Tala mambu

Tala ntu mia mambu

Mbangi za Yave

Sola ndinga Kikongo

Nga Tulenda Kieleka Solola Nzambi?

Nga Tulenda Kieleka Solola Nzambi?

“Nzambi kalendi bakulwa ko.” —Filo wa musi Alexandria, nkwa ngangu muna tandu kiantete.

“[Nzambi] kavavukidi muna konso muntu vava twina ko.” —Mvovo mia Saulu wa musi Taso kwa akwa ngangu muna tandu kiantete kuna Atenai.

MUNA ngindu zazi zau zole, azeyi zina betela ye dina oyindulanga? Ndonga bekwikilanga vo e mvovo mia Saulu wa musi Taso oyikilwanga mpe vo Paulu wa ntumwa, miambote ye mia lufiaulwisu. (Mavangu 17:26, 27) Nkand’a Nzambi uvuidi mvovo miayingi mia lufiaulwisu nze miami. Muna bonga e nona, Yesu walomba sambu kina ye mvovo mia lufiaulwisu misonganga vo alandi andi balenda zaya Nzambi yo vua e nsambu zandi.—Yoane 17:3.

Kansi, akwa ngangu nze Filo ngindu zaswaswana bakala zau. Bavovanga vo katulendi zaya Nzambi ko, kadi o Nzambi kalendi bakulwa ko. Nga ngindu zazi za ludi?

Nkand’a Nzambi uvovanga vo vena ye mambu mampasi mu bakula mu kuma kia Nzambi. Muna bonga e nona, e mvu mia Nzambi, nyindu andi ye ngangu zandi ka zilendi tezakana ko, kadi ziviokele umbakuzi wa wantu. Kansi, mambu mama ke malendi kutukakidila ko mu zaya Nzambi. O badika mambu mama malenda kutusadisa mu ‘finama Nzambi.’ (Yakobo 4:8) Yambula twafimpa maka mambu katulendi bakula ko. I bosi, tufimpa mana tulenda bakula mu kuma kia Nzambi.

 Nkia Mambu Katulendi Bakula Ko?

MVU MIA NZAMBI: Nkand’a Nzambi ukutulonganga vo Nzambi ozinganga “mvu ya mvu.” (Nkunga 90:2) Disongele vo Nzambi kena yo lubantiku ko, ke kala mpe ye nsuka ko. Muna umbakuzi wa wantu, ‘o lutangu lwa mvu mia Nzambi ke lulendi bakulwa ko.’—Yobi 36:26.

Nkia nluta dilenda kutwasila? Nzambi wasia nsilu wa kutuvana moyo a mvu ya mvu avo tutomene kunzaya. (Yoane 17:3) Aweyi twadi kadila ye vuvu muna nsilu wau kele vo yandi kibeni Nzambi kazingingi yakwele mvu ko? “Ntinu a mvu ya mvu” kaka olenda lungisa o nsilu wau.—1 Timoteo 1:17.

NYINDU A NZAMBI: Nkand’a Nzambi ulonganga vo ‘umbakuzi’ wa Nzambi ke ‘ulendi fimpakana ko’ kadi e ngindu zandi zisundidi e ngindu zeto. (Yesaya 40:28; 55:9) I kuma Nkand’a Nzambi uvovelanga vo “nani ozeye nyindu a Yave, kanlonga?”—1 Korinto 2:16.

Nkia nluta dilenda kutwasila? Nzambi olenda wá sambu ya mafunda ye mafunda ma wantu mu ntangwa imosi. (Nkunga 65:2) Nzambi omonanga kana nkutu ntietie imosi ibwidi vana ntoto. O nyindu a Nzambi ke uzalanga ko yo kumfila mu lembi sia sungididi kwa muntu yovo kunwá, kadi o nyindu andi ke una ye tezo ko. Kuna kwa Nzambi, o wantu ‘basundidi e ntiete.’—Matai 10:29, 31.

NZILA ZA NZAMBI: Nkand’a Nzambi ulonganga vo wantu ke balendi ‘zaya mavangu mavangidi Nzambi ko tuka kuna lubantiku yakuna mbaninu.’ (Kimpovi 3:11) Ozevo, ke tulendi zaya mawonso ko mu kuma kia Nzambi. O zayi wa Nzambi ka ulendi ‘fimpakana ko.’ (Roma 11:33) Kana una vo i wau, Nzambi osengomonanga maka mambu kwa awana bazolele kunyangidika.—Amose 3:7.

E mvu mia Nzambi, nyindu andi ye ngangu zandi ka zilendi tezakana ko

Nkia nluta dilenda kutwasila? Avo otangidi yo longoka Nkand’a Nzambi, okwamanana longoka mambu mampa mu kuma kia Nzambi. Ediadi disongele vo tulenda finama Se dieto dia zulu yakwele mvu.

