Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 125

Yesu Oneto kwa Anasi, I Bosi kwa Kayafa

Yesu Oneto kwa Anasi, I Bosi kwa Kayafa

MATAI 26:57-68 MAKU 14:53-65 LUKA 22:54, 63-65 YOANE 18:13, 14, 19-24

  • YESU ONETO KWA ANASI ONA WAKALA NGANG’AMBUTA

  • MBAZI A NKANU BAVANGIDI MFUNDU WA LUVUNU

O Yesu okangilu nga kimpumbulu, bele yandi kwa Anasi. Yandi wakala ngang’ambuta vava Yesu kakala nleke kalonganga muna Tempelo. (Luka 2:42, 47) Kuna kwa landa, akaka muna wana Anasi bakituka nganga zambuta, kansi owau o nzitu andi Kayafa, yandi osalanga se Ngang’ambuta.

Yesu wau kena muna nzo a Anasi, Kayafa okutakese wantu 71 besadilanga muna Mbazi a Nkanu yayi, muna ye Ngang’ambuta ye awana basala kala e salu kiaki.

Anasi oyuvuidi Yesu “oma ma alongoki andi ye malongi mandi.” Yesu umvutwidi vo: “Vana meso ma wantu yavovelenge. Ntangwa zawonso yalongelenge muna masambilu ye muna tempelo, muna mukutakananga Ayuda awonso, kisidi vovela diambu ku sweki ko. Ekuma ungiuvulwidi? Yuvula awana bawidi mana yabavovesenge.”—Yoane 18:19-21.

Mfumu a makesa otelamene vana ndambu, owende Yesu e mbata vana luse, ovovele vo: “Nga i wau ofwete vutulwila ngang’ambuta e?” Yesu umvutwidi vo: “Avo diambu diambi mpovele, sila dio umbangi; kansi, avo diambote mpovele, ekuma ungwandidi?” (Yoane 18:22, 23) I bosi, Anasi okaniniki vo banata Yesu kwa Kayafa wa nzitu andi.

Owau, e Mbazi a Nkanu yawonso ikutakene, ngang’ambuta, akuluntu a nkangu ye asoneki. Bakutakene muna nzo ya Kayafa. Muna nsiku au, ke diansongi ko mu fundisa o muntu muna fuku wa nkinzi a Nduta. Kansi, bakutakene muna lungisa makani mau mambi.

Yau awonso ngindu zambi bena zau. Vava Yesu kafula Lazaro, Mbazi a Nkanu babaka e nzengo za vonda Yesu. (Yoane 11:47-53) Ke vavioka lumbu yayingi ko, mfumu za mabundu bavuanda e mfulu kimana bavonda Yesu. (Matai 26:3, 4) Kana nkutu vitila e diambu diadi diabwa, o Yesu wazengelwa kala e tumbu kia lufwa.

Vitila bavuanda mfulu, Nganga za Mbuta ye akaka besadilanga kuna Mbazi a Nkanu, bavavidi o wantu bata e kimbangi kia luvunu kimana oyau batumba Yesu. Basolwela wantu ayingi, kansi e kimbangi kiau ke kiasikila ko. Kuna mfoko, vezidi mbangi zole, bavovele vo: “Oyeto tunwidi kevovanga vo, ‘Bangula ibangula e tempelo yayi yavangilwa mu moko, muna lumbu tatu itunga yankaka yalembi vangilwa mu moko.” (Maku 14:58) E kimbangi kiau mpe ke kiasikila ko.

Kayafa oyuvuidi Yesu vo: “Nga kuvutula diambu ko e? Nkia diambu diadi basididi kimbangi wantu awaya?” (Maku 14:60) Yesu obutamene kwandi ekolo mbangi zazi bevovanga mfundu mia luvunu. Kayafa wa Ngang’ambuta ovavidi e ndekwa zankaka.

Kayafa ozeye wo vo, diampasi kwa Ayuda mu kwikila muntu ovovanga vo yandi i mwan’a Nzambi. Ke kolo ko, vava Yesu kayikidi Nzambi vo Se diame, Ayuda bavavidi kumvonda, kadi bavovele vo, “uyisidi e betela yo Nzambi.” (Yoane 5:17, 18; 10:31-39) Kayafa wau kazeye e ngindu za Ayuda, okomekene Yesu, umvovese vo: “Idisisi e ndofi muna nkumbu a Nzambi amoyo, utuvovesa kana vo ngeye i Kristu wa Mwan’a Nzambi!” (Matai 26:63) Dia ludi vo, Yesu otambulwidi vo yandi i Mwan’a Nzambi. (Yoane 3:18; 5:25; 11:4) Avo kavangi wo diaka ko, dilenda moneka nga yandi ovakwidi nkalu vo, ke mwan’a Nzambi ko ngatu Kristu. Muna diadi, Yesu ovovele vo: “I mono; numona Mwan’a muntu ovuende kuna koko kwalunene kwa nkuma yo kwiza yo matuti ma zulu.”—Maku 14:62.

Muna kuma kiaki, Kayafa otiazwini e mvuatu miandi okazidi vo: “Otiangwini Nzambi! Nkia kimbangi diaka tuvuidi o mfunu? Owau nuwidi o lutiangu lwandi. Adieyi nubenze?” Bavutwidi vo: “Lufwa lumfwanukini.”—Matai 26:65, 66.

Bayantikidi veza Yesu yo kunwanda nkome. Akaka banwende e mbata vana luse yo kuntawudila mete. Bafukidi o luse lwandi yo kunwanda e mbata, bamvovese kuna luvezo lwawonso vo: “Sakula! Nani uwende?” (Luka 22:64) O Mwan’a Nzambi ovezelo yo fundiswa e mfundisa yakondwa unsongi muna fuku.