Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 136

Vana Kumu dia Mbu a Ngalili

Vana Kumu dia Mbu a Ngalili

YOANE 21:1-25

  • YESU OMONEKENE VANA MBU A NGALILI

  • PETELO YE NTUMWA ZANKAKA BAFWETE DIKILA MAMEME

Muna fuku wansuka kaviokesa ye ntumwa zandi, Yesu wabavovesa vo: “Vava ifulwa, ikunuvita kuna Ngalili.” (Matai 26:32; 28:7, 10) Owau, ndonga muna alongoki andi bele kuna Ngalili. Nkia diambu bendele?

Lumbu kimosi, Petelo wavovesa kwa ntumwa sambanu vo: “Ngiele baka mbizi zame za maza.” Yau sambanu bamvutwidi vo: “Tuzolele kwenda yaku.” (Yoane 21:3) O fuku wawonso, yau ke babaki mbizi. O kuma se kukiá, Yesu wizidi vana mbel’a mbu, kansi oyau ke babakwidi ko vo i Yesu ndioyo. Yesu ubabokele, oku vo: “Aleke, nga má kia dia luna kiau e?” Bamvutwidi vo: “Nkatu!” Ubavovese vo: “Nutuba e konde kuna lunene lwa nzaza, nwabaka e mbizi.” (Yoane 21:5, 6) Ke balendele tunta e konde ko, kadi mbizi zayingi babakidi.

I bosi, Yoane ovovese Petelo vo: “I Mfumu ndioyo!” (Yoane 21:7) Vana vau, Petelo ovuete kinkutu kiandi, kadi vula kavula kio mu kuma kia lowa e mbizi. Ukitubidi muna mbu, otele mansa (saba) yakuna seke, tezo kia meta 90. Alongoki ankaka bezi landi malembe-malembe, batuntidi e konde diazala ye mbizi.

Vava batombokele kuna seke, bamwene “tiya twa makala ye mbizi zitensamene vo ye mbolo.” Yesu ubavovese vo: “Nutwasa ezaka mbizi zina nubakidi owau.” Petelo utuntidi e konde dina ye mbizi zanene, 153! Yesu ubavovese vo: “Nwiza dia.” Kansi, ke mosi ko muna yau okasumukini kanyuvula vo: “Ongeye u nani e?” kadi babakwidi vo i Yesu. (Yoane 21:9-12) Eyayi i mboneka yantatu o Yesu kamonekene kwa alongoki va fulu kimosi.

Yesu ovene mbolo ye mbizi kwa konso muntu muna yau, badidi. I bosi, otadidi e mbizi babakidi, oyuvuidi vo: “E Simone wa mwan’a Yoane, nga olutidi kunzola ke mu yayi ko e?” Nga disongele vo Petelo otoma zolanga e salu kia baka mbizi ke mu salu kavewa kwa Yesu ko e? Petelo ovutwidi vo: “Ingeta, e Mfumu, ozeye wo vo zola ikuzolanga.” Yesu umvovese vo: “Dikila wan’ame a mameme.”—Yoane 21:15.

Yesu oyuvuidi diaka vo: “E Simone wa mwan’a Yoane, nga zola okunzolanga e?” Nanga wau kasivikidi, Petelo ovutwidi Yesu yo ntim’a mosi vo: “Ingeta, e Mfumu, ozeye wo vo zola ikuzolanga.” Yesu umvene mvutu zau zimosi: “Vungula mameme mame.”—Yoane 21:16.

Yesu unyuvuidi mu nkumbu wantatu vo: “E Simone wa mwan’a Yoane, nga zola okunzolanga e?” Owau Petelo nanga okiyuvuidi kana vo Yesu kwikizi kiandi kekatikisanga. Petelo ovutwidi yo unkabu wawonso vo: “E Mfumu, ongeye ozeye mawonso; ozeye wo vo zola ikuzolanga.” Yesu ovutukidi diaka dina Petelo kafwete vanga, umvovese vo: “Dikila mameme mame.” (Yoane 21:17) Kieleka, awana bevitang’o ntu bafwete sadilanga o wantu bekotanga muna kambi dia Nzambi.

Yesu wakangwa yo vondwa kadi, wavanga e salu kina o Nzambi kantuma. Owau Yesu osengomwene vo diau dimosi dibwila Petelo. Yesu umvovese vo: “Vava wakala toko, ngeye kibeni wavuatanga yo kwenda konso kuna ozolele. Kansi, vava onuna, olambula moko maku, muntu akaka okuvuika yo kunata kuna kuzolele ko.” Yesu owondelele Petelo vo: “Kwamanana kundanda.”—Yoane 21:18, 19.

Vava Petelo kamwene Yoane wa ntumwa, oyuvuidi vo: “E Mfumu, ondioyu aweyi?” Nkia diambu dibwila ntumwa ona Yesu ketoma zolanga? Yesu umvutwidi vo: “Avo nzolele wo vo kazinga yavana nkwiza, ekuma otokanenanga?” (Yoane 21:21-23) Petelo kafwete landa Yesu yo lembi tokanene dina ankaka bevanga. Yesu osongele vo Yoane mvu miayingi kezinga lutila ntumwa zankaka, okunsonga mpe e mona-meso kia ngiz’andi se Ntinu.

Kieleka, Yesu mambu mayingi kavanga, kansi ke dilendakana ko mu soneka mawonso muna ngungu.