Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 80

Mvungudi Ambote ye Mpaka za Mameme

Mvungudi Ambote ye Mpaka za Mameme

YOANE 10:1-21

  • YESU OVOVELE MVUNGUDI AMBOTE YE MPAKA ZA MAMEME

O Yesu wau kelonganga muna Yuda, ovovele diambu dimosi ditomene zayakana kwa wantu: mvungudi ambote ye mpaka za mameme. Kansi muna yingana kekubavoveselanga. Nanga Ayuda basungamene mvovo mia Davidi: ‘Yave i Mvungudi ame, kikondwa má ko. Okumbubika muna madilu ma titi ya nkunzu.’ (Nkunga 23:1, 2) Muna nkunga wankaka Davidi wavovesa Ayuda vo: “Nwiza twafukamèna Yave wa Mvangi eto. Kadi yandi i Nzambi eto, oyeto tu nkangu a madilu mandi.” (Nkunga 95:6, 7) Kieleka, vava Aneyisaele bakala kuna nsi a Nsiku, batezaneswanga ye kambi dia mameme.

“Mameme” mama muna “mpaka” mekalanga, kadi muna kangu dia Nsiku a Mose bawutukila. O Nsiku wakala nze lupangu, lwabavambulanga muna mavangu mambi ma nkangu ke miakala kuna nsi a nsiku wau ko. Akaka muna Aneyisaele bamwesa kambi dia Nzambi e mpasi. Dianu o Yesu kavovele vo: “Kieleka, kieleka, inusamunwini vo, ona olembi kotela muna mwelo a mpak’a mameme, kakotela kwankaka, yandi i mwivi ye nsanzi. Kansi, ndiona okotela muna mwelo, yandi i mvungudi a mameme.”—Yoane 10:1, 2.

O wantu bewanga e moko kiaki bayindwidi vo, o Yesu nanga wantu ana bakiyikilanga vo Masia yovo Kristu kena vovela. Oyau bena nze mivi ye asanzi. O nkangu ke bafwete landa mvunginiki miami ko. Bafwete landa “mvungudi a mameme.” I bosi, Yesu ovovele vo:

“Nemwelo okunziulwila, o mameme mewa nding’andi. Obokela mameme mandi muna nkumbu yo fila mo kuna mbazi. Avo ovaikisi mawonso, okubavita kuna ntwala, o mameme mekunlanda, e kuma kadi mazeye nding’andi. Ke malendi landa nzenza ko, tina kaka mekuntina, e kuma kadi ke mazeye nding’a nzenza ko.”—Yoane 10:3-5.

Muna mvu miavioka, Yoane wa Mvubi, ona wakala nze nemwelo, wavova vo Yesu i muntu ona mameme mama mena kuna nsi a Nsiku bafwete landa. Mameme mankaka kuna Ngalili ye mwamu Yuda, mazayididi e nding’a Yesu. Akweyi o Yesu kekubanata? Nkia nluta bevua wau bekunlanda? Akaka wau bawidi kingana kiaki bayantikidi katikisa, kadi ‘ke babakwidi ko dina kabavovese.’—Yoane 10:6.

Yesu ubavovese vo: “Kieleka, kieleka, inusamunwini vo, mono i mwelo a mameme. Awonsono ana bayizila muna nkumbu ame, mivi ye asanzi; muna diadi o mameme ke mabawila ko. Mono i mwelo; konso ona okotela omu mono, ovuluzwa, okota yo vaika, osolola madilu.”—Yoane 10:7-9.

Yesu diambu diampa kavovele. O wantu bewanga e moko kiaki bazeye wo vo, Yesu ke mwelo a kangu dia Nsiku ko, kadi diankulu kikilu. Kinga Yesu edi kazolele vova vo, mameme ‘kevungulanga’ mekota muna mpaka yankaka. Nkia nluta bevua?

Wau kasasidi kiyekwa kiandi, Yesu ovovele vo: “Omono yayiza kimana nwavua o moyo, nwavua wo emvimba. Mono i mvungudi ambote; o mvungudi ambote oyekola moyo andi muna wete dia mameme.” (Yoane 10:10, 11) Yesu wateka fiaulwisa alongoki andi vava kavova vo: “Ke numoni wonga ko, yeno fikambi-kambi, kadi i luzolo lwa Se dieno kanuvan’e Kintinu.” (Luka 12:32) Kieleka, o mameme mena muna “fikambi-kambi” i mau o Yesu kekotesa muna mpaka yampa, kimana ‘mavua moyo, mavua wo emvimba.” Ekwe nsambu mu kala muna kambi diadi!

Kansi o Yesu kafokwele moko kiandi ko. Ovovele diaka vo: “Mameme mankaka mpe ngina mau, mana ke ma mpaka yayi ko; itwasa mo mpe omwamu, mewa nding’ame, mekala e kambi dimosi, mvungudi mosi.” (Yoane 10:16) “Mameme mankaka” o Yesu kavovele, ke mena muna “mpaka yayi ko.” Ozevo, vena ye mpaka yankaka, yaswaswana ye “fikambi-kambi,” mameme ma mpaka yayi i mau mesinga vua e nsambu za Kintinu. Mameme mankaka ke bena ye vuvu kimosi ko ye mameme mena mu fikambi-kambi. Kansi mameme mawonso mena muna mpaka zau zole, mevua e nluta mia kiyekwa kia Yesu. Yandi kibeni Yesu ovovele vo: “I kuma o Se kanzolèle, kadi iyekola moyo ame.”—Yoane 10:17.

Ayingi vana vena e ndonga bavovele vo: “Nkuya kena wau, olaukidi.” Ankaka mu wá bena ye sungididi kiawonso, kadi bazolele landa Mvungudi Ambote. Bavovele vo: “E mvovo miami ke mia nkwa nkuya ko. O nkuya, nga lenda temona meso ma mpofo e?” (Yoane 10:20, 21) Kondwa lukatikisu, basungamene muntu wawutuka mpofo ona Yesu katemona meso.