Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 15

Yesu Ovangidi Sivi Diantete

Yesu Ovangidi Sivi Diantete

YOANE 2:1-12

  • NKINZI A LONGO MUNA MBANZ’A KANA

  • YESU OKITWIDI MAZA SE VINYU

Kiaki i lumbu kiatatu tuka Natanaele kakitukidi mosi muna alongoki antete a Yesu. Yesu ye alongoki andi antete bele kuna zunga kia Ngalili, kuna bawutukila. E kani diau i lwaka kuna Kana, vata dia Natanaele. E mbanz’a Kana ina kuna miongo mia node ya Nazarete. E Nazarete i vata dina Yesu kasansukila. Ku nkinzi a longo babokeleso.

Ngudi a Yesu mpe wizidi ku nkinzi wau. Wau vo Maria nkundi a yitu ya toko ye ndumb’a nsompi, nanga mu lunga-lunga kena e nzenza. Kiaki i kuma kabakulwidi vo lekwa kikondelo mu kuma kia nzenza. Dianu kavovesele Yesu vo: “Ke bena ye vinyu ko.”—Yoane 2:3.

Kieleka, Maria osongele ngindu kwa Yesu kimana kavanga diambu mu kuma kia vinyu yikondelo. Yesu unyuvuidi vo: “E nkento, omono yo ngeye nkia diambu tuna diau? E ntangw’ame ke yafwene ko.” (Yoane 2:4) Wau vo Nzambi wasola Yesu se Ntinu, Se diandi kuna zulu ofwete kuntumina, ke esi nzo andi ko ngatu akundi andi. Maria kuna ndekwa zawonso oyambwidi mawonso vana moko ma mwan’andi. I bosi, ovovese aselo vo: “Konso una kekunuvovesa, nuvanga wo.”—Yoane 2:5.

Vena ye mvungu sambanu, konso mvungu ulenda kota vioka sangala yá. Yesu ovovese aselo vo: “Nuzadis’e mvungu yo maza.” I bosi, ubavovese vo: “Owau nubonga mio, nwenda mio vana kuna kwa ntu a nkinzi.”—Yoane 2:7, 8.

O ntu a nkinzi osivikidi mu kuma kia vinyu yambote, kansi kazeye wo ko vo maza makitukidi se vinyu mu mpil’a sivi. Obokele toko dia nsompi, umvovese vo: “Wantu awonso vinyu ambote beteka tambikanga, avo wantu batomene nua, i bosi betambika ina yambi. Kansi ongeye, oswekele e vinyu ambote yamu wau.”—Yoane 2:10.

Diadi i sivi diantete kavangidi Yesu. Vava alongoki andi bamwene sivi diadi, lukwilu lwau muna yandi lukumamene. I bosi, Yesu, Maria wa ngudi andi ye aleke andi, bele kuna mbanz’a Kafanau, kuna simu dia Mbu a Ngalili.