Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | NGA NZAMBI OYANGALELANGA E VITA?

Una Nzambi Kabadikilanga e Vita Muna Tandu Kiantete

Una Nzambi Kabadikilanga e Vita Muna Tandu Kiantete

Nze akulu au, Ayuda muna tandu kiantete babangikwa. Muna kuma kiaki, basambanga kwa Nzambi kabavevola muna ubundu wa luyalu lwa Roma. Kuna kwalanda, bawá nsangu mu kuma kia Yesu. Nga Yesu i Masia wasilwa o nsilu? Ayingi bakala ye “vuvu vo yandi kikilu okûla Isaele” muna ubundu wa luyalu lwa Roma. (Luka 24:21) Kansi, ediadi ka diavangama ko. Muna mvu wa 70 wa tandu kieto, makesa ma Roma mafwasa nkutu e mbanz’a Yerusaleme ye tempelo andi.

Adieyi diabua? Ekuma Nzambi kalembi tanina Ayuda nze una kavanga kuna nz’ankulu? Ekuma kalembi kubavanina o nswa wa nwana muna kuyivevola muna mpasi? Nga Nzambi wasoba e ngindu zandi mu kuma kia vita? Ve. Kansi, wasoba e ngindu zandi mu kuma kia Ayuda wau vo babembola Yesu wa Masia wa Mwan’a Nzambi.(Mavangu 2:36) Muna kuma kiaki, Ayuda bavidisa e ngwizani au yo Nzambi.—Matai 23:37, 38.

Ayuda ke bakala diaka yo lutaninu lwa Nzambi ko kumosi ye Nsi au ya Nsilu. Muna kuma kiaki, ke badi vova diaka ko vo Nzambi wayikamanga e vita zau. Nze una Yesu kasakula, Nzambi wakatula e nsambu zandi kwa mingutukila mia Isaele, wavana zo kwa nkangu akaka uyikilwanga mu Nkand’a Nzambi vo “Isaele a Nzambi.” (Ngalatia 6:16; Matai 21:43) O nkangu wau i nkutakani ya Akristu akuswa. Muna tandu kiantete, ntumwa Petelo wavova mu kuma kiau vo: “Owau nu nkangu a Nzambi.”—1 Petelo 2:9, 10.

Wau vo Akristu muna tandu kiantete bakituka se nkangu a Nzambi, nga Nzambi wadi kubanwanina yo kubavevola vana moko ma esi Roma? Nga wadi kubavana o nswa wa nwana ye mbeni zau? Nkatu. Ekuma? Nze una tumwene mu longi diviokele, Nzambi wasikidisanga e ntangwa ifwete nwanwa e vita. Nzambi kanwana vita ko mu kuma kia Akristu muna tandu kiantete, kabavana mpe nswa wa nwana ko. Ozevo, e ntangwa yayina ke yau ko Nzambi kasikidisa mu nwana kimana kafokola e mbi yo umpumbulu.

Nze una diavangama kwa selo ya Nzambi kuna nz’ankulu, diavavanga vo Akristu muna tandu kiantete bavingila yavana o Nzambi kefokola e mbi yo lubangamu. Wau vo Nzambi kabavana nswa ko, ke badi kuyibakila nzengo ko za nwana e vita. Malongi ma Yesu Kristu matoma kiesesa e diambu diadi. Muna bonga e nona, Yesu kavovesa alandi andi ko vo banwananga e vita, kansi wabavovesa vo: “Nuzolanga mbeni zeno, yo samba mu kuma kia awana bekunubangikanga.” (Matai 5:44) Vava kasakula lufwasu lwa Yerusaleme vana moko ma makesa ma Roma, Yesu wavovesa alongoki andi vo batina, ke banwani ko. Idiau mpe bavanga.—Luka 21:20, 21.

Vana ntandu, Nzambi wasadila Paulu mu vova vo: “Ke nulandi kunda ko, . . . kadi diasonama vo: ‘Diame dia landa e kunda; mono kwame nsenda,’ u kavovele o Yave.” (Roma 12:19) Paulu wayika mana masonama muna Fuka 19:18 ye muna Nsiku 32:35. E longi diviokele disongele  vo Nzambi wasadisanga nkangu andi vava banwananga muna landa mbeni zau e kunda. E mvovo mia Paulu misonganga vo ngindu za Nzambi mu kuma kia vita ke zasoba ko. Nzambi wabadikilanga vita vo i mpila ya unsongi ya tanina e selo yandi muna mbi yo lubangamu. Kansi, Nzambi yandi kibeni wasikidisanga e ntangwa ifwete nwanwa e vita ye awana bafwete yo nwana.

Dialudi, Nzambi kavana nswa ko kwa Akristu muna tandu kiantete banwana e vita. Adieyi tuvova mu lumbu yeto? Nga vena ye buka kia wantu kiavewa nswa kwa Nzambi kianwananga e vita? Nga yayi i ntangwa kasikidisa o Nzambi muna nwana yo tanina nkangu andi? Azeyi i ngindu za Nzambi mu kuma kia vita zinwanwanga o unu? E longi dilanda divana e mvutu za yuvu yayi.