Tala mambu

Mbangi za Yave

Sola ndinga Kikongo

 LUSADISU KWA ESI NZO | LONGO

Lomba e Ndoloki

Lomba e Ndoloki

DIAMBU DIAMPASI

Yindula vo ngeye yo nkaz’aku nutantane. Ongeye ovovele muna ntim’aku vo, ‘Kinkulomba ndoloki, ke mono ko mvavidi mo.’

Kana una vo kuzolele lomba ndoloki ko, zaya dio vo e ntantani zakinu. Obakwidi kwaku vo ofwete lomba e ndoloki, kansi kulendele vova ko vo “undoloka.”

EKUMA DIVANGAMENANGA?

Lulendo. Yakala dimosi nkumbu andi Charles, * wavova vo, “Nkumbu miayingi kilendanga lomba ndoloki ko, kadi avo mvangidi wo, o zitu wame ukuluka.” Lulendo lulenda kufila mu yindula vo kuvangidi kwaku diambi ko.

Ngindu zaku. Olenda yindula vo diambote mu lomba e ndoloki kele vo ngeye ovavidi nkwaku o mambu. Nkento mosi nkumbu andi Jill, wavova vo: “Avo nzeye vo mono mvavidi o mambu, ke dikalanga mpasi ko mu lomba e ndoloki.” Kansi avo yeto awole mambu mambi tuvovele, diampasi dikalanga kwa mono mu lomba e ndoloki. “Kimonanga mfunu wa lomba ndoloki ko avo yeto awole mbi tuvangidi.”

Olenda kuyilungisa avo omwene vo nkaz’aku yandi una ye ngielele yawonso. Yakala dimosi nkumbu andi Joseph, wavova vo: “Avo una ye ziku vo kuvangidi kwaku diambi ko, kulomba ndoloki ko mu songa vo ke ngeye ko ovavidi mo.”

Mpila wasansukila. Nanga wasansukila mu nzo ina o wantu ke balombanga ndoloki ko. Avo i wau, kuzeye tambulwila e ngielele ko. Wau kina vo muna kileke kwalongwa dio ko, i dianu omwenanga vo diampasi mu lomba e ndoloki muna kimbuta.

 DINA OFWETE VANGA

Olomba e ndoloki dilenda zimanga o tiya

Uyisia vana fulu kia nkaz’aku. Yindula e kiese wamona vava walombwa e ndoloki kwa muntu. Ekuma olembi wo vangila muna yangidika nkaz’aku? Kana nkutu omwene vo kuvangidi kwaku mbi ko, olenda lomba e ndoloki mu kuma kia mpasi zina o nkaz’aku kamwene omu ntima. O lomba e ndoloki dilenda fokola e mpasi za nkaz’aku.—Nkanikinu wa Nkand’a Nzambi: Luka 6:31.

Tanina longo lwaku. Kuyindula ko vo avo olombele ndoloki okitukidi se zowa. Vanga wo muna tanina longo lwaku. Muna Ngana 18:19 tutanganga vo: “O baka mpangi wasumukwa, e mpasi ke mu bak’evata diangolo ko.” Dilenda kala diampasi mu vutulwisa luvuvamu kele vo yeno awole nuvavanga kuyilungisa. Kansi o lomba e ndoloki dikululanga e ntantani. O vanga wo dina nze ngeye osianga longo lwaku vana fulu kiantete.—Nkanikinu wa Nkand’a Nzambi: Filipi 2:3.

Lomba e ndoloki kuna sazu kiawonso. Dialudi vo, diampasi dikalanga mu lomba e ndoloki avo ke tuna ye ngielele ko. Kansi ke disongele ko vo ofwete songa fu yambi wau vo nkaz’aku una ye ngielele. Ozevo, lomba-lomba e ndoloki, kuyindula ko vo e ntangwa avo iviokele e diambu se diafokoka kwandi. Avo yakala olombele ndoloki, dilenda sadisa mpe o nkento kalomba e ndoloki. Avo luna ye fu kia lomba e ndoloki, ke dikala diaka mpasi ko kwa yeno.—Nkanikinu wa Nkand’a Nzambi: Matai 5:25.

Lomba ndoloki ye nsi a ntima. Ovava kuyilungisa ke diau dimosi ko yo lomba e ndoloki. Nanga olenda lomba e ndoloki kuna luvezo lwawonso, “undoloka kwame,” kansi ke wau ko ulombelwanga e ndoloki! Tambulwila e ngielele aku, lomba e ndoloki kwa nkaz’aku, kuvavi kuyilungisa ko.

Tambulwila o vilwa. Kuna lulembamu lwawonso zaya wo vo vilwa ovanga. Yeto awonso, vilwa tuvanganga. Kana nkutu oyindwidi vo kuna kwaku ye ngielele ko, vena kaka ye fidiambu ovangidi yovo ovovele dikudikidi e ntantani. Muna Nkand’a Nzambi tutanganga vo: “On’ovita muna mfundu, vika sia vo nlungi; kansi o nkw’andi olueke, untongonwene.” (Ngana 18:17) Otambulwila o vilwa waku dilenda kusadisa mu lomba e ndoloki kuna sazu kiawonso.

^ tini. 7 Nkumbu zankaka zasobwa.

JASON YO ALEXANDRA

“Olomba e ndoloki dilenda sadisa mu lembi tantananga kwayingi muna longo. Olomba e ndoloki divananga e lau mu songa kwa nkaz’aku vo zola okunzolanga.”

KAI YO JULIA

“Olomba e ndoloki mfunu dina kadi divutulwisanga luvuvamu ye kiese muna longo. Ke disongele ko vo ndiona olombele ndoloki yandi una ye ndungidi yovo ngielele. Avo nkaz’aku okendelekele, vanga mawonso kayambul’o kendalala.”