Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 112

Longi mu Kuma kia Lulungalalu—Mienze

Longi mu Kuma kia Lulungalalu—Mienze

MATAI 25:1-13

  • YESU OTELE KINGANA KIA MIENZE KUMI

Yesu ovene mvutu za kiuvu kia antumwa mu kuma kia sinsu kia ngiz’andi ye mbaninu a tandu. Wau vo e moko kiaki kia kinu muna ngindu zau, Yesu ubatelele kingana mu kubavana luludiku lwa ngangu. O wantu bekala o moyo muna ngiz’a Yesu, yau bemona e ndungana ungunza wau.

Yesu otele kingana, oku vo: “E Kintinu kia zulu kilenda tezaneswa ye mienze kumi ana babongele mini yau, benda wanana ye toko diansompi. Atanu muna yau mazowa kwau, kansi atanu alungaladi.”—Matai 25:1, 2.

Yesu kazolele vova ko vo ndambu muna alongoki andi bekota muna Kintinu kia zulu mazowa kwau, vo i ndambu alungaladi. Kansi edi kazolele vova vo, mu kuma kia Kintinu, alongoki andi balenda sola kala alungaladi yovo mfwe mia diya. Yesu otomene dio zaya vo konso nlongoki andi olenda sikila ye kwikizi yo tambula e nsambu za Nzambi wa Se diandi.

Muna kingana katele, mienze kumi bele kika e toko dia nsompi, i bosi bevutuka kuna nkinzi a longo. Vava o toko keluaka, e mienze kumi beminika e nzila ye minda miau, bekunkembelela wau kenata ndumb’andi muna nzo ina kankubikila. Aweyi divangamena?

Yesu ovovele vo: “O mazowa banete mini, kansi yau ke banati mazi mankaka, vo i alungaladi, banete mini yau ye mazi mankaka muna nlangi. Ekolo toko diansompi kazingilanga, yau awonso batonzele yo leka.” (Matai 25:3-5) E toko diansompi kalueke mu ola ina bayindwidi ko. Mu zingila kikilu kena, e mienze kumi balele kwau. Alongoki, nanga bayindwidi e kingana kia Yesu kia nkwa tunda wayenda kuna nsi yandá, “kimana kayadikwa kintinu, i bosi kavutuka kwandi.”—Luka 19:11-15.

Muna kingana kia mienze kumi, Yesu osasidi dina divangamene vava o toko kalueke. Ovovele vo: “Muna dingi-dingi vakedi kazu: ‘Tala e toko diansompi! Nwenda kunkika.’” (Matai 25:6) Nga e mienze kumi bakubama bena mu kika toko?

Yesu okudikidi vo: “E mienze miawonso batelamene, bakubikidi mini yau. O mazowa bavovese alungaladi vo, ‘Nutuvana mazi, kadi e mini yeto se izima.’ Alungaladi bavutwidi vo: ‘Nanga o mazi ke mefwana ko kwa yeto yo yeno. Nwenda sumba kw’awana betekanga mo.’”—Matai 25:7-9.

O mazowa ma mienzi tanu, ke bena balungalala ko ngatu kubama muna tambula toko diansompi. Mazi bavuidi o mfunu muna sia muna mini yau. Yesu ovovele vo: “Ekolo bayenda sumba mazi, toko diansompi olueke. E mienze ana bakubama bakotele yandi muna nkinzi a longo, e kielo kizikamene. Kuna kwalanda, e mienze miankaka milueke yo vova vo, ‘E Mfumu, e Mfumu, utuziulwila!’ Ubavutwidi vo, ‘Kieleka inuvovese wo vo, kinuzeye kwame ko.’” (Matai 25:10-12) Diambu dia nkenda kikilu diababwila wau balembi kubama yo lungalala.

Alongoki babakwidi vo, toko diansompi o Yesu kavovele i yandi kibeni. Yesu ukitezanese yo toko diansompi. (Luka 5:34, 35) Adieyi tuvova mu kuma kia mienze mialungaladi? Vava kavovela e “finkambi-kambi” ana bevewa e Kintinu, Yesu wasadila e mvovo emi: “Nuvuata yo kubama, nukwika e mini yeno.” (Luka 12:32, 35) I dianu, muna kingana kia mienze kuma alongoki babakwidi vo Yesu alongoki besikila ye kwikizi kena vovela nze yau. Nkia diambu o Yesu kazolele longa muna kingana kiaki?

Yesu otomene sasila. Ofokwele e kingana kiandi mu mvovo emi: “Dianu vo, nuyingila, kadi ke nuzey’e lumbu ko ngatu ola.”—Matai 25:13.

Mu diambu ditadidi ngiz’andi Yesu olukisi alongoki andi akwikizi vo, bakwamanana ‘yingila.’ Yesu okwiza, alongoki bafwete lungalala nze mienze tanu kimana balembi vidisa e vuvu kiau yo nsendo balenda vua.