Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 110

Lumbu kia Nsuka kia Yesu Muna Tempelo

Lumbu kia Nsuka kia Yesu Muna Tempelo

MATAI 23:25–24:2 MAKU 12:41–13:2 LUKA 21:1-6

  • YESU OSENZEKELE DIAKA MFUMU ZA MABUNDU

  • TEMPELO FWASWA-IFWASWA

  • NKENTO WA NSUKAMI WAFWILA YAKALA OVENE LUKAU LWANDI

Muna lumbu kia nsuka o Yesu kezidi muna tempelo, osenzekele diaka luvunu lwa asoneki ye Afarisi. Ubayikidi vo mpuki. Ubavovesele muna kingana, oku vo: “Nuvelelesanga kuna mbazi a kopo ye longa, kansi omo kati nwazala ye loko yo kondwa volo. U Mfarisi a mpofo, teka velelesa e kopo ye longa muna kati, i bosi ovelelesa dio mpe kuna mbazi.” (Matai 23:25, 26) Afarisi betokanenanga e nkinzi mia luveleleso ye mpw’au vana meso ma ndonga, kansi ke betokanenanga kimuntu kiau kia kati ko yo lembi velelesa e ntima miau.

O luvunu lwau lumonekanga mpe vava betunganga e ziami ya angunza yo kusa yo e tinta. Kansi, wauna o Yesu kavovele, oyau “i mbongo y’awana bavonda angunza.” (Matai 23:31) Dialudi, kadi bavangidi mawonso mu vava vonda Yesu.—Yoane 5:18; 7:1, 25.

I bosi, Yesu ovovele diambu dilwakila mfumu za mabundu avo ke bavilukidi ntima ko. Ovovele vo: “Nu nioka, nu wan’a mpidi, aweyi nutinina e mfundis’a Ngeena?” (Matai 23:33) E Yenga dia Hinome dina vana ndambu, i fuku diyokelwanga e titi, e kiaki i nona kiambote muna songa o lufwasu lwa kwele mvu lulwakila asoneki ye Afarisi, kadi wantu ambi kikilu.

Alongoki a Yesu yau bekala “ngunza, akwa ngangu ye alongi.” Aweyi akaka bekubavanga? Yesu ovovese mfumu za mabundu vo: “Ankaka muna yau [alongoki ame] nukubavondela vana nti, ankaka nukubatubila matadi muna masambilu meno yo kubabangika muna mavata mawonso, omu ntu mieno i mukala o menga ma wantu awonso ansongi mana mabunguka ova ntoto, tuka muna menga ma Abele wa nsongi yamuna menga ma Zakariya . . . ona nwavonda.” Yesu ubalukisi vo: “Kieleka inuvovese vo, tumbu yayi yawonso ikwiza muna mbandu yayi.” (Matai 23:34-36) E diambu diadi diavangama muna mvu wa 70 wa ntadu kieto, vava makesa ma Roma mafwasa Yerusaleme, mafunda ye mafunda ma Ayuda bafwa.

O Yesu vava kayinduidi o lufwasu lwalu, e ngindu zandi zitokanene. Ovovele kuna nkenda zawonso vo: “E Yerusaleme, e Yerusaleme, on’ovondanga e ngunza, yo tubila awana katuminu o matadi—nkumbu nkwa yazolele konka o wan’aku nze una e nsusu ikonkelanga o wan’andi kuna nsi a mave! Kansi, oyeno ke nwazola wo ko. Tala, e nzo eno ibembwelo kwa Nzambi.” (Matai 23:37, 38) O wantu bawidi e mvovo miami bena kiyuvula kana nkia “nzo” o Yesu kavovele. Nga ovovele tempelo yampwena ina muna Yerusaleme, ina o Nzambi ketaninanga?

Yesu ovovele diaka vo: “Inuvovese vo, tuka owau ke nukumbona diaka ko yavana nuvova vo, ‘Nkwa nsambu ndiona okwizila muna nkumbu a Yave!’” (Matai 23:39) E miami i mvovo mia ungunza mina muna Nkunga 118:26: “Nkwa nsambu ndion’okwizila muna nkumbu a Yave: Tusambulwidi muna nzo a Yave.” Kieleka, vava e tempelo yayi ifwaswa, ke muntu ko okwizila mo muna nkumbu a Nzambi.

Owau, Yesu wele kuna sambu dia nkela za tukau muna tempelo. O wantu tukau bekobolanga muna nkela zazi zakete. Yesu omwene Ayuda bevananga tukau, mvuama “zayingi zitubidi mo nzimbu.” I bosi Yesu omwene mpe nkento wafwilwa yakala “otubidi mo mpata miole.” (Maku 12:41, 42) Dialudi vo, Yesu ozeye wo vo Nzambi otomene yangalela o lukau lwa nkento ndioyo.

Yesu obokele alongoki andi, ubavovese vo: “Kieleka inuvovese vo kina katubidi o nkento ndioyu wa nsukami, wafwilwa yakala, kiviokele awonso batubidi nzimbu muna nkela za tukau.” Ekuma kavovele wo? Yesu osasidi vo: “Kadi yau awonso zina zisuvidi i batubidi, kansi oyandi, muna usukami wandi, i katubidi yawonso kena yau, yawonso ya zingu kiandi.” (Maku 12:43, 44) E ngindu yo mavangu ma nkento ndioyo maswaswana kikilu ye ma mfumu za mabundu.

Wau vo e lumbu kia 11 kia Nisani kilueke ku mfoko, Yesu ovaikidi muna tempelo, ekiaki i lumbu kiandi kiansuka. Mosi muna alongoki andi umvovese vo: “E Nlongi, tala mfunu mia matadi ye nzo zazi!” (Maku 13:1) Dialudi, matadi matungilwa e yaka ya tempelo mampwena kikilu, i mau mesimbanga e tempelo kimana yazinga mvu miayingi. Nanga olenda sivika vava Yesu kavovele vo: “Nga omwene nzo zazi zampwena? Ke vesala tadi vana ntandu tadi ko ovava, dina dilembi kunkumunwa.”—Maku 13:2.

Vava kavovele mambu mama, Yesu ye ntumwa zandi basaukidi Ndimb’a Kiderone, batombokele kuna Mongo a Olive. Una kumosi ye ntumwa yá—Petelo, Andere, Yakobo ye Yoane. Vana ntandu a mongo, antumwa mu toma mona bena e tempelo yampwena kuna yanda.