Tala mambu

Tala ntu mia mambu

Mbangi za Yave

Sola ndinga Kikongo

O teka mokena una ufwene mfunu kikilu dina

Kimbevo Kilembi Sasukanga Ill

Kimbevo Kilembi Sasukanga Ill

DOREENA wakendalala kwayingi vava yakala diandi Wesley, kamoneka ye kimbevo kia tomfo * muna kimbuta kia mvu 54. Madotolo bavova vo ngonde zakete kaka kezinga. Doreena wakudikila vo, “Kiakwikilanga mana yawanga ko, yakendalalanga kwayingi. Yamonanga nze diambu diadi kwa muntu ankaka diavangamene, ke kwa yeto ko. Kiakala yakubama ko”

Diankenda vo ke Doreena kaka ko omonanga e mpasi zazi. Konso muntu mu yeto olenda bakama kimbevo kilembi sasukanga. Diakiese mu zaya vo ndonga bekuyivananga mu sadisa muntu onwananga ye mpasi za kimbevo kilembi sasukanga. O lunga-lunga e mbevo salu kiampasi kikilu. Adieyi esi nzo balenda vanga muna fiaulwisa yo lunga-lunga mpangi au onwananga ye mpasi za kimbevo kilembi sasukanga? Aweyi o nsadisi a mbevo kalenda sundila e nkenda zandi ekolo kesadisanga mbevo? Avo dimonekene vo o mbevo se kefwa, adieyi o nsadisi andi kafwete vanga? Entete, yambula twasasila ekuma dinina diampasi o unu mu lunga-lunga e mbevo.

MPASI ZA LUMBU YETO

E ngangu za mawuku ye nlongo mivukisanga mioyo mia wantu. Muna tandu yavioka, kana nkutu muna nsi za mputu, o wantu ke bazinganga mvu miayingi ko. Bafwilanga muna yimbevo isambukilanga ye muna sumbula. O tupitalu ke twakala twayingi ko, ndonga ya wantu balungwa-lungwanga kwa esi nzo zau ye bafwilanga kuna nzo.

O unu, e ngangu za mawuku zisadisanga madotolo mu wuka yimbevo yangolo kimana e zingu kia wantu kialambuka. E yimbevo yavondanga wantu mu sazu muna mvu miavioka, owau mu wukwa ina. Kansi o mawuku mama ke mefokolanga yimbevo ko. O wantu bebakamanga yimbevo ya mpila mu mpila ikubatovolanga e nitu. Diampasi dikalanga mu lunga-lunga muntu una ye kimbevo kilembi sasukanga.

 Diankenda vo, wantu ayingi ke befwilanga kuna nzo ko, kansi kuna lupitalu. O unu, ndonga ke bazeye ko una muntu kefwilanga, akete kaka bamona kala muntu onwananga vitila kafwa. Mu kuma kia wonga yo lembi zaya mambu, o muntu osadisanga mbevo olenda bakama kwa wonga wasaka ekolo kesadisanga yitu kiandi vana mfulu a mayela. Nki kilenda kunsadisa mu sunda o wonga?

TEKA KUBAMA

Nze dina diabwila Doreena, wantu ayingi bekendalalanga kwayingi vava yitu kiau kebakamanga ye kimbevo kilembi sasukanga. Katula e ntokani, wonga ye ntantu, nki kilenda kusadisa wakala wakubama mu ntangwa yayi yampasi? Selo kimosi kia Nzambi wasamba vo: “Utuzayis’e mbadika tubadika lumbu yeto, twayibàkila ntim’angangu.” (Nkunga 90:12) Dianu vo, sambanga kwa Yave wa Nzambi kasonga una olenda ‘tangila e lumbu yaku’ kuna ngangu kimana wayangalela e zingu kumosi yo wantu ana ozolanga.

Divavanga vo watoma kubama. Avo mbevo osadisanga mu vova kena ye ozolele vo e diambu diadi diavuandilwa, dia ngangu mu kunyuvula kana nani obaka e nzengo vana fulu kiandi kele vo ke lenda diaka vova ko. O toma mokena yo mbevo mu zaya kana vo ozolele siwa mu lupitalu yovo sola mpil’a mawuku kazolele, dilenda sadisa esi nzo mu venga ntantani yo kuyitumba wau vo yau bafwete baka nzengo mu kuma kia mbevo. O teka mokena mu mpila yambote disadisa esi nzo mu vana lusadisu kwa mbevo. Nkand’a Nzambi uvovanga vo: “Vana valembi vangwa mfulu, tukanu twafunga.”—Ngana 15:22.

