Tala mambu

Tala ntu mia mambu

Mbangi za Yave

Sola ndinga Kikongo

Songanga e Nkenda kwa “Wantu a Mpila Zawonso”

Songanga e Nkenda kwa “Wantu a Mpila Zawonso”

VAVA Yesu kalonga alongoki andi una bafwete samunuina e nsangu zambote, wabalukisa vo ke ntangwa zawonso ko wantu bekala ye luzolo lwa kubawá. (Luka 10:3, 5, 6) Ediadi divangamanga mpe muna salu kieto kia umbangi. Wantu ankaka tuwanananga yau akwa ntima miambadi yovo akwa lulendo. Vava besonganga e fu yayi, dilenda kala diampasi mu songa nkenda yo kubasila umbangi.

Nkwa nkenda i ndiona omonanga e mambu ye mpasi akaka benuananga zau, okuyisianga vana fulu kiau yo vava kubasadisa. Kansi, adieyi divangama avo tuyambwidi fwila e nkenda awana tuwanananga yau muna salu kia umbangi? Tulenda vidisa o vema kweto, i sia vo, ke tukala diaka ye tima dia kubasila umbangi ko ngatu kubasadisa. Tulenda tezanesa vema kweto ye tiya. O tiya muna toma lema, tufwete vemunuanga. Diau dimosi, o vema kweto muna kumama, tufwete kala akwa nkenda.—1 Tesalonika 5:19.

Adieyi dilenda kutusadisa mu songa nkenda kana nkutu muna ntangw’ampasi? Yambula twabadika wantu tatu tulenda tanginina: Yave, Yesu yo Paulu wa ntumwa.

TANGININA NKENDA ZA YAVE

Se vioka mafunda ye mafunda ma mvu, wantu bevovanga luvunu mu kuma kia Yave. Kansi, Nzambi okwamanananga songa ‘walakazi kuna kwa ntokozi ye kwa wantu ambi.’ (Luka 6:35) Aweyi kesongelanga walakazi? Osonganga luzindalalu kwa wantu awonso. Yave ozolele vo “wantu a mpila zawonso” bavuluzwa. (1 Timoteo 2:3, 4) Kana una vo Nzambi omenganga mambu mambi, ozolanga wantu ye kazolele ko vo bafwa.—2 Petelo 3:9.

Yave ozeye wo vo Satana ovuidi ndekwa zayingi za vukumuna wantu kimana bakwikila muna luvunu. (2 Korinto 4:3, 4) Wantu ayingi belongwanga luvunu mu kuma kia Nzambi tuka muna kileke. Dianu vo, e mpila bayindulwilanga mambu dikitulanga dio se diampasi mu tambulwila e ludi. Kansi, Yave una ye tima dia kubasadisa. Aweyi tuzayidi wo?

Kasikil’owu, aweyi Yave kamona mu kuma kia wantu bazingilanga muna mbanz’a Nineve? Kana una vo akwa nsoki bakala, Yave wavovesa Yona vo: “Nga kimwena Nineve e nkenda ko e, e mbanz’ampwena; muna mwin’elundu dia wantu ye yazi yole ana ke bazeye nswaswani muna koko kwalunene yo koko kwalumonso ko.” (Yona 4:11) Yave wamwena wantu awana e nkenda, ana ke bazaya e ludi ko mu kuma kiandi. Muna kuma kiaki, watuma Yona kenda kubalukisa.

Yeto mpe tubadikilanga o wantu nze una Yave kekubabadikilanga. Mfunu bena. Nze Yave, tuna ye luzolo lwakubasadisa kimana balongoka ludi, kana nkutu vava dimonekanga vo ke betambulwila ludi ko.

TANGININA NKENDA ZA YESU

Nze Se diandi, Yesu wafwilanga wantu e nkenda “kadi bavua bembolwa yo bangikwa nze mameme makondwa mvungudi.” (Matai. 9:36) Yesu wabakula e kuma bamwenanga e mpasi zazi. Afidi au a mabundu babamwesanga e mpasi yo kubalonga luvunu. Kana una vo Yesu wazaya wo vo ayingi ana bayizanga wá malongi mandi ke bekituka alongoki andi ko, wabalonga mambu mayingi.—Maku 4:1-9.

Kuyoyi ko avo muntu katambulwidi ko muna nkumbu antete

Avo vabwidi diambu diampasi muna zingu kiau, wantu balenda soba yo tambulwila e ludi

Avo wantu ke bazolele wá nsangu zeto ko, tufwete vava bakula e kuma. Dilenda kala vo ngindu zambi bena zau mu kuma kia Nkand’a Nzambi yovo  mu kuma kia Akristu, kadi bemonanga vo akaka ana bekuyibadikilanga vo Akristu mambu mambi bevanganga. Akaka nanga vunua bevunuanga mu kuma kia mana tukwikilanga. Akaka balenda mona wonga wa vezwa kwa yitu yau yovo wantu ankaka muna zunga avo bamokene yeto.

Wantu ankaka nanga mambu mampasi bawanana mau mekubakendelekanga. Mpangi mosi ankento una muna salu kia kimisionario una ye nkumbu ya Kim, wavova vo muna zunga kiandi wantu ayingi bavuluka muna mvita yo vidisa lekwa yau yawonso. Ke bena ye vuvu kiasikila ko mu kuma kia kusentu. Muna kuma kia lukendalalu lwasaka, ke bebundanga diaka vuvu kwa muntu ko. Nkumbu miayingi, o wantu a zunga kiaki besimanga Mbangi za Yave kimana bayambula samuna e nsangu zambote. Lumbu kimosi, Kim wanuaniswa vava kakala muna salu kia umbangi.

