Tala mambu

Tala ntu mia mambu

Mbangi za Yave

Sola ndinga Kikongo

Nga Nzambi Ofungilanga Makasi?

Nga Nzambi Ofungilanga Makasi?

“EKUMA? Ekuma Nzambi kayambulwidi vo e diambu diadi diambwila?” E yayi i yuvu yatokanesanga Sidnei wa mvu 24 kuna Brasil. Sidnei wavanguka vava kavanganga e nsaka za sielomoka. Tuka wauna, mu kalu dia avanguki kekangalelanga.

E mpasi za mayela, sumbula, lufwa lwa nzolw’eto ye vita zilenda fila wantu mu fungila Nzambi makasi. E diambu diadi ke diampa ko. Yobi wakendalala mu kuma kia sumbula yambwila. Wau vo ngindu zabendomoka kakala zau, Yobi watumba Nzambi muna vova vo: “Ikazidi, kukumputula ko. Ntelamene, untungunwini. Okitukidi se mbangiki oku ngina. Muna nkum’a koko kwaku umbangikidi.”—Yobi 30:20, 21.

Yobi kazaya ko kuna kwatukanga e mpasi zandi ye kuma zambwila. Kansi, Nkand’a Nzambi usonganga e kuma mambu mampasi mebwilanga ye dina tulenda vanga vava tukalanga mu mpasi.

NGA NZAMBI WAKANA WO VO WANTU BAMONANGA E MPASI?

Nkand’a Nzambi ukutuvovesanga mu kuma kia Nzambi vo: “O mavangu mandi malunga. Kadi ngyenda zandi zawonso zansongi. O Nzambi nkwa ziku, yo kondw’o vilwa, wansongi kwandi yo singama.” (Nsiku 32:4) Wau vo Nzambi ‘wansongi yo singama,’ nga wadi kana vo wantu bamonanga e mpasi yo twasa e sumbula muna kubatumba? Ve.

Nkand’a Nzambi ukutuvovesanga vo: ‘Ke vakadi muntu ko otontwa kavova vo: Nzambi untontele. Kadi Nzambi kalendi tontwa mu mambu mambi ko, ngatu yandi kibeni katonta muntu.’ (Yakobo 1:13) Nkand’a Nzambi ukutulonganga vo Nzambi tuku diambote kavana kwa wantu. Wavana Adami yo Eva fulu kiambote kiazingila, mawonso bavuanga o mfunu ye salu kiambote. Nzambi wabavovesa vo: ‘Nuwutana, nuwokela, nulungila e nza, nuyala yo.’ Adami yo Eva ke bakala ye kuma ko kia fungila Nzambi makasi.—Etuku 1:28.

Kansi, o unu e zingu kiaswaswana ye kina o Adami yo Eva bakala kiau. Muna lusansu lwawonso, e mpasi za wantu wokela kaka ziwokelanga. Nkand’a Nzambi ludi uvovanga vava uyikanga vo: “O nsema wawonso ubuminanga yo kala yo nsongo kumosi yamu wau.” (Roma 8:22) Ekuma?

EKUMA WANTU BEMWENANGA E MPASI?

Muna zaya e kuma, tufwete zaya ntete aweyi e mpasi zayantikila. Adami yo Eva bavukumunwa kwa Satana wa Nkadi ampemba mu bembola nkanikinu mia Nzambi mu kuma kia edi diambote y’edi diambi nze una usonganga nkanikinu kabavana walembi dia “nti a zayila wete yo bi.” Satana wazayisa Eva vo kefwa ko avo okolamene Nzambi, wayikila nkutu Nzambi vo mvuni. Satana wavova mpe vo Nzambi wabasweka o nswa wa kuyitumina. (Etuku 2:17; 3:1-6) Satana wavova vo wantu badi kala ye zingu kiambote lembi yalwa kwa Nzambi. Mawonso mama mavaikisa kiuvu kiamfunu, nga Nzambi wafwana kikilu yala?

