Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 53

Yoyada Wasonga Unkabu

Yoyada Wasonga Unkabu

Izebele wakala yo mwana ankento, nkumbu andi Ataleya. Nkento ambi kakala nze ngudi andi. Ataleya wasompwa kwa ntinu a Yuda. Vava nkaz’andi kafwa, o mwan’andi wayantika yala. Kansi, vava mwan’andi kafwa, Ateleya wakitumbika yandi kibeni se ntinu a Yuda. Wavava fukisa luvila lwawutukilanga atinu. Wavondesa konso muntu wafwana kituka se ntinu, kana nkutu atekelo andi. Wantu awonso wonga bamuenanga.

Yoyada wa Ngang’ambuta yo nkaz’andi, Yoseba, bazaya wo vo mana Ataleya kavanganga mambi kikilu. Basia zingu kiau mu vonza kadi basweka mosi muna atekelo a Ataleya, mwan’a nsedia wakala ye nkumbu a Yoase. Muna tempelo bansansilanga.

Vava Yoase kalungisa kimbuta kia mvu nsambwadi, Yoyada wabokelesa akuluntu awonso ye Anelevi yo kubavovesa vo: ‘Nuyingila mielo mia tempelo, ke nuyambula konso muntu ko kakota.’ I bosi, Yoyada watumbika Yoase se ntinu a Yuda yo kumvuika e kolowa vana ntu. O nkangu a Yuda wakaza vo: ‘Zinga kwaku e ntinu!’

Vava Ataleya wa ntinu ankento kawá mazu ma nkangu, wayenda nzaki kuna tempelo. Vava kamona o ntinu ampa, wakaza vo: ‘Lutelameno! Lutelameno!’ Akuluntu bakanga ntinu ankento, bamvaikisa kuna mbazi yo kumvonda. Kansi, adieyi tuvova mu kuma kia umpukumuni wandi muna nkangu?

Yoyada wasadisa o nkangu kimana bakanga e kangu yo Yave, basia o nsilu wa sambila kaka yandi. Yoyada wabakanikina vo bavelelesa e tempelo yo kosomona teke  yawonso ya Bale. Watumbika anganga ye Anelevi mu sadila muna tempelo kimana nkangu bavutuka diaka sambila muna tempelo. Wasia ayingidi vana mielo mia tempelo kimana awana bafunzuka balembi mo kota. I bosi, Yoyada ye akuluntu banata Yoase kuna lûmbu lwa ntinu yo kumvuandisa vana kunda kia kintinu. O nkangu a Yuda wayangalala kikilu. Owau, bakala ye lau dia sambila Yave kondwa kwa umpukumuni wa Ataleya ye wa nsambil’a Bale. Nga omwene una unkabu wa Yoyada wasadisila wantu ayingi?

“Ke nubamoni wonga ko awana balenda vonda e nitu, kansi ke balendi vonda moyo ko; numwena kaka o wonga ona olenda fwasa moyo ye nitu kuna Ngeena.”—Matai 10:28