Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | ADIEYI OLENDA VANGA AVO OFWIDILU?

Sunda Ntantu Zaku

Sunda Ntantu Zaku

Wantu malongi mayingi bevananga mu kuma kia diambu diadi, kansi ke malongi mawonso ko mena mambote. Muna bonga e nona, akaka balenda kuvovesa vo kudidi ko ngatu mona e ntantu. Akaka balenda kuvovesa vo ofwete dila yo vaikisa mawonso una mau mu ntima. Nkand’a Nzambi uvuidi malongi mena ngwizani ye ngangu za mawuku.

Muna nsi zankaka, ke diambote ko kwa mwan’a yakala kadila. Kansi, nga diambote mu mona nsoni za betomona kinsanga vana meso ma wantu e? Madotolo bevovanga vo o dila, i mpila yambote ya songela e ntantu. O songa lukendalalu dilenda kusadisa mu zizidila kana nkutu vo e ntantu zaku zayingi. O sweka lukendalalu dilenda kutwasila mpasi zayingi. Nkand’a Nzambi ke uyikamanga ngindu za sia ko vo, diambi mu dila. Yindula e nona kia Yesu. Wadila vana meso ma ndonga vava nkundi andi Lazaro kafwa, kana una vo wakala yo nkuma wafutumuna mafwa.—Yoane 11:33-35.

O funga makasi dilenda kala se mpila ya songela lukendalalu, musungula muna mambu ma kinsalukisa nze lufwa. Vena ye kuma yayingi ifilanga awana bafwidilu mu fwema mu sungula vava wantu bevovanga mambu makondwa mfunu mu kia muntu ofwidi. Yakala dimosi kuna África do Sul oyikilwanga vo Mike wavova vo: “Se diame wafwa vava yakala ye mvu 14. Muna lumbu kia luziku, o mpelo wavova vo Nzambi wantu ambote kavuidi o mfunu kuna zulu i kuma kekubabokelelanga. * Ediadi diamfungisa makasi, kadi o se dieto mfunu twamvuanga. Mvu 63 miviokele kala, yakinu kendalala.”

Adieyi tuvova mu kuma kia kuyitumba? Vava muntu kefwanga kuna kinsalukisa, o muntu ofwidilu olenda kwamanana yindula: ‘Ediadi ke diadi vangama ko kele vo mpanga owu y’owu.’ Dilenda kala vo nkumbu wansuka wakala yo muntu ofwidi, zonza lwa zonza. Avo i wau, ediadi dilenda sakisa e ntantu zaku.

Avo tumba okuyitumbanga yovo fwema, ke diambote ko mu sweka mambu mama. Kansi, mokena yo nkundi olenda kuwá, yandi olenda kusadisa mu zaya vo e diambu diadi divangamanga kwa awonso befwilwanga. Nkand’a Nzambi ukutuzayisanga vo: ‘O nkundi ozolanga ntangwa zawonso, i mpangi wawutuka mu kuma kia ntangwa mpasi.’—Ngana 17:17.

O nkundi ambote olenda kala yandi avo ofwidilu, i Yave wa Nzambi wa Mvangi eto. Ziula ntima aku kwa Nzambi muna sambu ‘kadi mfunu kekuvuanga.’ (1 Petelo 5:7) Nzambi osianga nsilu vo awonso bevanga wo, bevua “luvuvamu lwa Nzambi luna luviokele umbakuzi wawonso.” (Filipi 4:6, 7) Yambula mpe Nzambi kasadisa muna lufiaulwisu lutukanga muna Diambu diandi.  Soneka sono ilenda kufiaulwisa. ( Tala babu.) Olenda kotesa sono yayi muna ntu. Oyindula sono yayi dilenda kusadisa musungula vava okalanga ngeye mosi yovo vava dikalanga diampasi mu baka tulu.—Yesaya 57:15.

Jack una ye mvu 40 wafwilwa o nkento mu kimbevo kia câncer wavova vo, ezak’e ntangwa kinsona kemonanga. Kansi, e sambu kikunsadisanga. Jack wavova vo: “Vava isambanga kwa Yave, kimonanga diaka kinsona ko. Nkumbu miayingi tulu twame tuvempokanga muna mpimpa. Kansi, vava itanganga yo yindula sono kia Nkand’a Nzambi yo zayisa e ntokani zame kwa Nzambi muna sambu, ivuanga luvuvamu. Ediadi dikunsadisanga mu baka tulu.”

Ndumba mosi oyikilwanga vo, Vanessa, ngudi andi wafwa mu kuma kia kimbevo. Oyandi mpe e sambu kiansadisa. Wavova vo: “Muna ntangwa yampasi, ibokelanga e nkumbu a Nzambi yo betomona kinsanga. Yave owanga sambu yame yo kunkasakesa.”

Aludiki bekasakesanga awana befwilwanga bakivana mu sadisa akaka. Ovanga wo, dilenda kulula lukendalalu. (Mavangu 20:35) Ayingi muna Akristu bafwilwa, bemonanga vo osadisa akaka, dikubafiaulwisanga.—2 Korinto 1:3, 4.

^ tini. 5 Ediadi ke longi dia Nkand’a Nzambi ko. Nkand’a Nzambi kuma tatu uyikanga itwasanga lufwa.—Kimpovi 9:11; Yoane 8:44; Roma 5:12.