Adieyi disadisanga Kim mu kwamanana songa e nkenda kana nkutu vava wantu bekumbangikanga? Osungamenanga e sono kia Ngana 19:11, kivovanga vo: ‘O nkwa ngangu ke funganga makasi mu nzaki ko.’ Vava keyindulanga e mpasi bawanana zau o wantu a zunga kiandi, ediadi dikumfilanga mu kubafwila e nkenda. Ke wantu awonso ko kewanananga yau bena vo akwa ntima miambadi. Muna zunga kiaki, vena yo wantu ana kekingulanga.

Tulenda kukiyuvula: ‘Kele vo kiazaya ludi ko, aweyi yadi vanga avo Mbangi za Yave bezidi kunsamunuina nsangu zambote?’ Kasikil’owu, aweyi twadi vanga kele vo luvunu lwayingi twawá mu kuma kia Mbangi za Yave? Nanga yeto mpe ke twadi tambulwila ko yo vava vo Mbangi za Yave batufwila e nkenda. Yesu wavova vo tufwete kadilanga ye akaka muna mpila ina tuzolele vo bakadila yeto. Muna kuma kiaki, tufwete vavanga bakula akaka yo kadila yau kuna luzindalalu, kana nkutu vava dikalanga diampasi.—Matai 7:12.

TANGININA NKENDA ZA PAULU

Paulu wa ntumwa wafwilanga wantu e nkenda, kana nkutu kw’awana bansianga e kitantu mu kuma kia salu kiandi kia umbangi. Ekuma? Kadi wasungamena una yandi kibeni kateka kala. Wavova vo: “Ntianguni a Nzambi yakala ye mbangiki ye nkwa nsoki. Kansi yafwilwa e nkenda kadi ku bubu yavangilanga wo yo kondwa lukwikilu.” (1 Timoteo 1:13) Paulu wazaya wo vo Yave yo Yesu bamfwila e nkenda. Wabakula ana bavavanga sima salu kiandi kadi yandi mpe diau dimosi kavanganga.

Ezak’e ntangwa, Paulu wawanananga yo wantu ana bakwikilanga muna malongi maluvunu. Aweyi kamona? Muna Mavangu 17:16, tutanganga vo vava kakala kuna Atenai, “wakendalala kikilu wau kamona e mbanza yazala ye teke.” Kansi, Paulu wasadila dina diankendeleka muna sila  umbangi kwa wantu. (Mavangu 17:22, 23) Wasoba e mpil’andi ya sila umbangi, wamokena mu mpila yaswaswana yo wantu a mpila mu mpila kimana ‘kavuluza akaka avo dilendakana.’—1 Korinto 9:20-23.

Vava tusilanga umbangi kwa wantu ke bezolanga wá nsangu zeto ko yovo ana bekwikilanga muna malongi ma luvunu, tulenda vanga dina Paulu kavanga. Tulenda sadila mana tuzeye mu kuma kiau mu kubasadisa bazaya e “nsangu zambote za diambu diambote.” (Yesaya 52:7) Mpangi ankento oyikilwanga vo Dorothy wavova vo: “Muna zunga kieto, wantu ayingi belongwanga vo Nzambi nkwa ntim’ambadi. Isanisinanga wantu awaya mu kuma kia lukwikilu lwalu muna Nzambi yo fila e sungididi kiau muna dina Nkand’a Nzambi uvovanga mu kuma kia zola kwa Yave ye nsilu miandi mia kusentu.”

‘KWAMANANA SUNDA O BI MUNA WETE’

Ekolo e mbaninu ifinamanga, tulenda vingila vo wantu akaka “besakisa vanga o bi.” (2 Timoteo 3:1, 13) Kansi, ke tufwete vidisa kiese kieto ko ngatu yambula fwila wantu e nkenda mu kuma kia mana bevanganga. Yave olenda kutuvana o nkuma muna ‘kwamanana sunda o bi muna wete.’ (Roma 12:21) Mviti a nzila mosi una ye nkumbu a Jessica wavova vo nkumbu miayingi kewanananga ye wantu bena vo akwa lulendo, ana bekutuvezanga kumosi ye nsangu tusamunanga. Wakudikila vo: “Ediadi dilenda yoyesa. Vitila yayantika e moko, isambanga kwa Yave yo kunlomba vo kansadisa mu badikila o wantu nze una kekubabadikilanga.” Ediadi disadisanga Jessica mu yindula una kalenda sadisila muntu vana fulu kia sia e sungididi muna ngindu za yandi kibeni.

Tukwamanana vava awana bazolele zaya e ludi

Kuna kulanda, akaka balenda tambulwila lusadisu lweto yo longoka e ludi

Tufwete mpe kasakesanga mpangi zeto vava tuvaikanga yau muna salu kia umbangi. Jessica wavova vo vava kevaikanga ye mpangi una ye ngindu zabendomoka mu kuma kia wantu, ovanganga mawonso mu lembi sia sungididi mu diambu diadi. Ovavanga mokenena mambu makiese nze vovela e nluta tubakanga muna salu kieto kia umbangi, kana una vo akaka ke betambulwilanga nsangu zeto ko.

Yave otomene wo zaya vo ezak’e ntangwa diampasi dikalanga kwa yeto mu samuna e nsangu zambote. Kansi otoma yangalalanga vava tutangininanga e nkenda zandi. (Luka 6:36) Kansi, Yave ke kwamanana songa nkenda ye luzindalalu ko kwa wantu a nza yayi. Tulenda kala ye ziku vo Yave ozeye e ntangwa ikwiza e mbaninu. Vitila e mbaninu yiza, e salu kieto kia umbangi kifwete salwa mu nzaki. (2 Timoteo 4:2) Muna kuma kiaki, yambula twakwamanana samuna e nsangu zambote kuna vema kwawonso yo songa e nkenda kwa “wantu a mpila zawonso.”