Tala mambu

Tala ntu mia mambu

Mbangi za Yave

Sola ndinga Kikongo

 MOKO KIA MAMBU MA NZAMBI

Nga Nzambi Otokananga mu Kuma kia Mpasi Zeto?

Nga Nzambi Otokananga mu Kuma kia Mpasi Zeto?

Tala e mpila moko kina Mbangi za Yave balenda mokena ye mfinangani zau. Yindula vo Mbangi a Yave nkumbu andi Maria, wele kuna nzo a Sofia.

EKUMA NZAMBI KEYAMBULWILANGA E DIADI?

Maria: Finkanda-nkanda fiafi yikayanga kwa wantu awonso mu zunga kiaki, fina yo ntu a diambu vo: Nga Zolele Zaya e Ludi? E fiafi i fiaku.

Sofia: Nga diambu dia Nzambi fivovelanga?

Maria: Ingeta. Tala yuvu sambanu yina mu lukaya lwantete. Nkia kiuvu—

Sofia: Vingila. Ntangwa ankatu una viokesa mu mokena yame.

Maria: Ekuma ovovele wau?

Sofia: E kuma kadi kina ye ziku ko kana vo ikwikilanga muna Nzambi.

Maria: Ntondele muna ngindu zaku. Tuka kolo i wau oyindulanga?

Sofia: Ve, munkwikizi yakala. Kansi, se kolo yayambula kwenda ku nzo a nzambi.

Maria: Mbakwidi. Kansi, yambula yazayisa e nkumbu ame. E nkumbu ame Maria.

Sofia: Omono nkumbu ame Sofia.

Maria: Ngyangalele muna kuzaya.

Sofia: Mono mpe ngyangalele.

Maria: E Sofia, kizidi kukomekena ko kimana wakwikila muna mana ikwikilanga. Kansi, unzayisa. Nga vena ye diambu diafila mu katikisa kana vo Nzambi una?

Sofia: Ingeta. O ngudi ame wadiatwa kwa kalu se vioka mvu 17.

Maria: Eh, nkenda! Nga wavanguka?

Sofia: Ingeta. Wakituka se koka.

Maria: Diankenda kikilu. Ka lukatikisu ko vo mpasi dikuvanganga.

Sofia: Mpasi kibeni. E kiaki i kuma ikatikisilanga kana vo Nzambi una. Ikiyuvulanga, ekuma Nzambi keyambulanga vo twamona e mpasi?

NGA DIAMBI MU YUVULA E KIUVU KIAKI?

Maria: E ngindu zaku ke zambi kwandi ko. Vava tumonanga e mpasi ke diambi ko mu vava zaya e kuma. Kana nkutu selo ya Nzambi kuna nz’ankulu bavava o zaya e kuma Nzambi keyambulwilanga e mpasi.

Sofia: Kinga?

Maria: Ingeta. Nga ozolele mona e ziku kia diambu diadi muna Nkand’a Nzambi?

Sofia: Ingeta.

Maria: Tala dina Kabakuke wa selo kia kwikizi kayuvula kwa Nzambi muna nkanda Kabakuke, kapu kia 1 tini kia 2 ye kia 3: “E Yave, nkia kolo mboka, ngeye kuwe? Ikukazila muna ngungula, kuvuluza ko. Nkia kum’okunsongela bi?” Nga yuvu yayi ke yafwanana ko ye yuvu tuvanganga o unu?

Sofia: Ingeta, yafwanana kikilu.

Maria: Nzambi katumba Kabakuke ko mu kuma kia yuvu yayi ngatu kuvovesa vo lukwikilu lwakete kakala lwau.

Sofia: Diakiese mu zaya ediadi.

YAVE KE YANGALELANGA MPASI ZA WANTU KO

Maria: Nkand’a Nzambi ulonganga vo Nzambi omonanga e mpasi zeto ye otokanenanga zo.

Sofia: Adieyi ozolele vova?

Maria: Yambula yasonga e diambu diadi muna Luvaiku 3:7. Nga olenda tanga e sono kiaki?

Sofia: Ingeta. Kivovele vo: “O Yave oku vo: Mbwene mbangam’a nkangu ame wina muna Engipito, ngwidi kazu kiau muna kuma kia mbuta za salu, kadi nzeye mpasi zau.”

