Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 25

Yesu Ofwididi Nkwa Wazi e Nkenda yo Kunwuka

Yesu Ofwididi Nkwa Wazi e Nkenda yo Kunwuka

MATAI 8:1-4 MAKU 1:40-45 LUKA 5:12-16

  • YESU OWUKIDI NKWA WAZI

Ekolo Yesu ye alongoki andi yá bekwenda longinge muna ‘masambilu muna Ngalili yawonso,’ e nsangu za masivi mandi zimwanganene mwawonso. (Maku 1:39) E nsangu zazi zilweke kwa nkwa wazi ozingilanga mu vata dimosi. Luka una vo ngang’a mawuku unyikidi vo “wabilam’o wazi.” (Luka 5:12) E kimbevo kiaki avo kisakidi, malembe-malembe kizatunanga e yikwa ya nitu.

Wau vo wazi wandi usakidi, kalendi kala diaka vamosi yo wantu ankaka ko. Vana ntandu, avo omwene muntu okwizanga ku sambu diandi, muna lembi kunsambukisa o wazi, kafwete kaza vo, “wafunzuka, wafunzuka.” (Fuka 13:45, 46) Adieyi kevanga o nkwa wazi ndioyo? Ofinamene Yesu, umfukamène yo kundodokela: “E Mfumu, avo ozolele wo, umpelelesa.”—Matai 8:2.

Muntu ndioyu, lukwikilu kena lwau muna Yesu! O wazi watoma kumvangula! O Yesu adieyi kevanga? Kele vo ongeye wakala vana, adieyi wadi vanga? Yesu umfwididi e nkenda, olambwidi koko kwandi yo kunsimba. Yesu umvovese vo: “Nzolele wo! Velela kwaku.” (Matai 8:3) Kana una vo diampasi kwa akaka mu kwikila, o nkwa wazi osasukidi vana vau.

Diakiese kikilu mu yalwa kwa Yesu, wa ntinu a nkuma ye nkenda! E mpila kasadisidi o nkwa wazi isonganga e ziku vo, vava Yesu keyala e nza yawonso, olungisa ungunza wa Nkand’a Nzambi uvovanga vo: “Omwena nsukami yo nkondami e nkenda, yo vuluza mioyo mi’akondami.” (Nkunga 72:13) Kieleka, Yesu olungisa luzolo lwandi lwa sadisa awonso bena mu mpasi.

Sungamena dio vo, vitila Yesu kawuka nkwa wazi, e salu kiandi kiatunta e sungididi kia wantu. Owau, o wantu bewá diaka e nsangu za diambu dia sivi kavangidi. Kansi, Yesu kazolele ko vo wantu bakwikila kaka muna yandi mu kuma kia nsangu bewá. Kadi ozeye ungunza uvovanga vo, ‘ke wisa nding’andi muna nzila ko,’ i sia vo, ke kuyitundidika ko. (Yesaya 42:1, 2) Muna kuma kiaki, Yesu ovovese nkwa wazi vo: “Kuzayisi dio kwa muntu ko, kansi wenda kuyisonga kwa nganga, watambika lukau luna Mose kakanikina.”—Matai 8:4.

Kieleka, avo oyinduidi e kiese kia muntu ndioyo owukilu mu mpil’a sivi, obakula vo ke dilendakana ko kwa yandi mu lembi zayisa diambu diadi kw’akaka. Wau kavaikidi, wele yo mwanganesa e nsangu mwawonso kaviokele. Ediadi diwokese kiese yo luzolo lwa wantu. Ozevo, konso mbanza kakotele o Yesu, wantu awonso bantonene. Muna kuma kiaki, wele vundila kuna makanga, kuna kukondelo wantu. Kana una vo i wau, wantu batukidi mwawonso bezidi kwa yandi kimana kabalonga yo kubawuka.