Tala mambu

Tala ntu mia mambu

Mbangi za Yave

Sola ndinga Kikongo

 NTU A DIAMBU WA FUKWA | EKUMA YESU KAMWENA MPASI YO FWA?

Nga Mavangama Kieleka?

Nga Mavangama Kieleka?

Muna mvu wa 33 wa tandu kieto, Yesu wa musi Nazarete wavondwa. Bamvunina mambu, banwanda yo kunkoma vana nti. Lufwa lwampasi kafwa. Kansi, Nzambi wamfutumuna, vioka lumbu 40 wavutuka kuna zulu.

E mvovo miami miatuka muna Nsangu Zambote za Sono ya Kingerekia iyikilwanga vo Luwawanu Lwampa. Nga mambu mama mavangama kieleka? E kiuvu kiaki kiamfunu kikilu. Kele vo mambu mama ke mavangama ko, lukwikilu lwa Akristu ke luna mfunu ko, e vuvu kia moyo a mvu ya mvu mpe muna Paradiso ndozi ankatu. (1 Korinto 15:14) Kansi, avo mambu mama mavangama kieleka, vena ye vuvu kiasikila mu kuma kia wantu, ngeye mpe olenda kala ye vuvu kiaki. Nga Nsangu Zambote mambu maludi yovo ve?

O LUSANSU ADIEYI LUSONGANGA?

Nswaswani ye savu, e Nsangu Zambote lusansu lwakieleka ziyikanga yo dedomona mambu ye sikididi kiawonso. Muna bonga e nona, e Nsangu Zambote ziyikanga nkumbu za fulu yayingi ina wantu balenda kingula o unu. Ziyikanga mpe wantu  ana bazinga kieleka, kana nkutu asoneki a tusansu bekwikidisanga e diambu diadi.—Luka 3:1, 2, 23.

Yesu oyikwanga mpe muna nkanda mia asoneki a tandu kiantete ye kiazole. * E mpila kavondelwa ngwizani ina ye mpila esi Roma bavondelanga wantu. Vana ntandu, alongoki a Yesu basoneka nkutu o vilwa bavanga. (Matai 26:56; Luka 22:24-26; Yoane 18:10, 11) Mawonso mama i ziku kisonganga vo asoneki a Nsangu Zambote mambu ma ziku basoneka mu kuma kia Yesu.

ADIEYI TUVOVA MU KUMA KIA LUFULUKU LWA YESU?

Kana una vo wantu ayingi betambulwilanga vo Yesu wazinga yo fwa, akaka bekatikisanga kana vo wafuluka kieleka. Kana nkutu antumwa, kuna lubantiku ke bakwikila muna lufuluku lwa Yesu ko. (Luka 24:11) Kansi, lukatikisu lwau lwafokoka vava yau ye alongoki akaka bamona Yesu mu ntangwa zaswaswana vava kafuluka. Lumbu kimosi, Yesu wamoneka kwa 500 za mbangi.—1 Korinto 15:6.

Kana una vo e mbeni zau bavavanga kubasia mu pelezo yo kubavonda, kuna unkabu wawonso alongoki basila lufuluku lwa Yesu umbangi kana nkutu kw’awana bamvonda. (Mavangu 4:1-3, 10, 19, 20; 5:27-32) Nga alongoki badi songa unkabu wau kele vo ke bakadi ye ziku ko vo Yesu wafuluka? Kieleka, o zaya vo Yesu wafuluka diavana unkabu kwa Akristu a tandu kiantete ye kwa Akristu o unu.

O lusansu lwa lufwa yo lufuluku lwa Yesu lwasonekwa muna Nsangu Zambote lusonganga ziku vo lwakieleka. Avo ofimpidi lo ye sungididi kiawonso, okala ye ziku vo mambu mama mavangama kikilu. E ziku kiaku kilenda kumama vava obakula ekuma mambu mama mavangamena. E longi dilende disasila e diambu diadi.

^ tini. 7 Tácito ona wawutuka muna mvu wa 55 wa tandu kieto. Wasoneka vo “Kristu ona wina vo i tuku dia nkumbu [Akristu], wamweswa mpasi zayingi kwa Pontio Pilato muna kolo kia luyalu lwa Tiberio.” Yesu mpe oyikwanga muna nkanda mia Suetônio (wa tandu kiantete), Josefo wa nsoneki a musi Yuda (wa tandu kiantete) yo Plínio, o Moço, wa nyadi a Bitunia (muna lubantiku lwa tandu kiazole).