Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 72

Yesu Otumini 70 lwa Alongoki Benda Sila Umbangi

Yesu Otumini 70 lwa Alongoki Benda Sila Umbangi

LUKA 10:1-24

  • YESU OSOLELE 70 LWA ALONGOKI, UBATUMINI BENDA SILA UMBANGI

Tufinamene ku mfoko a mvu wa 32 wa tandu kieto, se mvu ntatu miviokele kala tuka Yesu kavubilwa. Oyandi ye alongoki andi ke kolo ko batukidi kuna Nkinzi a Saba kuna Yerusaleme. Dilenda kala vo bakinu kwau omu zunga ina lukufi. (Luka 10:38; Yoane 11:1) Yesu ngonde sambanu kasidi zau mu salu kiandi kia sila umbangi, lumbu yayingi kaviokese muna Yuda yovo kuna simu dia Nkoko a Yodani muna mvivu a Perea. E zunga kiaki mpe kifwete silwa umbangi.

Vava kiavioka e Nduta ya mvu wa 30 wa tandu kieto, Yesu wayenda sila umbangi kuna Yuda mu ngonde zayingi yo lwaka yamuna Samaria. I bosi, vava kiafinamanga e Nduta ya mvu 31 wa tandu kieto, Ayuda bakala muna Yerusaleme bazola vo bavonda Yesu. O Yesu mvu mosi ye ndambu kalongela kuna node ya Ngalili ya Yuda. Muna kolo kiaki, ndonga yakituka se alandi andi. Muna Ngalili, Yesu olongele ntumwa zandi, i bosi ubatumini yo kubakanikina vo: “Nulonga vo: ‘E Kintinu kia zulu kifinamene.’” (Matai 10:5-7) Owau muna Yuda, Yesu ovangidi e nkubika za sila umbangi mu buka.

Muna yantika e salu kiaki, Yesu osolele 70 lwa alongoki, ubatumini nwole-nwole. Ozevo, buka 35 ya ateleki a Kintinu ivangamene muna zunga kina ye “mbongo yayingi, kansi e nsadi mike.” (Luka 10:2) Bafwete kwenda viti muna fulu ina Yesu ke kwenda. Yau 70 bafwete wuka mbevo yo samuna e nsangu zina Yesu kesamunaga.

Alongoki ke batuminu ko benda longela muna masambilu. Yesu ubavovese benda muna nzo za wantu. Ovovele vo: “Konso nzo ina nukota, nuteka vova vo: ‘Yambul’o luvuvamu lwakala omu nzo yayi.’ Avo nkwa luvuvamu wina mo, o luvuvamu lueno lusàla yandi.” Nkia nsangu besamuna? Yesu ubavovese vo: “Nubavovesa vo: ‘E Kintinu kia Nzambi kinufinamene.’”—Luka 10:5-9.

O nkanikinu una Yesu kavene kwa 70 lwa alongoki wafwanana ye una kavana kwa ntumwa 12 muna mvu wavioka. Olukisi alongoki vo ke wantu awonso ko bekunutambula. Kansi e ngolo zau zikubika e nzila kimana vava o Yesu wa Mfumu au kekwiza, akwa luzolo lwambote bekala ye tima dia monana yandi yo wá malongi mandi.

Ke kolo kiayingi ko, e buka 35 ya alongoki a Kintinu bavutukidi kwa Yesu. Bavovele kuna kiese, oku vo: “E Mfumu, e nkuya mpe mitusakalele muna nkumbu aku.” Yesu oyangalele muna nsangu zazi zambote, ubavovese vo: “Mbwene Satana osangumukini nga nsemo kuna zulu. Inuvene wisa kia diatakesa nioka ye nkutu.”—Luka 10:17-19.

Muna mvovo miami Yesu osongele alongoki andi vo mambu mayingi ma mpasi besunda, dina nze yau bediatakesa nioka ye nkutu. Vana ntandu, bafwete kwikila vo muna lumbu ikwiza Satana oyingwa kuna zulu yo vetwa ova ntoto. Yesu osadisi mpe 70 lwa alongoki andi bazaya e diambu disundidi o mfunu. Ovovele vo: “Ke numoni kiese ko wau vo e mianda minusakalele, kansi numon’e kiese wau vo e nkumbu zeno zisonamene kuna zulu.”—Luka 10:20.

Yesu otomene yangalala ye osanisini Se diandi vana meso ma ndonga wau kavene wisa kwa alongoki andi bena vo alembami. I bosi, Yesu ovilukidi kwa alongoki andi, ubavovese vo: “Mansambu o meso mana mamwene oma numonanga. Kadi inuvovese wo vo, ngunza zayingi ye atinu bazola mona oma numwene, kansi ke bamona mo ko, bazola wá oma nuwidi, kansi ke bawá mo ko.”—Luka 10:23, 24.