Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 39

Ntinu Antete a Isaele

Ntinu Antete a Isaele

Yave wavananga Aneyisaele afundisi kimana bakala afidi au, kansi oyau bazola vo bakala yo ntinu. Bavovesa Samuele vo: ‘E zula yawonso ituzungidi bena ye ntinu miau. Oyeto mpe ntinu tuzolele.’ Samuele kayangalela dio ko. Wasamba kwa Yave mu kuma kia diambu diadi. Yave wamvovesa vo: ‘O nkangu ke ngeye ko babembwele, kansi mono babembwele. Ubazayisa vo balenda kwau kala yo ntinu, kansi bazaya wo vo ntinu bevavanga mambu mayingi kekubalomba.’ Kana una vo i wau, o nkangu wavova vo: ‘Ke diambu ko. Ntinu kaka tuzolele!’

Yave wavovesa Samuele vo muntu mosi una ye nkumbu a Saulu yandi okala ntinu antete. Vava Saulu kayenda kingula Samuele kuna Rama, Samuele watumbika Saulu se ntinu yo kunkusa mazi vana ntu.

Kuna kwalanda, Samuele wakutakesa Aneyisaele kimana kabasonga o ntinu au ampa. Kansi, o Saulu kamonekanga ko. Nga ozeye ekuma? Kadi wayenda swekama vana kati kwa funda. Vava basolola Saulu, bantwasa yo kuntelamesa vana kati kwa nkangu. Saulu wasunda wantu awonso muna ntela, mote mpe kakala. Samuele wavova vo: ‘Nutala o muntu kasolele o Yave.’ O nkangu wavova mu nding’angolo vo: ‘Zinga kwaku e ntinu!’

Kuna lubantiku, Saulu wawilanga Samuele yo lemvokela Yave. Kansi, kuna kwalanda wasoba. Kasikil’owu, o ntinu kakala yo nswa ko wa kela yimenga. Lumbu kimosi, Samuele wavovesa Saulu vo kamvingila, kansi Samuele kayiza vana vau ko. Muna kuma kiaki, Saulu wakela yimenga yandi kibeni. Adieyi Samuele kavanga? Wamvovesa vo: ‘Diambi ovangidi wau okolamene Yave.’ Nga Saulu walongaka diambu muna mbi kavanga?

Kuna kwalanda, vava Saulu kayenda nuana vita ye Aneyamaleke, Samuele wavovesa Saulu vo kafwete vukisa muntu ko. Kansi, Saulu wavukisa Angangi wa ntinu. Yave  wavovesa Samuele vo: ‘Saulu ungiambwidi. Kalemvokele nsiku miame ko.’ Samuele wakendalala kikilu, wavovesa Saulu vo: ‘Wau oyambwidi lemvokela Yave, ntinu ankaka kesola.’ Vava Samuele kaviluka kenda kwandi, Saulu wasimbinina e yunga kia Samuele yavana kiatiazuka. I bosi, Samuele wavovesa Saulu vo: ‘Yave ukatwidi kintinu.’ Yave ovana kintinu kiaki kwa muntu ona okunzola yo kunlemvokela.

‘O lemvoka kusundidi yimenga.’—1 Samuele 15:22