Tala mambu

Tala ntu mia mambu

Mbangi za Yave

Sola ndinga Kikongo

Yesu Aweyi Kieleka Kakala?

Yesu Aweyi Kieleka Kakala?

Ka vena muntu ko una ye foto dia Yesu. Kasidi bandulwa ko ngatu vangisa teke kiandi. Kansi, obandulwanga kwa avangi a fwaniswa muna tandu yawonso.

Kieleka, avangi a fwaniswa awaya ke bazeye mpw’a Yesu ko. E fu ya kisi nsi, malongi ma mabundu yo luzolo lwa mfumu zau, lufilanga avangi a fwaniswa muna sola mpw’a Yesu. Kana una vo i wau, e fwaniswa yau ilenda vukumuna yo bendomona ngindu za wantu mu kuma kia Yesu ye malongi mandi.

Avangi akaka a fwaniswa bebandulanga Yesu nze ntovoki ye nsuki zandá ye nzevo yovo mpwa yazowalala. Muna fwaniswa yankaka, Yesu osongwanga nze mbasi, wasiwa lukongolo vana ntandu a ntu yovo watelama kwandá y’awana banzungidi. Nga fwaniswa yayi isonganga kiwuntu kiakieleka kia Yesu? Aweyi tulenda kio zayila? O fimpa mambu masonama mu Nkand’a Nzambi dilenda kutusadisa mu bakula una kakala. Malenda kutusadisa mpe mu kala ye ngindu zasikila mu kuma kiandi.

“UNKUBIKIDI E NITU”

Nanga Yesu wavova mvovo miami muna sambu, muna ntangw’a luvubu lwandi. (Ayibere 10:5; Matai 3:13-17) E nitu andi aweyi yakala? Vitila mvu 30, mbasi Ngambiele wavovesa Maria vo: “Yimita oyimita, mwan’a yakala owuta, . . . Mwan’a Nzambi.” (Luka 1:31, 35) Muna kuma kiaki, Yesu muntu alunga kakala, nze una wakala Adami vava kavangua. (Luka 3:38; 1 Korinto 15:45) Yesu watoma vangwa, nanga mpw’andi yafwanana yo Maria wa ngudi andi wa Nyuda.

Nswaswani y’esi Roma, Yesu nzevo kalundanga kadi i fu kia Ayuda. E nzevo zankufi zatoma zengwa, sinsu kia luzitu kiakala. Ka lukatikisu ko vo Yesu watoma zenganga nzevo ye nsuki zandi. Avambuki kaka ke bazenganga nsuki ko nze Samesone.—Ntalu 6:5; Afundisi 13:5.

Vava kakala se toko yamuna kimbuta kia mvu 30, Yesu salu kia vala nti kasalanga, kasadilanga salanganu ya tandu kiaki ko. (Maku 6:3) Ka lukatikisu ko vo Yesu nitu akumama kakala yau. Kuna lubantiku lwa salu kiandi kia samuna nsangu zambote, yandi mosi kaka ‘wavaikisa awonso ana bakala yo mameme ye ngombe muna tempelo, wamwanga nzimbu za mimbudi a nzimbu yo kindula meza mau.’ (Yoane 2:14-17) Dina kavanga, nkwa ngolo ye nkwa nkuma kaka olenda dio vanga. Yesu wasadila nitu ina kakubikilwa kwa Nzambi muna lungisa kiyekwa kavewa kwa Nzambi. Wavova vo: “Mfwete kwenda mpe muna mavata mankaka, yasamun’e nsangu zambote za Kintinu kia Nzambi, kadi i diau yatuminwa.” (Luka 4:43) Ngolo kikilu diavavanga muna kangala kia malu muna Palestina yawonso yo kwenda samuna e nsangu zambote.

