Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 18

Zola ye Unsongi Muna Nkutakani ya Kikristu

Zola ye Unsongi Muna Nkutakani ya Kikristu

“Nunataziana mazitu, i mpila yayi nulungisila nsiku a Kristu.”—NGAL. 6:2.

NKUNGA WA 12 Yave i Nzambi Anene

MANA TULONGOKA *

1. Mu nkia mambu mole tulenda kadila ye ziku?

YAVE WA NZAMBI otoma zolanga e selo yandi. Wasonga o zola kwa nkangu andi kuna nz’ankulu ye okwamanana zola e selo yandi. Ozolanga mpe unsongi. (Nku. 33:5) Muna kuma kiaki, tulenda kala ye ziku kia mambu mole: (1) Yave okendalalanga vava selo yandi bemweswanga e mpasi. (2) Yave ke yambula ko vo e selo yandi yakwamanana mweswa e mpasi, osinga tumba awana bekubamwesanga e mpasi. Muna kunku kiantete kia malongi yá mama, * twalongoka vo Nsiku una Nzambi kavana kwa Aneyisaele muna nzil’a Mose mu zola watuka. O Nsiku wau wakasakesanga o nkangu mu kala akwa unsongi, i sia vo, kadila ye wantu ankaka kuna unsongi, musungula awana ke balendi kuyitanina ko. (Nsi. 10:18) O Nsiku wau usonganga vo Yave otokanenanga kikilu e wete dia selo yandi.

2. Nkia yuvu tubakila e mvutu mu longi diadi?

2 O Nsiku a Mose wafokoka muna mvu wa 33 wa Tandu Kieto vava e nkutakani ya Kikristu yasikidiswa. Nga Akristu mu vonza badi kala wau vo ke bakala diaka yo nsiku ko watukanga muna zola yo siamisa unsongi? Ve. Akristu batambula nsiku wampa. Mu longi diadi, tuvovela ntete nki i nsiku wau. I bosi, tuzaya e mvutu za yuvu eyi: Ekuma tulenda vovela vo nsiku wau mu zola watuka? Ekuma tulenda vovela vo unsongi usiamisanga? Mun’owu wa nsiku wau, aweyi awana bena ye wisa bafwete kadilanga ye akaka?

 NKI I “NSIKU A KRISTU”?

3. Nki i “nsiku a Kristu” uyikwanga muna Ngalatia 6:2?

3 Tanga Ngalatia 6:2. Akristu ku nsi a “nsiku a Kristu” bena. Dialudi vo Yesu kasoneka nsiku ko mu kuma kia alandi andi. Kansi wabavana tuludiku, malongi ye nkanikinu. O “nsiku a Kristu” i mawonso kalonga o Yesu. Muna tini ilanda, tulongoka mambu mayingi malenda kutusadisa mu toma bakula o nsiku wau.

4-5. Aweyi o Yesu kalongelanga? Nkia ntangwa o Yesu kalonga?

4 Aweyi o Yesu kalongelanga? Entete, Yesu walonganga o wantu mu mana kavovanga. E mvovo mia Yesu mia nkuma kikilu. Walonganga e ludi mu kuma kia Nzambi, nsas’a zingu yo songa vo Kintinu kia Nzambi kaka kisinga fokola e mpasi za wantu. (Luka 24:19) Yesu walonganga mpe muna mbandu andi. Muna mpil’a zingu kiandi, Yesu wasonga kwa alandi andi una bafwete zingila.—Yoa. 13:15.

5 Nkia ntangwa o Yesu kalonga? Vava kasalanga e salu kiandi ova ntoto. (Mat. 4:23) Yesu walonga mpe alandi andi muna lumbu yalandila lufuluku lwandi. Kasikil’owu, wamoneka kwa buka kia alongoki, nanga tezo kia 500 ma wantu yo kubakanikina vo ‘bakitula wantu se alongoki.’ (Mat. 28:19, 20; 1 Kor. 15:6) Wau vo Yesu i ntu a nkutakani, wakwamanana longa alongoki andi kana nkutu vava kavutuka kuna zulu. Muna bonga e nona, muna mvu wa 96 wa Tandu Kieto, Kristu wakanikina Yoane wa ntumwa vo kakasakesa yo ludika Akristu akuswa.—Kol. 1:18; Lus. 1:1.

