Tala mambu

Tala ntu mia mambu

Mbangi za Yave

Sola ndinga Kikongo

O Zola Kwa Nzambi Nkia Nsambu Kulenda Kutwasila?

O Zola Kwa Nzambi Nkia Nsambu Kulenda Kutwasila?

E mpila ina Nzambi kavangila e nitu a muntu isadisanga muna kukiwuka. Avo muntu una yo vimpi wambote olwele, “vana vau e nitu iyantikanga vanga diambu muna wuka e mputa, yakala yanene yovo yakete.” (Johns Hopkins Medicine) E nitu ivanganga diambu muna kakidila o menga kimana malembi vaika kwayingi, muna sasula e mputa yo menesa nkanda vana fulu kilwele.

YINDULA EDI: Avo Mvangi eto wavanga e nitu zeto yo nkuma wa wuka e mputa, nga ke tulendi kwikila mu nsilu andi ko wa kutusadisa mu fokola e ntantu muna ntima? Ntozi a nkunga wasoneka vo: ‘Osasula ana babudikw’e ntima, yo kanga ndwadi zau.’ (Nkunga 147:3) Avo lukendalalu yovo ntantu zasaka una zau, adieyi dilenda kukwikidisa vo Yave osinga wuka e ndwadi zaku za ntima, kiakala owau yovo kuna sentu?

ADIEYI TULENDA LONGOKA MUNA NKAND’A NZAMBI MU KUMA KIA ZOLA KWA NZAMBI?

Nzambi wasia nsilu vo: “Kumoni wonga ko, kadi ngina yaku; kuvengozioka ko, kadi omono i Nzambi aku; ikuvamisa; elo, ikusadisa.” (Yesaya 41:10) Ndiona ozeye wo vo Yave zola kekunzolanga, luvuvamu lwa ntima kekalanga lwau. Okalanga mpe yo nkuma wa zizidila konso mpasi. Paulu wa ntumwa wayikila luvuvamu lwalu vo “luvuvamu lua Nzambi luna luviokele umbakuzi wawonso.” Paulu wakudikila vo: “Muna mambu mawonso ngina ye nkuma muna ndiona okunkumikanga.”—Filipi 4:4-7, 9, 13.

Nkand’a Nzambi ukutusadisanga mu kala ye lukwikilu muna nsilu mia Yave mu kuma kia zingu kia wantu kuna sentu. Kasikil’owu, e sono kia Lusengomono 21:4, 5 (kiyikilu mu lukaya lulende) kikutuzayisanga dina Yave kesinga vanga ye kuma tulenda kadila ye vuvu vo osinga dio vanga. Kivovanga vo:

  • “Okunguna mansanga mawonso” muna meso ma wantu. Yave ofokola e mpasi ye ntokani zeto zawonso, kana nkutu zina zivezwanga kw’akaka.

  • “Ofongele vana kunda” kuna zulu, o Ntinu a nsema wawonso osinga songa nkuma ye wisa kiandi muna fokola e mpasi yo kutuvana lusadisu tuvuidi o mfunu.

  • Yave wavova vo e nsilu miandi ‘miakwikizi ye ludi.’ Disongele vo Yave odianga e ndofi muna nkumbu andi vo osinga lungisa e nsilu miandi.

“‘Okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.’ Ndiona ofongele vana kunda ovovele vo: ‘Tala! Mvanga lekwa yawonso se yampa.’ Ovovele mpe vo: ‘Soneka, kadi e mambu mama makwikizi ye ludi.’”—Lusengomono 21:4, 5.

O nsema kumosi yo Nkand’a Nzambi usonganga kiwuntu kia Se dieto kuna zulu. Ekolo o nsema ukutusadisanga mu kala akundi a Nzambi, o Nkand’a Nzambi ukutuvananga e mboka vo: “Nufinama Nzambi, oyandi mpe okunufinama.” (Yakobo 4:8) Muna Mavangu 17:27 tutanganga vo: “Kavavukidi konso muntu omu yeto ko.”

Avo osidi e ngolo za toma zaya Nzambi, okala kikilu ye ziku vo ‘mfunu kekuvuanga.’ (1 Petelo 5:7) Nkia nluta tulenda vua avo tubundidi e vuvu muna Yave?

Badika e nona kia Toru wa mwisi Japão. Wasanswa kwa ngudi andi una vo Mbangi a Yave. Kana una vo i wau, wayikotesa mu buka kia yakuza, buka kia yimpumbulu kuna Japão. Wavova vo: “Yakwikilanga vo Nzambi kanzolanga ko. Yabanzanga vo Nzambi mono kavananga e tumbu vava wantu bafwanga, musungula e yitu yame.” Toru wavova vo muna kuma kia mpil’a zingu kanatanga, wakituka “nkwa nsoki ye ntim’ambadi.” Muna kuma kia ngindu zambi kakala zau, wavova vo: “Yazolanga vo yafwa muna kileke. Kansi vitila  yafwa, yakala ye kani dia vonda muntu wakala vo nkwa tunda lutila mono kimana yatoma zayakana kwa wantu.”

Kansi, vava Toru yo nkaz’andi Hannah, balongoka o Nkand’a Nzambi, wasoba e zingu kiandi ye makani mandi. Hannah wavova vo: “Yamona kikilu e ziku vo nkaz’ame wasoba kikilu.” Owau, Toru ovovanga ye ziku kiawonso vo: “Vena kikilu yo Nzambi ona okutuvuanga o mfunu. Ke zolanga ko vo wantu bafwa, ololokanga awana bevilukanga kikilu o ntima muna mavangu mau mambi. Otambanga o matu vava tukunzayisanga mambu mena vo kwa yandi kaka tulenda mo vova ye mambu mena vo yandi kaka olenda mo bakula. Ke kolo ko, Yave ofokola umpumbulu ye mpasi zawonso. Kana nkutu o unu, okutusadisanga mu mpila ina ke tuyindulanga ko. Okutuzolanga yo kutusadisa vava tukalanga twatovoka.”—Nkunga 136:23.

Nze una usonganga e nona kia Toru, o zaya vo ke kolo ko Nzambi ofokola e mpasi zawonso yo kunguna mansanga muna meso meto ke dikutuvananga kaka vuvu kia kusentu ko, kansi dikutusadisanga mpe mu kala ye zingu kiakiese owau. Kieleka, kana nkutu mu nza yayi yazala ye mpasi, o zola kwa Nzambi kulenda kutwasila nsambu zayingi.