Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | AKWEYI TULENDA SOLOLWELA LUFIAULWISU?

Aweyi o Nzambi Kefiaulwisilanga Wantu?

Aweyi o Nzambi Kefiaulwisilanga Wantu?

Ntumwa Paulu wayikila Yave * vo “Nzambi a fiauzi wawonso, ona okutufiaulwisanga muna mpasi zeto zawonso.” (2 Korinto 1:3, 4) Nkand’a Nzambi ukutusikidisanga vo, yeto awonso lusadisu lwa Nzambi tuvuidi o mfunu ye ke vena sumbula ko kilenda kutubwila o Se dieto kuna zulu kalembi kutufiaulwisa.

Avo tuzolele vo Nzambi katufiaulwisa, diambu tufwete vanga. Aweyi o dotolo kalenda kuwukila avo kuele ku lupitalu ko? Amose wa ngunza wayuvula vo: ‘Nga wantu wole balenda kwau kangala kumosi lembi teka wizana?’ (Amose 3:3) Nkand’a Nzambi ukutuwondelelanga vo: “Nufinama Nzambi, oyandi mpe okunufinama.”—Yakobo 4:8.

Aweyi tulenda kadila ye ziku vo Nzambi okutufinama? Diantete, o Nzambi nkumbu miayingi kekutuvovesanga vo yeto kazolele sadisa. (Tanga e  babu kina va ndambu.) Dianzole, tuna ye kimbangi kia wantu bafiaulwiswa kwa Nzambi, tuka kuna nz’ankulu ye mu lumbu yeto.

O unu, wantu ayingi belombanga lusadisu kwa Nzambi. Ntinu Davidi mpe i diau kavanganga muna mpasi zandi. Lumbu kimosi wadodokela Yave muna mvovo emi: “Wá nding’a ndodokela zame, ovo itâtìdi.” Nga o Nzambi wamvana e mvutu e? Davidi wavova diaka vo: ‘Nsadisu kwa Yave, o ntim’ame uyangalele.’—Nkunga 28:2, 7.

YESU OFIAULWISANGA AWONSO BEDILANGA

Yave wa Nzambi wasola Yesu kimana kafiaulwisanga wantu. Muna salu yawonso Yesu kavewa kwa Nzambi, wasolwa mpe mu ‘wuka awana babudikw’e ntima’ yo “fiaulwisa awonso bedilanga.” (Yesaya 61:1, 2) Wauna diasakulwa, Yesu watokanena o wantu ana ‘bafuntukanga yo bimuka yo mazitu.’—Matai 11:28-30.

Yesu wafiaulwisa wantu muna malongi mandi ma ngangu, muna mpil’ambote kakadilanga yau ye muna wuka yimbevo yau. Lumbu kimosi nkwa wazi wadodokela Yesu mu mvovo emi: “Avo ozolele wo, umpelelesa.” O Yesu wau kamwene nkenda,  umvovese vo: “Nzolele wo! Velela kwaku.” (Maku 1:40, 41) Nkwa wazi owukilu.

O unu kiaki, o Mwan’a Nzambi ke kalanga diaka ova nza ko muna fiaulwisa konso muntu mu yeto. Kansi o Yave wa Se diandi, “Nzambi a fiauzi wawonso,” osadisanga mimbona mpasi. (2 Korinto 1:3) Yambula twavovela mpila yá kesadilanga o Nzambi muna kutufiaulwisa.

  • Nkand’a Nzambi. “Kadi mawonso mateka sonekwa, masonekwa muna kutulonga, kimana muna luzindalalu lweto ye muna lufiaulwisu lwa Sono, twakala ye vuvu.”—Roma 15:4.

  • Mwand’avelela wa Nzambi. Vava Yesu kafwa, ke vavioka mvu miayingi ko, nkutakani yawonso ya Akristu yavuvama. Ekuma? E kuma kadi ‘yakangadilanga muna vumi wa Yave ye muna lufiaulwisu lwa mwand’avelela.’ (Mavangu 9:31) O mwand’avelela, i sia vo, ngolo za Nzambi, i nkuma ulembi sukanga. Nzambi olenda wo sadila muna fiaulwisa o wantu vava bebwilwanga e mpasi za mpila mu mpila.

  • Sambu. Nkand’a Nzambi ukutuwondelelanga vo, “yambula ndomba zeno zazayiswa kwa Nzambi; o luvuvamu lwa Nzambi luna luviokele umbakuzi wawonso luyingila ntima mieno ye makani meno.”—Filipi 4:6, 7.

  • Akweto Akristu balenda kala se akundi akieleka ana bekutufiaulwisa muna ntangw’a mpasi. Paulu wayikila akwandi vo, “nto a lufiaulwisu” muna tangwa “kondwa ye mpasi.”—Kolosai 4:11; 1 Tesalonika 3:7.

Kansi olenda kiyuvula vo, aweyi ediadi divangamenanga? Yambula twafimpa e nona ya wantu bayikilu muna longi diviokele ana bawanana ye mpasi. Obakula vo Nzambi olungisanga o nsilu andi: ‘Nze mwana ofiaulwiswa kwa ngudi andi, i mfiaulwisa ikunufiaulwisa.’—Yesaya 66:13.

^ tini. 3 Yave i nkumbu a Nzambi nze una yasengomonwa muna Nkand’a Nzambi.