNDIDI MUNA KAYA

E nsatulula za akwa ngangu zisonganga vo, “vena ye wantu ayingi ova nza betokanenanga sadisa akaka.” O lufimpu lwalu lwasonga mpe vo o wan’akete “bekayanga vitila nkutu bayantika o vova.” Ekuma? Nkand’a Nzambi uvananga e mvutu vava uvovanga vo, o wantu bavangilwa “muna mpwa ya Nzambi,” disongele vo, bena ye fu yambote ya Nzambi.—Etuku 1:27.

O kaya i kimosi muna fu yawonso y’esivi ya Yave wa Nzambi, wa Mvangi eto. Nzambi watuvana moyo ye lekwa yawonso tuvuidi o mfunu muna kala ye kiese. (Mavangu 14:17; 17:26-28) Muna tanganga Nkand’a Nzambi, tulenda toma zaya o Se dieto kuna zulu ye makani mandi mu kuma kieto. Nkand’a Nzambi uvovanga mpe vo Nzambi watukubikila mawonso kuna sentu kimana twakala ye zingu kia kiese. * (1 Yoane 4:9, 10) Wau vo Yave wa Nzambi yandi wayantika kutukayila ye muna mpw’andi twavangilwa, ke dia sivi ko mu zaya vo fu kia Nzambi otanginina avo okayidi akaka, ediadi diambote kwa ngeye, dikusadisa mu vua e dienga dia Nzambi.—Ayibere 13:16.

Nga osungamene Alexandra, ona tuyikidi kuna lubantiku lwa longi diadi? O lusansu lwandi aweyi lwafokokela? Kana una vo nkwandi muna kalu wavova vo e nzimbu zandi zayiywa, o muntu ndiona kasadisa wabokela akundi andi muna mbanza ina e kalu dianingamena, e mfuka ya 20 dollars yafutwa. Vana ntandu, o muntu ndioyo wayantika longoka Nkand’a Nzambi nze una Alexandra kamvovesa. Vava kiavioka ngonde tatu, Alexandra wamonana yo muntu ndioyo muna lukutakanu lwa Mvivu lwa Mbangi za Yave, muna nding’a Chines kuna nsi ya Peru. Muna vutula matondo muna mawonso Alexandra kavanga mu kuma kiandi, muntu ndioyo wabokela Alexandra ye mpangi zandi zawonso bayenda ku lukutakanu kimana benda dila muna restaurante.

Okayila akaka yo kubasadisa kiese kiayingi ditwasanga. Edi disundidi o mfunu, muna kayila akaka olenda mpe sadisa wantu batoma zaya e Nto ya konso lukau lwambote, i sia vo, Yave wa Nzambi! (Yakobo 1:17) Nga obakanga e nluta mia kayila akaka?

^ tini. 21 Muna zaya diaka mayingi, tala muna nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave, una mpe muna nzil’eto ya internete www.jw.org. Ziula vana vasonama NKANDA > NKANDA YE YINKANDA-NKANDA.