Maria: Ntondele. Nze una otangidi, nga Nzambi omonanga e mpasi za nkangu andi?

Sofia: Ingeta, omonanga zo.

Maria: Zaya dio vo Nzambi kemonanga kaka mpasi zibwanga ko. Tala e mvovo miansuka mia sono kiaki. Nzambi ovovele vo: “Nzeye mpasi zau.” Nga e mvovo miami misonganga vo Nzambi nkwa nsoki ye ke kutuvwanga mfunu ko?

Sofia: Ve kikilu.

Maria: O Nzambi kemonanga kaka mpasi zeto ko, kansi okendalalanga vava tumonanga e mpasi.

Sofia: Dialudi.

Maria: Yambula twatanga diaka sono kia Yesaya 63:9 kisonganga una kamona o Nzambi vava nkangu andi bamonanga e mpasi. E tini kiantete kivovele vo: “Muna mpasi zau zawonso i kamwene mpasi.” Nga Nzambi wamona e mpasi za nkangu andi?

Sofia: Ingeta, wamona zo.

Maria: E Sofia, e ziku kia diambu i kiaki: Nzambi okutuvwanga kieleka o mfunu. Omenganga e mpasi tumonanga. Vava tukendalalanga, yandi mpe okendalalanga.

EKUMA KEZINGILANGA MU FOKOLA E MPASI?

Maria: Vitila ngienda, nzolele kusonga sono kiakaka.

Sofia: Ka diambu ko.

Maria: Badika dina Nkand’a Nzambi ulonganga mu kuma kia nkuma wa Nzambi. E sono i kiaki, Yeremiya 10:12. Nga olenda tanga?

Sofia: Ingeta. Kivovele vo: “Oyandi wasemena nza mun’efuka diandi, wasikidisila yo muna ngangu, wayalumwin’ezulu muna umbakuzi.”

Maria: Ntondele. Yambula twabadika e sono kiaki. Nga ke diavavanga ko vo Nzambi kakala yo nkuma wafwana muna vanga lekwa yawonso?

Sofia: Nkuma kikilu diavavanga.

Maria: Avo Nzambi una yo nkuma wavanga lekwa yawonso yituzungidi, nga kena yo nkuma wa lunga-lunga e vangwa yandi ko?

Sofia: Ingeta, una wau.

Maria: Yindula dina diabwila ngudi aku. Ekuma okendalalanga mu kuma kia mpasi za ngudi aku?

Sofia: E kuma , zola itoma kunzolanga. Oyandi i ngudi ame.

Maria: Kele vo wakala yo nkuma wa kunwuka, nga kwadi wo vanga ko?

Sofia: Elo.

Maria: Yindula ediadi. Nkand’a Nzambi ulonganga vo Nzambi ozeye mpasi zeto, omonanga e ntantu mu kuma kieto ye una yo nkuma wafwana. Ozevo, ekuma Nzambi kekangilanga o ntima yo lembi fokola e mpasi zeto yamu unu?

Sofia: Kiasidi yindula yo diambu diadi mu mpila yayi ko.

Maria: Ediadi nga ke disonganga ko vo Nzambi una ye kuma kiampwena mu lembi fokola e mpasi zeto? *

Sofia: Huu, nanga kuma kiampwena kikilu kena kiau.

Maria: E telefone aku mu bokela ina, ozevo, mfwete vutuka lumbu kiakaka muna kwamanana e moko kieto.

Sofia: Ntondele. Bosi ikuvingila. *

Nga una ye kiuvu kina ovavilanga zaya e mvutu muna Nkand’a Nzambi? Nga ozolele zaya dina Mbangi za Yave bekwikilanga? Avo i wau, kukadi ye lukatikisu ko lwa yuvula kwa mosi muna Mbangi za Yave. Yandi okala ye kiese kia mokena yaku mambu mama.

^ tini. 61 Elongi dilanda disonga ekuma Nzambi keyambulwilanga e mpasi.

^ tini. 64 Muna zaya diaka mambu makaka, tala kapu kia 11 kia nkanda, O Nkand’a Nzambi Adieyi Kieleka Kelonganga? wavaikiswa kwa Mbangi za Yave.