“NWIZA KWA MONO, . . . IKUNUVUNDISA”

E zizi kia Yesu kia kiese ye kadilu kiandi kiambote nanga i kiau kiafila awana ‘bafuntukanga  yo bimuka yo mazitu’ mu tambulwila e mboka yayi. (Matai 11:28-30) E ngemba ye nkenda zandi zasiamisa nsilu andi wa vundisa awana bakala ye luzolo lwa longwa kwa yandi. Kana nkutu yingiana-ngiana bazolanga finama Yesu, kadi Nkand’a Nzambi uvovanga vo: “Owonzakene yingiana-ngiana.”—Maku 10:13-16.

Kana una vo Yesu wamweswa mpasi vitila lufwa lwandi, kakala ye mpwa ya nkenda ko. Muna bonga e nona, muna nkinzi a longo kuna Kana muna sadisa wantu bakala ye kiese, wakitula maza se vinyu. (Yoane 2:1-11) Muna lukutakanu lwankaka walonga mambu ke malendi vilakanwa ko.—Matai 9:9-13; Yoane 12:1-8.

Vana ntandu, malongi ma Yesu masadisanga awana banwanga mu kala ye kiese ye vuvu kia moyo a mvu ya mvu. (Yoane 11:25, 26; 17:3) Vava alongoki andi 70 banzayisa nsangu za salu kiau, Yesu ‘wayangalala kikilu yo vova’ vo: “Numon’e kiese wau vo e nkumbu zeno zisonamene kuna zulu.”—Luka 10:20, 21.

“VO I YENO, KE NUKADI WAU KO”

E mfumu za nsambila muna lumbu ya Yesu, bavavanga tunta e sungididi muna yau kibeni yo tundidika wisa kiau. (Ntalu 15:38-40; Matai 23:5-7) Nswaswani yo yau, Yesu walonga alongoki andi mu lembi ‘diatidila’ akaka. (Luka 22:25, 26) Dianu vo, Yesu wabalukisa vo: “Nuyikenga ye asoneki ana bazola kangadila muna mvuela yo kayiswa muna mazandu.”—Maku 12:38.

Nswaswani yo yau, lumbu kimosi Yesu wasangana ye ndonga, i dianu ke banzayidila ko. (Yoane 7:10, 11) Kana nkutu vana kati kwa alongoki andi 11 akwa kwikizi, Yesu kakala waswaswana ko. O Yuda wa nyekodi ‘wavana sinsu’ kia mfibu kwa nkangu kimana banzayidila.—Maku 14:44, 45.

Kana una vo mambu mayingi ma Yesu ke mazayakene ko, ditomene moneka vo Yesu kafwanana ko ye mpwa ina kebandulwilwanga. Edi disundidi o mfunu ke mpwa ko ina kikilu kakala yau, kansi una tukumbadikilanga owau.

“KE KOLO KO E NZA KE IKUMBONA DIAKA KO”

Muna lumbu kina kavova e mvovo miami, Yesu wavondwa yo zikwa. (Yoane 14:19) Wavana moyo andi se “lukûlu lwa wantu ayingi.” (Matai 20:28) Muna lumbu kia tatu, Nzambi wamfula “muna mwanda” yo “yambula vo kamoneka” kwa akaka muna alongoki andi. (1 Petelo 3:18; Mavangu 10:40) Yesu aweyi kakala vava kamoneka kwa alongoki andi? Nanga mpwa yaswaswana kakala yau, kadi alongoki andi ke banzayidilanga ko vana vau. Maria Mandala wambadikila vo mvati a nsengo; alongoki andi wole muna nzila Emau, bambadikila vo nzenza.—Luka 24:13-18; Yoane 20:1, 14, 15.

Nkia mpwa tufwete kumvangilanga o Yesu o unu? Vioka mvu 60 vava Yesu kafwa, Yoane wa nlongoki anzolwa, wamona Yesu muna mona-meso. Yoane kamona Yesu ko vana kuluzu muna mpasi za lufwa. Kansi wamona se “Ntinu wa atinu ye Mfumu a zimfumu,” ke kolo ko osunda mbeni za Nzambi, diakala wantu ye nkuya yo twasa nsambu zakwele mvu kwa wantu.—Lusengomono 19:16; 21:3, 4.