Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 76

Yesu Odidi Muna Nzo ya Mfarisi

Yesu Odidi Muna Nzo ya Mfarisi

LUKA 11:37-54

  • YESU OTUMBIDI AFARISI AKWA KIVUNINA

O Yesu wau kena muna Yuda, otondele kenda dila muna nzo ya Mfarisi. Dilenda kala vo madia ma mwini kedia, ke ma nkokela ko. (Luka 11:37, 38; tezanesa ye Luka 14:12.) Vitila badia, Afarisi besukulanga moko mau yamuna kongonia landila e fu kiau. Kansi o Yesu kavangidi wo ko. (Matai 15:1, 2) O sukula moko yamuna kongonia ke dikululanga Nsiku a Nzambi ko, kadi ke diau ko o Nzambi kevavanga.

Mfarisi osivikidi wau kamwene vo Yesu kalende fu kiaki ko. Yesu obakwidi dio ye ovovele vo: “Yeno Afarisi nuvelelesanga kuna mbazi a kopo ye longa, kansi omo kati nwazala ye loko yo bi. Nu mazowa! Ndiona wavang’oku mbazi, nga ke yandi ko wavang’omu kati e?”—Luka 11:39, 40

O sukula moko vitila muntu kadia, ke diambi kwandi ko, kansi okuyivunina kwa Afarisi i diambu diambi. Afarisi ye akaka belandanga e fu kia sukula moko yamuna kongonia, kansi ke bevelelesanga ntima miau ko muna bi. Dianu vo, Yesu ubavovese vo: “Nuvana yina yakati se tukau twa nkenda, ozevo lekwa yeno yawonso iveleleswa.” (Luka 11:41) Ediadi dialudi. Kadi o muntu kafwete vanina kuna zola kwa ntima, kansi ke mu luzolo lwa kuyisonga kw’akaka ko vo yandi nkwa unsongi.

Ediadi ke disongele ko vo Afarisi ke bekayanga ko. Yesu ovovele diaka vo: “Nuvananga tini kia kumi kia mana-nsusu, penganone ye mvûdi yawonso, kansi nubembolanga unsongi yo zola kwa Nzambi! I mambu mama nufwete vanga, lembi bembola mambu mankaka.” (Luka 11:42) Nsiku a Nzambi uvovanga vo, o muntu kafwete vana tini kia kumi kia mbongo a mpatu andi. (Nsiku 14:22) I diau bavanganga muna mante ye pengamone, i makaya masadilwanga muna kudikila o ntomo muna madia. Afarisi bakala ye fu kia vana tini kia kumi kia mbongo zazi. Kansi adieyi tuvova mu kuma kia mambu masundidi o mfunu malombwanga muna Nsiku, nze unsongi ye kala nkwa ziku vana ndose a Nzambi? —Mika 6:8.

Yesu ovovele diaka vo: “Tâtu kwa yeno Afarisi! e kuma kadi, nuzolanga kunda yantete muna masambilu, yo kayiswa muna mazandu! Tâtu kwa yeno! e kuma kadi, nuna nze ziami ilembi moneka, o wantu beviokela vo, ke bazeye wo ko!” (Luka 11:43, 44) O wantu balenda tá masakuba muna ziami yayi yo kituka se bafunzuka. Yesu osadidi e nona kiaki muna songa vo, Afarisi bazala yo usafu, kansi ke umonekanga kwa wantu ko.—Matai 23:27.

Muntu mosi otomene zaya Nsiku a Nzambi ovutwidi vo: “E Nlongi, e mpova yoyo ovovele, i yeto mpe otiangwini.” O muntu ndioyo kafwete bakula vo Afarisi ke bena sadisa nkangu ko. Yesu ovovele vo: “Tâtu kwa yeno mpe nutomene zaya e Nsiku! Kadi yeno nukomekenanga wantu mazitu mampasi muna nata, kansi yeno kibeni, kana nkutu i nlembo eno mosi, ke nuviakanesa wo muna mazitu ko. Tâtu kwa yeno! kadi nutunganga e ziami ya ngunza zavondwa kwa mase meno.”—Luka 11:45-47.

Mazitu mana Yesu kavovele i tusansu twa Afarisi ye mpila ina besasilanga o Nsiku. Kadi oyau mpasi bekudikilanga muna zingu kia nkangu. Bekomekenanga o wantu balanda o tusansu twau, e diadi mpasi ditwasanga kwa nkangu. Akulu au bavonda ngunza za Nzambi, tuka muna Abele ye awana banlandila. Owau ziami betunganga mu kuma kia ngunza, bazolele songa vo ngunza bezitisanga, kinga fu ya akulu au betangininanga. Bazolele nkutu vonda nguz’a Nzambi isundidi. Yesu ovovele vo Nzambi ofundisa e ntandu kiaki. Vava kiavioka 38 ma mvu, e diambu diadi diavangama muna 70 wa tandu kieto.

Yesu ovovele vo: “Tâtu kwa yeno nutomene zaya o Nsiku! e kuma kadi, nukatwidi nsabi a zayi. Yeno kibeni ke nukotele mo ko, nukakididi ana bakotelenge mo!” (Luka 11:52) Afarisi yau badi sasila e Diambu dia Nzambi kwa nkangu, kansi mukakidila bena o nkangu balembi zaya Diambu dia Nzambi ngatu bakula dio.

Afarisi ye asoneki, adieyi bavangidi? Vava o Yesu se ke kwenda kwandi, Afarisi ye asoneki bamfungidi makasi, bayantikidi kunyuvula yuvu yayingi. Ke bayuvuidi ye kani dia zaya ko. Kansi bazolele vo Yesu kavova diambu dina bekumbakila.