MPILA YAVANINA LUSADISU

E diambu diantete kafwete tokanena o nsadisi i fiaulwisa mbevo. O mbevo ofinamene fwa kafwete zayiswanga vo zolwa ke toma zolwanga, kena mpe yandi mosi ko. Aweyi olenda wo vangila? Tanga yovo yimbila kimana o mbevo kawa. Sola nkanda ye nkunga mia lufiaulwisu miyangidika o ntima andi. Mbevo zayingi bevuanga lufiaulwisu vava yitu yau bekubasimbanga muna koko yo kubavovesela kuna ngemba.

Diambote mu toma zaya kiwuntu kia konso muntu wizidi nkingula mbevo. E nsangu zisonganga vo: E matu ma mbevo ke mevita fwanga ko. Olenda yindula vo mbevo olele kwandi, kinga o matu mandi mu wá mena. Dianu vo, avo mbevo olele, kuvovi diambu ko dina kulendi vova ko avo wasikama kena.”

 Avo dilendakana, sambanga kumosi yo mbevo. Nkand’a Nzambi ukutuvovesanga vo, lumbu kimosi Paulu wa ntumwa ye akwandi mu mpasi bakala ye bayindula vo mioyo miau bevidisa. Nkia lusadisu balomba? Paulu wavovesa mpangi zandi vo: “Oyeno mpe nulenda kutusadisa muna ndodokela zeno.” (2 Korinto 1:8-11) E sambu kia nsi a ntima muna ntangw’a mpasi ye mayela mfunu kikilu kina.

ZAYA DIO VO LUFWA LUNA

Diankenda dikalanga mu zaya vo o mbevo fwa ke fwa. Kansi kutokani ko, kadi o lufwa ke twakubikilwa lo ko. Nzambi kavanga wantu ko kimana bafwanga. (Roma 5:12) Nkand’a Nzambi uyikilanga lufwa vo “mbeni.” (1 Korinto 15:26) Ozevo, ke diambi ko mu yindula lufwa lwa mbevo tusadisanga.

Kansi tu, oteka yindula diambu diadi dilenda sadisa esi nzo mu katula o wonga yo vanga mawonso balenda muna sadisa o mbevo. Muna babu “ Tumingu Twansuka twa Zingu” muna ye maka mambu mevangamanga kwa mbevo vitila kafwa. Dialudi vo ke mawonso ko mena mo mevangamanga kwa mbevo zawonso. Ke mevangamenanga mpe mu ndandani masonamene ko. Kana una vo i wau, mbevo zawonso bebwilanga maka mambu mayikilu muna babu kiaki.

Avo mbevo ofwidi, diambote mu bokela akundi ana bena yo luzolo lwa vana lusadisu. O nsadisi a mbevo ye yitu yandi bafwete voveswa vo e mpasi za mpangi au zifokokele, kena diaka mu mpasi ko. O Nzambi ona wavanga wantu okutuvovesanga vo “mafwa ke bazeye diambu ko.”—Kimpovi 9:5.

NSADISI WANSUKA

Ke tufwete veza lusadisu lwa muntu ko

O bunda e vuvu muna Nzambi i diambu diamfunu. Kansi ke muna ntangwa mayela kaka ko, kansi mpe muna kolo kia ntantu za lufwa lwa mbevo. Nzambi olenda sadila wantu akaka muna kuvana lusadisu muna mvovo ye mavangu. Doreena wavova vo: “Yalongoka vo kilendi veza lusadisu lwa muntu ko. O lusadisu luna twatambula lwatusivikisa kikilu. Omono yo nkaz’ame twazaya wo vo i Yave watuvovesanga vo, ‘Ngina yeno yanusadisa muna mpasi zeno.’ Kilendi dio vilakana nkutu ko.”

Kieleka, Yave wa Nzambi i nsadisi a nsuka muna mpasi zeto. Wau vo yandi watuvanga, otomene zaya mpasi ye ntantu zeto. Wakubama kena mu kutuvana lusadisu yo lukasakeso tuvuidi o mfunu muna zizidila e mpasi. Edi disundidi o mfunu, Nzambi wasia nsilu vo ke kolo ko ofokola e mvimba lufwa, awonso ana bafwa ye bena muna nyindu andi, okubafutumuna. (Yoane 5:28, 29; Lusengomono 21:3, 4) Muna ntanga yayina, wantu awonso bevutukila e mvovo mia Paulu wa ntumwa, oku vo: “E lufwa, e nsund’aku ayeyi? E lufwa, o manga aku aweyi?”—1 Korinto 15:55.

^ tini. 2 E nkumbu zasobwa.