Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | NGA NZAMBI OYANGALELANGA E VITA?

Una Nzambi Kabadikilanga e Vita Kuna Nz’ankulu

Una Nzambi Kabadikilanga e Vita Kuna Nz’ankulu

Vava Aneyisaele babangikwanga, nkumbu miayingi balombanga lusadisu lwa Nzambi mu sambu. Kansi, lusadisu ke lwayiza vana vau ko. E mbeni zababangikanga i nkangu a Ngipito. (Luvaiku 1:13, 14) Aneyisaele mvu miayingi bavingila vo Nzambi kabavevola mu mpasi zazina. I bosi, e ntangwa yafwana muna kubavevola. (Luvaiku 3:7-10) Nkand’a Nzambi uvovanga vo Nzambi yandi kibeni wanwanisa nkangu a Ngipito. Wabatwasila vuku yayingi, i bosi wavonda ntinu a Ngipito yo makesa mandi muna Mbu Ambwaki. (Nkunga 136:15) Yave wa Nzambi wasonga vo yandi ‘kesa dia vita’ ona watanina nkangu andi.—Luvaiku 15:3, 4.

Wau vo Nzambi yandi kibeni wanwanisa nkangu a Ngipito, ediadi disonganga vo ke menganga vita zawonso ko. Ezak’e ntangwa, Nzambi wavananga nswa kwa nkangu a Isaele wanwana e vita. Muna bonga e nona, Nzambi watuma nkangu a Isaele banwanisa esi Kenani kadi wantu ambi bakala. (Nsiku 9:5; 20:17, 18) Watuma mpe Davidi wa Ntinu a Isaele kanwanisa Afelesetia ana bakala vo yimpumbulu. Nzambi wanzayisa nkutu e ndekwa kafwete sadila mu sunda e vita.—2 Samuele 5:17-25.

Lusansu lwalu lusonganga vo ezak’e ntangwa Nzambi wayambulanga vo nkangu andi wanwana e vita muna kuyitanina yo tanina e nsambila avelela. Kansi, tala mambu tatu mu kuma kia vita kavanina o nswa:

  1. NZAMBI WABAKANGA E NZENGO KANA NANI OFWETE NWANA VITA. Lumbu kimosi, Nzambi wazayisa Aneyisaele vo: “Ke nuvwa mfunu a nwana ko.” Ekuma? E kuma kadi Nzambi yandi kibeni wadi nwana vana fulu kiau. (2 Tusansu 20:17; 32:7, 8) Nzambi nkumbu miayingi kavanga e diambu diadi nze una kavanga kwa esi Ngipito. Ezak’e ntangwa Nzambi wavananga nswa kwa nkangu andi banwana e vita mu tanina e Nsi a Nsilu.—Nsiku 7:1, 2; Yosua 10:40.

  2. NZAMBI WASIKIDISANGA E NTANGWA IFWETE NUANUA E VITA. Nkangu a Nzambi wavingilanga yavana Nzambi kavananga o nswa muna nwana ye mbeni zau. Diavavanga vo bavingila yavana e ntangwa  yayi yadi fwana, ke badi kuyibakila nzengo za nwana ko. Vava bakibakilanga e nzengo, ke basundanga ko. Nkand’a Nzambi usonganga vo vava Aneyisaele banwananga lembi vanwa nswa kwa Nzambi, mfwilu babakanga. *

  3. Kana una vo Nzambi wanwanisa esi Kenani, wavuluza Rakabi ye yitu yandi

    NZAMBI KEYANGALELANGA LUFWA LWA WANTU KO, KANA NKUTU LWA YIMPUMBULU. Yave wa Nzambi i nto a moyo, yandi mpe i Mvangi eto. (Nkunga 36:9) Muna kuma kiaki, kezolanga ko vo wantu bafwa. Kansi, diankenda kikilu vo vena yo wantu ambi bebangikanga yo vonda nkutu akaka. (Nkunga 37:12, 14) Ezak’e ntangwa Nzambi wavananga nswa vo yimpumbulu yavondwa muna vita kimana mavangu mambi malembi wokela. Kana una vo i wau, vava kavananga nswa kwa nkangu a Isaele banwana ye mbeni zau, Nzambi wasonganga ‘nkenda yo luzindalalu’ kwa awana babangikanga nkangu andi. (Nkunga 86:15) Muna bonga e nona, Nzambi wakanikina nkangu a Isaele vo vitila banwanisa e mbanza, bafwete boka nkoki yovo ntangu wa vanga “ungudi.” Ediadi diavananga e lau kwa mbeni za Aneyisaele mu soba e ngindu yo venga e vita. (Nsiku 20:10-13) Ediadi disonganga vo Nzambi ‘keyangalelanga lufwa lua kimpumbulu ko; kansi e kimpumbulu kaviluka muna nzil’andi kazinga.’—Yezekele 33:11, 14-16. *

Muna lufimpu lwalu, tumwene vo Nzambi wasadilanga vita muna fokola lubangamu ye mavangu mambi. Kansi, Nzambi yandi kibeni wabakanga e nzengo kana vo nkia ntangwa ifwete nwanwa e vita ye nani ofwete nwana. Nga ediadi disongele vo Nzambi wayangalelanga vita zozo? Nkatu. Nzambi omenganga nsoki. (Nkunga 11:5) Nga ngindu za Nzambi mu kuma kia vita zasoba vava o Mwan’andi Yesu Kristu kayantika e salu kia longa muna tandu kiantete?

^ tini. 7 Lumbu kimosi, Aneyisaele basundwa kwa esi Kenani wau vo Nzambi kabavana nswa ko wa nwana yau. (Ntalu 14:41-45) Vioka mvu miayingi, o Ntinu Yosiya wanwana e vita lembi vewa o nswa kwa Nzambi, muna kuma kiaki wafwa.—2 Tusansu 35:20-24.

^ tini. 8 Vava banwananga y’esi Kenani, Aneyisaele ke babokanga nkoki ko wa vanga ungudi. Ekuma? E kuma kadi Nzambi wateka vana 400 za mvu kwa esi Kenani mu soba mavangu mau mambi. Ozevo, vava Aneyisaele babanwanisa, o umpumbulu wa esi Kenani wasaka. Ke bakala yo luzolo lwa soba mavangu mau ko. (Etuku 15:13-16) Ekiaki i kuma Nzambi kabakila nzengo vo bafwaswa emvimba. Kansi, akaka muna yau ana basoba mavangu mau ke bavondwa ko.—Yosua 6:25; 9:3-27.