Nkia Mambu Tulenda Bakula?

Kana una vo katulendi bakula mawonso ko mu kuma kia Nzambi, ka disongele ko vo katulendi kunzaya ko. Nkand’a Nzambi uvuidi mambu mayingi malenda kutusadisa mu zaya Nzambi una ufwene. Badika e nona ilende:

NKUMBU A NZAMBI: Nkand’a Nzambi ukutuvovesanga vo Nzambi wakivana nkumbu. Uvovanga: “Omono i Yave, eyayi i nkumbu ame.” E nkumbu a Nzambi yasonekwa tezo kia 7.000 muna Bibila, i nkumbu isundidi nkumbu zankaka muna lutangu.—Yesaya 42:8.

Nkia nluta dilenda kutwasila? Yesu wavova muna sambu vo: “E S’eto koko’zulu, yambula nkumbu aku yazitiswa.” (Matai 6:9) Nga olenda sadila nkumbu a Nzambi muna sambu yaku? Yave osinga vuluza konso muntu ozitisanga e nkumbu andi.—Roma 10:13.

FULU KEZINGILANGA O NZAMBI: Nkand’a Nzambi ulonganga vo vena ye ‘fulu’ yole ya zingila, zulu yo ntoto. E zulu i fulu kizingilanga e vangwa ya mianda. O ntoto i fulu tuzingilanga. (Yoane 8:23; 1 Korinto 15:44) E “zulu” i ‘fulu kezingilanga’ o Mvangi eto.—1 Ntinu 8:43.

Nkia nluta dilenda kutwasila? O zaya e ludi mu kuma kia Nzambi. O Mvangi kena mu fulu  yawonso ko ngatu kala muna lekwa yawonso nze una bevovanga o wantu. Yave muntu akieleka, una mpe ye fulu kezingilanga. Vana ntandu, ‘ke vena vangwa ko kiaswekama vana ndose andi.’—Ayibere 4:13.

KIWUNTU KIA YAVE: Nkand’a Nzambi ulonganga vo Yave ovuidi fu yambote. “Nzambi i zola.” (1 Yoane 4:8) Kevunanga ko. (Tito 1:2) Nzambi kesianga mpambula ko, nkwa nkenda, kefunganga makasi mu nzaki ko. (Luvaiku 34:6; Mavangu 10:34) Wantu ayingi balenda sivika mu zaya vo Mvangi ozolele vo awana bezitisanga e nkumbu andi bakala ‘akundi andi.’—Nkunga 25:14.

Nkia nluta dilenda kutwasila? Olenda kala nkundi a Yave. (Yakobo 2:23) Ekolo ozayanga kiwuntu kia Yave, otoma bakula tusansu twa Nkand’a Nzambi.

‘UMVAVA’

Nkand’a Nzambi utoma sasilanga e mpila muntu kena Yave wa Nzambi. O Mvangi ozolele vo wanzaya. Diambu dia Nzambi disianga nsilu vo: “Ovo okuntomba, osolok’oko wina.” (1 Tusansu 28:9) Ekuma olembi vangila nkubika ya tanga yo badika tusansu twa Nkand’a Nzambi muna zaya Nzambi? Avo ovangidi wo, Nkand’a Nzambi usianga nsilu vo Nzambi ‘okufinama.’—Yakobo 4:8.

Avo otangidi yo longoka Nkand’a Nzambi, okwamanana longoka mambu mampa mu kuma kia Nzambi

Nanga olenda kukiyuvula, ‘wau vo kilendi bakula mawonso ko mu kuma kia Mvangi, aweyi ndenda kadila nkundi andi?’ Badika nona kiaki: Avo muntu dotolo kena, nga o nkundi andi kafwete mpe kala dotolo? Nkatu. O nkundi a dotolo olenda kwandi kala ye salu kiankaka. Kansi, balenda kala ye kikundi kiambote. E diambu disundidi mfunu, nkundi a dotolo ozeye fu yandi, mana kezolanga ye mana kemenganga. Diau dimosi mpe, muna Nkand’a Nzambi olenda longoka fu ya Yave eyi ikusadisa mu kala nkundi andi.

O Nkand’a Nzambi uyikanga mana tufwete vanga muna zaya Nzambi. Nga ozolele zaya mankaka mu kuma kia Yave wa Nzambi? Mbangi za Yave bena ye programa ya longa Nkand’a Nzambi kwa wantu mu ngovo. Tulombele wamokena ye mosi muna Mbangi za Yave muna zunga kiaku yovo sadila nzil’eto ya internete, www.jw.org/kwy.