Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 18

Salu kia Yesu Kiwokele, kia Yoane Kikulukidi

Salu kia Yesu Kiwokele, kia Yoane Kikulukidi

MATAI 4:12 MAKU 6:17-20 LUKA 3:19, 20 YOANE 3:22–4:3

  • ALONGOKI A YESU BAYANTIKIDI VUBA WANTU

  • YOANE WA MVUBI OSILU MU PELEZO

Vava bamene kembelela e Nduta ya mvu wa 30 wa tandu kieto, Yesu ye alongoki andi bakatukidi muna Yerusaleme. Kansi, ke bavutukidi muna Ngalili ko. Bele muna zunga kia Yuda, bavubidi mo wantu ayingi. Yoane wa Mvubi salu kiaki mpe kesalanga mu tezo kia mvu amvimba. Wakinu kumosi ye ankaka muna alongoki andi, nanga vana ndimb’a Nkoko a Yodani.

Yesu yandi kibeni kasidi vuba muntu ko, alongoki andi bevubanga muna lutumu lwandi. Mu kolo kiaki, Yesu yo Yoane mu longa bena Ayuda ana bavilukidi e ntima muna nsumuka basumukini e kangu dia Nsiku a Nzambi.—Mavangu 19:4.

Kansi, alongoki a Yoane bamwene kimpala, bayidimini mu kuma kia Yesu, oku vo: “Muntu [Yesu] ndiona wakala yaku . . . ovubanga, wantu awonso kwa yandi bekwendanga.” (Yoane 3:26) Kansi, Yoane kena ye kimpala ko. Oyangalele e salu kia Yesu, ozolele vo alongoki andi mpe bayangalela kio. Ubasungamese vo: “Yeno kibeni nukunsilanga umbangi mu dina yavova vo, ‘Ke mono ko i Kristu, kansi tumwa yatumwa yamvita oku ntwala.’” Muna sadisa awonso babakula e diambu diadi, ubatelele kingana eki: “Konso ndiona una ye ndumb’ansompi i toko diansompi. Kansi o nkundi a toko diansompi wau katelamene yo kunwá, omwene kiese kiayingi mu kuma kia nding’a toko diansompi. Dianu vo e kiese kiame kilunganene.”—Yoane 3:28, 29.

Nze nkundi a toko diansompi, Yoane wayangalala vitila ngonde zayingi vava kasunzula alongoki andi kwa Yesu. Akaka muna alongoki a Yoane bakitukidi alandi a Yesu, besinga kuswa muna mwand’avelela. Yoane ozolele vo alongoki andi bakituka mpe alandi a Yesu. E kani dia Yoane i kubikila Kristu e nzila kimana kasala e salu kiandi. Yoane ovovele vo: “E salu kiandi wokela kaka kiwokela, vo i kiame, kuluka kaka kikuluka.”—Yoane 3:30.

Yoane ona wakituka se nlandi a Yesu kuna lubantiku, wasoneka mu kuma kia tuku dia Yesu ye salu kiandi kia vuluza wantu, wavova vo: “Ndiona otukidi kuna ntandu, vana ntandu a wantu awonso i kena. . . . O Se ozolele o Mwana, oyekekele lekwa yawonso vana koko kwandi. Ndiona okwikila muna Mwana, una yo moyo a mvu ya mvu; ndiona okolamena Mwana, kemona moyo ko, kansi o makasi ma Nzambi muna yandi kaka mekala.” (Yoane 3:31, 35, 36) Ekiaki i ludi bafwete zaya o wantu!

Vava Yoane wa Mvubi kasasidi vo mbebe andi ye salu kiandi kikuluka, ke vaviokele kolo kiayingi ko, osilu mu pelezo kwa Ntinu Erodi. Erodi obongele Erodia wa nkaz’a Filipo wa nleke andi. Vava Yoane kasenzekele e vangu diandi dia zumba vana meso ma ndonga, Erodi unsidi mu pelezo. Wau kawidi vo Yoane osilu mu pelezo, Yesu ye alongoki andi bakatukidi muna Yuda, bele kuna Ngalili.—Matai 4:12; Maku 1:14.