6-7. (a) Akweyi tulenda sololwela e malongi ma Yesu? (b) Adieyi divavuanga muna lemvokela o nsiku a Kristu?

6 Akweyi tulenda sololwela e malongi ma Yesu? Mayingi muna mambu Yesu kavova yo vanga vava kakala ova ntoto masonama muna nkanda yá mia Nsangu Zambote. Kansi e nkanda miankaka mia Sono ya Kingerekia ya Kikristu, mikutusadisanga mpe mu toma bakula una Yesu kebadikilanga e mambu. Awana basoneka e nkanda miami bavumunuinua kwa mwand’avelela ye bakala yo “nyindu a Kristu.”—1 Kor. 2:16.

7 Longi kwa yeto: Tulenda sadila malongi ma Yesu muna mambu mawonso ma zingu kieto.  Muna kuma kiaki, o nsiku a Kristu ufwete fila mawonso tuvanganga kuna nzo, kuna salu, kuna sikola ye muna nkutakani. Tulenda longoka o nsiku wau muna tanganga yo badika e Sono ya Kingerekia ya Kikristu. Muna lemvokela nsiku wau, divavanga vo twazingila e ngwizani ye tuludiku, malongi ye nkanikinu mina muna nkanda miami. Vava tulemvokelanga o nsiku a Kristu, tusonganga vo tulemvokelanga Yave wa Nzambi a zola, una vo i Nto a malongi mawonso ma Yesu.—Yoa. 8:28.

O NSIKU MU ZOLA WATUKA

8. Ayeyi i nkubilw’a nsiku a Kristu?

8 E nzo yatoma tungwa, ivavanga vo yakala ye nkubilwa yambote. Muna mpila yayi, awana bezingilanga mo mu luvuvamu bekala. Diau dimosi mpe, o nsiku ambote ufwete kala ye nkubilwa yambote kimana awana belemvokelanga wo bakala mu luvuvamu. O nsiku a Kristu una ye nkubilwa yambote, i sia vo, zola. Ekuma tulenda wo vovela?

Tulemvokelanga “nsiku a Kristu” vava tusonganga o zola kwa wantu ankaka (Tala e tini kia 9-14) *

9-10. Adieyi o zola kwafilanga Yesu mu vanga? Aweyi tulenda kuntanginina?

9 Diantete, o zola kwafilanga mawonso Yesu kavanganga. E nkenda yovo walakazi i sinsu kia zola. E nkenda zafilanga Yesu mu longa o wantu, wuka ambevo, dikila mimfwa-nzala yo fula mafwa. (Mat. 14:14; 15:32-38; Maku 6:34; Luka 7:11-15) Kana una vo ntangwa ye ngolo diavavanga, Yesu wasianga e nsatu za wantu ankaka vana fulu kiantete. Vana ntandu a mawonso, Yesu wasonga o zola vava kavana moyo andi muna wete dia wantu ankaka.—Yoa. 15:13.

10 Longi kwa yeto: Tulenda tanginina e mbandu a Yesu muna sianga e nsatu za wantu ankaka vana fulu kiantete. Tulenda mpe kuntanginina muna fwilanga wantu a zunga kieto e nkenda. Vava e nkenda zikutufilanga mu samuna yo longa e nsangu zambote, tusonganga vo nsiku a Kristu tulemvokelanga.

11-12. (a) Adieyi disonganga vo Yave otokanenanga e wete dieto? (b) Aweyi tulenda tanginina o zola kwa Yave?

11 Diazole, Yesu watangininanga o zola kwa Se diandi. Vava kakala ova ntoto, Yesu wasonga vo Yave otokanenanga e wete dia asambidi andi. Walonga vo konso muntu mu yeto mfunu kena vana meso ma Se dieto kuna zulu. (Mat. 10:31) Avo meme diavila divilukidi o ntima yo vutuka muna nkutakani, Yave okuntambulanga ye kiese kiawonso. (Luka 15:7, 10) Yave wasonga o zola kwandi wau kavana Mwan’andi se kimenga kia lukûlu muna wete dieto.—Yoa. 3:16.

