Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 44

Yesu Ovuvikidi e Tembwa Muna Mbu

Yesu Ovuvikidi e Tembwa Muna Mbu

MATAI 8:18, 23-27 MAKU 4:35-41 LUKA 8:22-25

  • YESU OVUVIKIDI E TEMBWA MUNA MBU A NGALILI

E lumbu kiawonso Yesu salu kiayingi kakedi kiau. Vava o kuma kufwidi, ovovese alongoki vo: Tukatuka mwamu Kafanau, “tusauka kweto kuna simu.”—Maku 4:35.

Kuna este ya mbu a Ngalili, i kwina e zunga kia Angerasa. E zunga kiaki kiyikilwanga mpe vo Dakapole. Kana una vo Dekapole i mbanza za toma zitisanga fu ya kisi nsi kia Mingerekia, Ayuda ayingi mpe bezingilanga mo.

E nkatuk’a Yesu muna Kafanau yizayakene kwa nkangu, kadi vena ye nzaza zayingi bawananene zau. (Maku 4:36) Kieleka, o nkangalu wau ke wandá ko. O Mbu wa Ngalili yanga kwandi, dina ye kilometa 21 muna lambuka ye kilometa 12 muna vonga. Kansi, o mbu wau wazala yo mavuku.

Kana una vo Yesu muntu alunga, oyoyele mu kuma kia salu kasadidi mu lumbu kiamvimba. Muna kuma kiaki, vava e nzaza ilondokele, Yesu olambalele kwandi kuna konko kia nzaza, osidi o ntu andi vana mfika, i bosi olele kwandi.

Kana una vo ankaka muna antumwa bazeye toma nata e nzaza, o nkangalu wau wampasi kikilu ukala. Wau vo Mbu a Ngalili wazungwa kwa miongo, o maza mandi malakuka mekalanga. Nkumbu miayingi, vava mupepe utukanga muna miongo yo wandama muna maza ma Mbu, tembwa kiangolo utwasanga. I diau mpe divangama owau. Vana vau tembwa kiangolo kinikukini, mavuku mayantikidi wandama muna nzaza. “E nzaza iyantikidi zala ye maza, e sumbula kibaluakìdi.” (Luka 8:23) Vo i Yesu, wakinu kwandi ku tulu!

Wau vo nkumbu miayingi bewanananga ye tembwa yangolo muna mbu, anati a nzaza bavavidi singika e nzaza. Kansi o nkumbu wau e tembwa kisundidi e ngolo. Wau bamwene wonga, basikamese Yesu, oku vo: “E Mfumu, utuvuluza, se tufwa!” (Matai 8:25) Alongoki bamwene wonga wafwila muna maza.

Vava Yesu kasikamene, ovovese antumwa vo: “Ekuma nwinina yo wonga yeno akwa filukwikilu?” (Matai 8:26) I bosi, Yesu ovovese tembwa ye mbu vo: “Dingalala! Kal’e pi-i!” (Maku 4:39) E tembwa kiangolo kidingalele, o mbu uvuvamene. (Maku yo Luka vava basoneka lusansu lwalu, entete basonga vo Yesu ovuvikidi e tembwa mu mpil’a sivi, i bosi basonga o kondwa kwa lukwikilu kw’alongoki.)

Yindula una alongoki bamwene! Bamwene una tembwa kiangolo kidingalele, e mavuku mampwena malembamene. Bamwene kikilu o wonga. Bavovanene vo: “Ondioyu ozevo nani? E tembwa ye mbu nkutu unlemvokele.” Basaukidi kuna simu dia mbu mu luvuvamu. (Maku 4:41–5:1) E nzaza zankaka zikedi yau nanga zivutukidi kuna simu dia este.

Dialufiaulisu mu zaya vo Mwan’a Nzambi una ye wisa muna nsema! Vava kesia e sungididi kiandi kiawonso ova ntoto muna Kintinu kiandi, wantu awonso mu luvuvamu bekala, ke vebwa diaka sumbula ko!