Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 23

Mavangu Manene ma Yesu Muna Kafanau

Mavangu Manene ma Yesu Muna Kafanau

MATAI 8:14-17 MAKU 1:21-34 LUKA 4:31-41

  • YESU OVAIKISI NKUYA

  • YESU OWUKIDI KÔ WA PETELO

Yesu obokele alongoki ayá, Petelo, Andere, Yakobo ye Yoane kimana bayambula baka e mbizi, bakala se abaki a wantu. Muna lumbu kia Vundu, yau awonso bele muna sambilu dia Kafanau. Yesu olongele muna sambilu, o nkangu usivikidi diaka e mpila andi ya longela. Nswaswani ye asoneki, Yesu ubalongele ndong’a nkwa wisa.

Mu lumbu kiaki, mu wanukinu muntu wina ye nkuya. Ekolo bena muna sambilu, o muntu ndioyo kazidi mu nding’a ngolo vo: “Nkia diambu tuna diau yo ngeye, e Yesu wa nkwa Nazarete? Nga wizidi kutufwasa e? Ntomene kuzaya, u Mveledi a Nzambi!” Yesu otumbidi nkuya wina muna muntu, oku vo: “Butama! vaika muna yandi.”—Maku 1:24, 25.

Mu kolo kiaki, o mwand’a usafu umbwisidi vana ntoto, unzakamese yo boka mu ndinga ngolo. O nkuya uvaikidi muna yandi ‘lembi kumvanga diambu.’ (Luka 4:35) Awonso bena muna sambilu basivikidi. Bayuvuidi, “Nkia diambu diadi? . . . Muna wisa kavovesele e mianda miansafu, minlemvokele.” (Maku 1:27) Ka lukatikisu ko vo, e nsangu za sivi diadi zimwanganene mu Ngalili yawonso.

Wau bavaikidi muna sambilu, Yesu ye alongoki andi bele kuna nzo ya Simone yovo Petelo. Bawene o kô wa Petelo wa nkento wayela, ngianduk’a ngolo kena yau. Badodokele Yesu kansadisa. Dianu vo, Yesu wele vana kena, unsimbidi mu koko, umvumbwidi vana mfulu. Vana vau osasukidi, oyantikidi sadila Yesu ye alongoki andi, nanga muna kubalambila madia.

Muna nkokela, nkangu a mbanza yawonso utwese e mbevo zau ku nzo a Petelo. Vana vau, awonso bazele vana mwelo a nzo. Ekuma? Wukwa bazolele. Ozevo, ‘awonso bena ye mbevo za mpila mu mpila babatwese vana kena. Otensekele moko mandi muna yau awonso, ubasaswidi.’ (Luka 4:40) Kieleka, Yesu ubasadisi muna yimbevo yau yawonso nze una diasakulwa. (Yesaya 53:4) Ovevuele nkutu awana bena mu wisa kia nkuya. Vava mianda miambi mivaikidi, bakazidi vo: “Ongeye u Mwan’a Nzambi.” (Luka 4:41) Yesu ubatumbidi, kayambwidi ko vo bakwanana vova. Bazeye wo vo Yesu i Kristu. Kansi Yesu kazolele ko bayivunginika vo Nzambi a ludi besadilanga.