Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | NGA OTAMBULA LUKAU LWAMPWENA LWA NZAMBI?

Lukau Lusundidi o Mfunu

Lukau Lusundidi o Mfunu

MASINI masongonwena e lapi mena vana koko kwa Jordão malenda moneka nga lekwa kia kondwa mfunu. Kansi i lekwa kisundidi o mfunu kwa Jordão. Jordão wavova vo: “Mbuta muntu Russell wa nkundi a mase mame yandi wankayila lekwa kiaki vava yakala nleke. Vava Russell kafwa, Jordão wazayiswa vo Russel mayingi kavanga muna zingu kia nkak’andi a yakala yo mase mandi. Lusadisu lwayingi kabavana muna ntangw’ampasi. Jordão wavova vo, “Wau vo mayingi nzeye mu kuma kia Russell, filukau fiafi i lekwa kisundidi o mfunu kwa mono.”

O lusansu lwa Jordão lusongele vo kuna kwa wantu ankaka o lukau lulenda kala lwa mfunu yovo lwakondwa mfunu. Ndiona ovutulanga matondo, obadikilanga lukau kaveno lwamfunu yovo lwantalu. Nkand’a Nzambi uyikilanga lukau lusundidi tukau twawonso muna mvovo emi: “Muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.”—Yoane 3:16.  

Ndiona otambwidi lukau lwalu moyo a mvu ya mvu kevua. Nga vena yo lukau lwankaka lusundidi? Ankaka ke bebakulanga o mfunu wa lukau lwalu ko, kansi Akristu akieleka bebadikilanga lo vo “lwantalu.” (Nkunga 49:8; 1 Petelo 1:18, 19) Ekuma o Nzambi kavanina o moyo wa Mwan’andi se lukau kwa wantu ova nza?

Paulu wa ntumwa wasasila e kuma kiaki muna mvovo emi: “Wauna e sumu diakotela ova nza muna muntu mosi, o lufwa mpe muna sumu, i nsayana lwasayana o lufwa kwa wantu awonso.” (Roma 5:12) Adami wa muntu antete wasumuka vava kakolamena Nzambi kuna lukanu, ediadi diantwasila e tumbu kia lufwa. Adami watwasa lufwa kwa mbongo andi yawonso, i sia vo wantu awonso ova nza.

 “O mfutu a sumu i lufwa, kansi o lukau lwa Nzambi i moyo a mvu ya mvu muna Kristu Yesu wa Mfumu eto.” (Roma 6:23) Muna vevola o wantu muna lufwa, Nzambi wafila mwan’andi Yesu Kristu ova nza muna yekola o moyo andi alunga se kimenga muna wete dia wantu awonso. E kimenga kiaki kizayakene muna nkumbu a “lukûlu,” wantu awonso bekwikila muna Yesu moyo a mvu ya mvu bevua.—Roma 3:24.

Mu kuma kia nsambu zawonso o Nzambi kakubikila asambidi andi muna lusadisu lwa Yesu Kristu, Paulu wasoneka vo: “Matondo kwa Nzambi muna lukau lwandi lulembi tangakana.” (2 Korinto 9:15) Ke tuna ye mvovo ko muna yika e kiese tumonanga mu kuma kia lukûlu. Muna tukau twawonso o Nzambi kavana kwa wantu, ekuma o lukûlu lusundidi o mfunu? Mu nkia mpila luswaswanene ye tukau twankaka? * Adieyi tulenda vanga muna songa o luyangalalu lweto muna lukûlu? Tukasakese watanga e mvutu za Nkand’a Nzambi muna malongi mole malende.

^ tini. 8 Kuna zola kwawonso Yesu “wayekola moyo andi muna wete dieto.” (1 Yoane 3:16) Wau vo, e kimenga kia Yesu Kristu i kani dia Nzambi, malongi mantete ma Eyingidilu diadi, mevovela Yave wa Nzambi ona wakubika o lukûlu.