12 Longi kwa yeto: Aweyi tulenda tanginina o zola kwa Yave? (Ef. 5:1, 2) Imosi muna mpila tulenda wo vangila i badikilanga mpangi zeto vo mfunu bena. Avo ‘meme diavila’ divutukidi kwa Yave, tufwete toma kuntambula. (Nku. 119:176) Tusonganga vo tuzolanga mpangi zeto vava tusadilanga ntangwa ye ngolo zeto muna kubasadisa, musungula vava bevuanga lusadisu o mfunu. (1 Yoa. 3:17) Tulemvokelanga nsiku a Kristu vava tusonganga o zola kwa wantu ankaka.

13-14. (a) Landila e sono kia Yoane 13:34, 35, nkia nkanikinu Yesu kavana kwa alandi andi? Ekuma o nkanikinu wau winina wampa? (b) Aweyi tulenda lemvokela o nkanikinu wampa?

13 Diatatu, Yesu wakanikina alandi andi vo basonganga o zola kwakieleka. (Tanga Yoane 13:34, 35.) O nkanikinu wa Yesu wampa kadi uvovanga vo twasonga o zola mu mpila ina ke yasikidiswa ko muna Nsiku a Mose, i sia vo, tufwete zola mpangi zeto nze una Yesu katuzolela. Ediadi divavanga vo twasonga nzol’amvevo. * Tufwete zolanga mpangi zeto lutila  una tukuyizolelanga. Tufwete kubazolanga yamu tezo kia vana moyo eto muna wete diau, nze una Yesu kavanga.

14 Longi kwa yeto: Aweyi tulenda lemvokela e nkanikinu wampa? Muna sianga e nsatu za mpangi zeto va fulu kiantete. Ke tuzolele kaka vanga mambu mampwena ko nze vana mioyo mieto, kansi tuzolele mpe vanga mambu makete muna wete dia mpangi zeto. Kasikil’owu, tulemvokelanga o nsiku a Kristu vava tusadisanga anunu mu kwenda muna tukutakanu, vava tuyambulanga maka mambu tuzolanga muna yangidika wantu ankaka yovo sadila e lumbu yeto ya vundu muna sadisa awana bebwilwanga e sumbula. Tulenda mpe sadisa kimana e nkutakani eto yakala se fulu kina konso muntu kalenda mwena e kiese ye luvuvamu.

NSIKU USIAMISANGA UNSONGI

15-17. (a) Aweyi e mavangu ma Yesu mesongelanga o unsongi wandi? (b) Aweyi tulenda tanginina Yesu?

15 O mvovo “unsongi” usadilwanga muna Nkand’a Nzambi, usongele vo vanga mana Nzambi kebadikilanga vo mambote yo lembi sia mpambula. Ekuma tulenda vovela vo nsiku a Kristu unsongi usiamisanga?

Yesu wazitisanga akento yo kadila yau kuna ngemba, musungula ana bavezwanga (Tala e tini kia 16) *

16 Diantete, badika una e mavangu ma Yesu masongelanga o unsongi wandi. Muna lumbu ya Yesu, afidi a nsambil’a Kiyuda bamenganga awana bakala vo ke Ayuda ko, bayimwenanga vo basundidi Ayuda ana ke bakota sikola za Kiyuda ko. Ke bazitisanga mpe akento ko. Kansi, Yesu wakadilanga yo wantu awonso kuna unsongi, lembi sia mpambula. Wayambulanga vo esi zula yankaka ana bakwikilanga muna yandi bakituka alandi andi. (Mat. 8:5-10, 13) Wasamunanga e nsangu zambote kwa wantu awonso lembi sia mpambula, kiakala amvuama yovo asukami. (Mat. 11:5; Luka 19:2, 9) Yesu kabangikanga akento ko. Kansi, wazitisanga akento yo kadila yau kuna ngemba musungula ana bavezwanga kwa wantu ankaka.—Luka 7:37-39, 44-50.

17 Longi kwa yeto: Muna tanginina Yesu, ke tufwete sianga mpambula ko muna mpila tukadilanga yo wantu. Tufwete samunanga e nsangu zambote kwa wantu awonso bazolele zo wá kiakala nkia dibundu besambilanga, amvuama yovo asukami. Mpangi z’akala belandanga e mbandu a Yesu vava bezitisanga akento. Vava tuvanganga e mambu mama, tusonganga vo nsiku a Kristu tulemvokelanga.

