Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | AMBASI—NGA BENA KIELEKA?

Una Ambasi Balenda Kusadisila

Una Ambasi Balenda Kusadisila

E mbasi zakwikizi betoma sianga sungididi muna mambu ma wantu yo vanga luzolo lwa Yave una ufwene. Vava Nzambi kasema e nza, e mbasi “zayimbidila kumosi, wan’awonso a Nzambi bayengoloka ye kiese.” (Yobi 38:4, 7) Muna lusansu lwawonso, ambasi bekalanga ye tima dia “bakula” ungunza uyikanga mambu mebwa ova ntoto kuna sentu.—1 Petelo 1:11, 12.

Nkand’a Nzambi usonganga vo muna lungisa luzolo lwa Nzambi, ezak’e ntangwa ambasi betaninanga asambidi aludi. (Nkunga 34:7) Tala nona ilende:

  • Vava Yave kafwasa Sodomo ye Ngomora, mbanza za umpumbulu, ambasi basadisa Loti wa muntu ansongi ye esi nzo andi mu tina.—Etuku 19:1, 15-26.

  • Vava matoko matatu batubwa muna soka dia tiya, kuna Babele yankulu, Nzambi ‘watuma mbasi andi katanina ntaudi zandi.’—Daniele 3:19-28.

  • Vava kaviokesa fuku wamvimba muna wulu dia nkosi za nsita, Daniele wavova vo yavuka kadi “Nzambi ame otumini mbasi andi, ozikidi nua mia nkosi.”—Daniele 6:16, 22.

Lusansu lusonganga vo ambasi besadisanga selo ya kwikizi ya Yave

AMBASI BASADISA NKUTAKANI YANTETE Y’AKRISTU

Ezak’e ntangwa, mbasi za Nzambi zina zanatanga nsangu zandi, zavananga lusadisu muna nkutakani yantete y’Akristu muna lungisa e kani dia Yave. Tala nona ilende:

  • Mbasi mosi waziula mielo mia pelezo yo vaikisa antumwa ana babakama kimana bakwanana samuna nsangu zambote muna tempelo.—Mavangu 5:17-21.

  • Mbasi mosi wafila Filipo muna nzil’a makanga yatuka kuna Yerusaleme yakuna Ngaza kimana kenda samunwina nsangu zambote kwa Ntiopia ona wayenda sambila kuna Yerusaleme.—Mavangu 8:26-33.

  • Vava yafwana e ntangwa kasikidisa o Nzambi kimana esi zula bakituka se Akristu, mbasi mosi wamoneka kwa Koneleo wa mfumu a makesa ma Roma, wanzayisa vo katumisa ntumwa Petelo muna nzo andi.—Mavangu 10:3-5.

  • Ntumwa Petelo vava kasiwa muna pelezo, mbasi mosi wamoneka kwa yandi yo kumvaikisa muna pelezo.—Mavangu 12:1-11.

 UNA MBASI BALENDA KUSADISILA

Kavena ye ziku ko kisonganga vo owau Nzambi mbasi kesadilanga muna sadisa wantu mu mpila yasivi nze una kasadisila ana tutanganga muna Nkand’a Nzambi. Kansi, mu kuma kia lumbu yeto Yesu wavova vo: “E nsangu zazi zambote za Kintinu zisamunwa mu nza yawonso muna umbangi kwa zula yawonso, i bosi ikwiza e mbaninu.” (Matai 24:14) Nga ozeye wo vo alongoki a Kristu mu lusadisu lwa mbasi besadilanga e salu kiaki?

Ambasi besadisanga muna salu kia samuna e nsangu zambote mu nza yawonso

Nkand’a Lusengomono usonganga vo ambasi besadisanga wantu mu nza yawonso balongoka oma ma Yave wa Nzambi ye kani diandi mu kuma kia wantu. Ntumwa Yoane wasoneka vo: “Mbwene mbasi yankaka itilumukanga muna kati kwa zulu, ina ye nsangu zambote mu samunwina awana bekalanga ova nza, kwa zula yawonso, makanda, ndinga ye nkangu. Ivovele muna nding’angolo, oku vo: “Nuvumina Nzambi yo kumvana nkembo, kadi e ntangw’a mfundis’andi ilueke, nusambila Ndiona wasema zulu ye nza, ye kalunga ye nto za maza.” (Lusengomono 14:6, 7) O unu, vena ye nona yayingi isonganga ziku kia lusadisu lwa mbasi muna salu kia samuna Kintinu kisalwanga mu nza yawonso. Avo nsumuki ovutukidi kwa Yave, ‘kiese kikalanga vana vena ambasi za Nzambi.’—Luka 15:10.

Adieyi dibwa vava salu kia samuna nsangu zambote kifokoka? “E vu kiazulu” kia mbasi kisadisa Yesu Kristu, wa Ntinu a atinu muna nwana vita ya Armangedo, i sia vo “vit’a lumbu kianene kia Nzambi a Mpungu-ngolo. (Lusengomono 16:14-16; 19:14-16) Mbasi zankuma yau besadilwa kwa Nzambi vava Mfumu eto Yesu ‘kelanda e kunda kw’awana . . . ke belemvokelanga e nsangu zambote ko mu kuma kia Mfumu eto Yesu.’—2 Tesalonika 1:7, 8.

Muna kuma kiaki, kala ye ziku vo ambasi mfunu kikilu bekuvuanga. Betoma tokanenanga wete dia awana bazolele sadila Nzambi. O Yave nkumbu miayingi kekubasadilanga muna kumika yo tanina selo yandi yakwikizi ova nza.—Ayibere 1:14.

Konso muntu mu yeto, kafwete sola diambu disundidi o mfunu. Nga tuwá yo lemvokela nsangu zambote zisamunwanga mu nza yawonso? Mbangi za Yave muna zunga kiaku bekala ye luzolo lwa kusadisa kimana wavua nluta mia lusadisu lwa mbasi zankuma za Nzambi.