Nkadi ampemba wavaikisa diambu diankaka. Wavova vo wantu mu kuma kia loko besadilanga Nzambi. Mu kuma kia Yobi wa nkwa kwikizi, Nkadi ampemba wavovesa Nzambi vo: “Oyandi ye nzo andi ye lekwa yawonso kena yau, kuzietese yo lumbu ko e? . . . Lambul’ak’o koko, waviakana yawonso kena yau, ozevo okuyambula vana ndose aku.” (Yobi 1:10, 11) Kana una vo Satana Yobi kavovela, muna mvovo miandi wasonga vo wantu awonso besadilanga Nzambi mu kuma kia nsambu kekubavananga.

UNA NZAMBI KASINGIKILA MAMBU

Aweyi Nzambi kadi singikila mambu mama mu mpila yambote? Wau vo Nzambi i nkwa ngangu zawonso, wasingika mambu mama mu mpila yambote. (Roma 11:33) Nzambi wayambula vo wantu bakiyala mu fikolo kimana mavangu mau masonga kana nani i nyadi osundidi.

 O mambu mambi mevangamanga mu nza mesonganga ziku vo luyalu lwa wantu lwafunga. Ayadi a nza ke befunganga kaka ko mu twasa luvuvamu ye zingu kiambote kwa wantu, kansi befwasanga mpe e nza. Ediadi disonganga e ziku kia mvovo mia Nkand’a Nzambi: ‘E nzil’a muntu ke ina muna yandi ko ngatu singika ntambi zandi.’ (Yeremiya 10:23) Luyalu lwa Nzambi kaka lulenda twasa luvuvamu lwakieleka ye zingu kiakiese kwa wantu, kadi e diadi i kani dia Yave.—Yesaya 45:18.

Aweyi Nzambi kelungisila e kani diandi diatwasa zingu kiakiese kwa wantu? Sungamena vo Yesu walonga alandi andi basambanga vo: “E Kintinu kiaku kiza. O luzolo luaku luavangam’ova nza nze koko’zulu.” (Matai 6:10) Muna ntangwa andi, Nzambi osadila Kintinu kiandi muna fokola mambu mawonso metwasanga e mpasi. (Daniele 2:44) Usukami, yimbevo yo lufwa, mawonso mama ke mekala diaka ko. Mu kuma kia usukami, Nkand’a Nzambi uvovanga vo Nzambi “okôla nkondami vava kekaza.” (Nkunga 72:12-14) Mu kuma kia yimbevo, Nkand’a Nzambi uvovanga vo: “O ntungi kevova ko vo, yela nyela.” (Yesaya 33:24) Yesu wavova mu kuma kia wantu bafwa bena muna nyindu a Nzambi vo: ‘Ke nusiviki dio ko ediadi, kadi e ntangwa ikwiza, ina ikala vo awonso bena muna ziami bewa nding’andi yo vaika.’ (Yoane 5:28, 29) Ekwe nsilu mia lufiaulwisu!

O siamisa lukwikilu lweto muna nsilu mia Nzambi, dikutusadisa mu lembi fungila Nzambi makasi

SUNDA LUKENDALALU

Vioka mvu 17 tuka kavangukila, Sidnei ona oyikilu kala wavova vo: “Kitumbanga Yave wa Nzambi ko, kansi kuna lubantiku yakendalalanga mu kuma kiandi. Vena ye lumbu ikendalalanga kwayingi yo dila mu kuma kia kimvanguki kiame. Kansi, muna lusadisu lwa Nkand’a Nzambi yabakisa vo e sumbula kiambwila ke tumbu kia Nzambi ko. Nkand’a Nzambi uvovanga vo e ‘kolo ye mambu ma kinsalukisa mebwilanga awonso.’ O samba kwa Yave yo tanga sono ina betela ye mpasi imonanga, dikunkumikanga muna mwanda yo kunsadisa mu kala ye ngindu zasikila.”—Kimpovi 9:11; Nkunga 145:18; 2 Korinto 4:8, 9, 16.

O sungamena e kuma Nzambi keyambulwilanga e mpasi ye una kefokolwela zo, dilenda kutusadisa mu lembi fungila Nzambi makasi. Tuna ye ziku vo Nzambi i “nsendi awana bekumvavanga.” Ke vena muntu ko obundanga e vuvu muna Nzambi yo Mwan’andi osinga kendelekwa.—Ayibere 11:6; Roma 10:11.