18-19. Adieyi Yesu kalonga mu kuma kia unsongi? Adieyi tulenda longoka muna malongi mandi?

18 Diazole, badika dina Yesu kalonga mu kuma kia unsongi. Yesu walonga e nkanikinu miadi sadisa alandi andi mu kadila ye akaka kuna unsongi. Kasikil’owu, yindula o nkanikinu usonganga una tulenda kadila ye akaka. (Mat. 7:12) Yeto awonso tuzolanga vo akaka bakadila yeto kuna unsongi. Muna kuma kiaki, yeto mpe tufwete kadilanga ye akaka kuna unsongi. Avo tuvangidi wo, nanga dikubafila mu kadila yeto kuna unsongi. Kansi, adieyi tuvova avo akaka ke bekadilanga yeto kuna unsongi ko? Yesu walonga mpe alandi andi mu kala ye vuvu vo Yave osinga ‘lungisa awana bekumbokelanga fuku yo mwini.’ (Luka 18:6, 7) E mvovo miami mina se nsilu: O Nzambi eto una vo nkwa unsongi omonanga e mpasi tunuananga zau mu lumbu yayi yambaninu. Osinga twasa unsongi muna ntangwa kasikidisa.—2 Tes. 1:6.

19 Longi kwa yeto: Avo tulende nkanikinu mina Yesu kalonga, tukadila ye akaka kuna unsongi. Avo mpasi tumweswanga mu nza yayi ya Satana yakondwa unsongi, tulenda fiaulwiswa mu zaya wo vo Yave osinga twasa unsongi.

 AWANA BENA YE WISA AWEYI BAFWETE KADILANGA YE AKAKA?

20-21. (a) Aweyi awana bena ye wisa bafwete kadilanga ye akaka? (b) Aweyi o yakala kalenda songela nzol’amvevo kwa nkaz’andi? Aweyi o se kafwete kadilanga yo wan’andi?

20 Mun’owu wa nsiku a Kristu, aweyi awana bena ye wisa bafwete kadilanga ye akaka? Wau vo zola i nkubilw’a nsiku wau, awana bena ye wisa bafwete zitisanga awana bena kuna nsi a wisa kiau yo kadilanga yau kuna zola. Bafwete sungamenanga vo Kristu ozolanga vo twasonganga o zola muna mawonso tuvanganga.

21 Kwa esi nzo. O yakala kafwete zolanga o nkaz’andi nze ‘una Kristu kezolelanga e nkutakani.’ (Ef. 5:25, 28, 29) Muna tanginina e nzol’amvevo a Kristu, o yakala kafwete sianga e nsatu za nkaz’andi vana fulu kiantete ke mu nsatu za yandi kibeni ko. Diampasi dikalanga kwa akala akaka mu songa e nzol’amvevo kwa akazi au. Nanga mu nzo yakondwa zola ye unsongi basansukila. Kiaki i kuma besongelanga e fu ina vo ke yambote ko. Kansi muna lemvokela o nsiku a Kristu, bafwete vanga e nsobani. Vava yakala kesonganga e nzol’amvevo, diasazu dikalanga kwa nkaz’andi mu kunzitisa. O se ona otoma zolanga wan’andi ovenganga kubakendeleka muna mvovo ye mavangu mandi. (Ef. 4:31) Kansi, okubasanisinanga yo kubasonga o zola. Ediadi disadisanga o wana mu kala ye kiese yo luvuvamu. Diasazu mpe dikala kwa wana mu kunzitisa yo kumbunda e vuvu.

22. Landila e sono kia 1 Petelo 5:1-3, e “mameme” kwa nani mavuilu? Aweyi akuluntu bafwete kadikilanga ye mameme?

22 Muna nkutakani. Akuluntu bafwete sungamenanga vo “mameme” ke yau ko bavuidi mo. (Yoa. 10:16; tanga 1 Petelo 5:1-3.) E mvovo “kambi dia Nzambi,” “ndose a Nzambi” ye “vua dia Nzambi” misungamesanga  akuluntu vo mameme kwa Yave mavuilu. Ozolele vo mameme mandi masongwa o zola ye ngemba. (1 Tes. 2:7, 8) Avo akuluntu basongele o zola yo toma lungisa e mbebe au, betondakana kwa Yave, e mpangi zau mpe bekubazola yo kubazitisa.

23-24. (a) Adieyi akuluntu bafwete vanga avo mpangi ovolele sumu diampwena? (b) Adieyi akuluntu bafwete sungamenanga vava betalanga e diambu?

23 Adieyi akuluntu bafwete vanga avo muntu ovolele sumu diampwena? E mbebe au yaswaswana ye mbebe ina afundisi ye akuluntu a Isaele bakala yau. Awana basolwa ke bakala kaka ye wisa kia fundisa mambu ma mwanda ko kansi mpe ntantani ye nkanu. Kansi mun’owu wa nsiku a Kristu, akuluntu bena ye mbebe yatadila kaka mambu ma mwanda. Akuluntu bazeye wo vo Yave wavana mbebe kwa ayadi mu fundisa awana bevolanga e nkanu. Ayadi mpe bena ye wisa kia baka e nzengo za tumba awana bevolanga e nkanu yovo kubasia muna pelezo.—Roma 13:1-4.

24 Nkia mbebe bena yau akuluntu avo mpangi muna nkutakani ovolele sumu diampwena? Besadilanga e Nkand’a Nzambi muna fimpa e diambu yo baka e nzengo. Besungamenanga vo zola i nkubilw’a nsiku a Kristu. O zola kufilanga akuluntu mu kukiyuvula: Nkia lusadisu balenda vana kwa ampangi muna nkutakani ana bavangwa e mbi? Muna kuma kia ndiona wavanga e mbi, o zola kufila akuluntu mu kukiyuvula: Nga ovilukidi kieleka o ntima? Adieyi tulenda vanga muna kunsadisa kavutulwisa e ngwizani andi yo Yave?

25. Nkia kiuvu tuvanina e mvutu muna longi dilanda?

25 Dia matondo wau tuna ye nsiku a Kristu. Avo yeto awonso tuvangidi e ngolo za lemvokela o nsiku wau, disadisa kimana e nkutakani yakala se fulu kina konso mpangi kalenda mwena vo mfunu kena, ozolwanga yo taninua. Kansi, twakinu zingila mu nza yazala ye “wantu ambi” ana besakisanga “vanga o bi.” (2 Tim. 3:13) Tufwete kwamanana kala alungaladi. Aweyi e nkutakani ya Kikristu ilenda tanginina unsongi wa Nzambi vava betalanga e diambu ditadidi vukana yo wan’akete? E longi dilanda divana e mvutu za kiuvu kiaki.

NKUNGA WA 15 Kembelela Mwan’antete a Yave!

^ tini. 5 E longi diadi ye malongi mole melanda mena muna buka kia malongi yá mevovela e kuma tulenda kadila ye ziku vo Yave i Nzambi a zola ye unsongi. Ozolele vo nkangu andi wasongwanga unsongi. Yave ofiaulwisanga awana bemweswanga e mpasi mu nza yayi yambi.

^ tini. 1 Tala e longi dina yo ntu a diambu vo “Zola ye Unsongi Kuna Isaele Yankulu,” muna Eyingidilu dia Fevelelo dia 2019.

^ tini. 13 MVOVO MISASILU: E nzol’amvevo ikutufilanga mu sia e nsatu za wantu akaka vana fulu kiantete. O zola kwaku kukutufilanga mu sadisa wantu ankaka kana nkutu vava dikalanga diampasi mu vanga wo.

^ tini. 61 FWANISWA: Yesu otalanga nkento ansona wafwilwa mwan’andi mosi kaka. E nkenda zafila Yesu mu fula mwan’a toko.

^ tini. 63 FWANISWA: Yesu odianga kuna nzo a Mfarisi mosi una ye nkumbu a Simone. Nkento mosi, nanga nkembi, osukwidi e malu ma Yesu muna mansanga mandi, okungwini mo muna nsuki zandi yo kusa mo mazi. Simone otumbidi o nkento ndioyu, kansi Yesu untanini.