Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 17

Mose Osolele Sambila Yave

Mose Osolele Sambila Yave

Vava bakala kuna Engipito, o wan’a Yakobo bazayakana vo Aneyisaele. Vava Yakobo yo Yosefe bafwa, Faro wankaka wayantika yala muna Engipito. Wamona wonga vava kamona una Aneyisaele bawokelelanga vioka esi Engipito. Muna kuma kiaki, Faro ndioyo wakitula Aneyisaele se abundu. Wabakomekenanga bavanganga bilikisi ye salu yangolo muna kiana. Kana una vo i wau, o lutangu lwa Aneyisaele lwakwamanana wokela. Wau vo Faro kayangalela diambu diadi ko, wakanikina vo konso mwan’ a yakala owutuka kuna kwa Aneyisaele, kafwete vondwa. Nga olenda yindula una Aneyisaele bamona?

Nkento mosi wa mwisi Isaele wayikilwanga vo Yokebede, wawuta mwan’a yakala wa mote kikilu. Muna tanina mwana ndioyo, wansia mu finkela yo kwenda kunsweka muna Nzadi a Nile. O Mireyame wa mpangi a nsedia ndioyo, wakala vana mbela kimana kanlangidilanga.

 O mwan’a Faro vava kayiza yowela muna nkoko, wamona e finkela. Mwana wakala muna kati wadilanga, wamfwila e nkenda. O Mireyame wanyuvula vo: ‘Nga ngienda bokela nkento kayemekena mwana’? Vava o mwan’a Faro kavutula vo elo, Mireyame wayenda bokela Yokebede wa ngudi a mwana. O mwan’a Faro wamvovesa vo: ‘Bonga mwana ndioyo wangiemekena yandi, ikuvana nsendo.’

Vava o mwana kanungunuka, Yokebede wanata kwa mwan’a Faro ona wamvana e nkumbu a Mose yo kunkitula se mwan’andi. Mose wasansuka nze mwan’a ntinu ye wakala ye nswa wa vua konso lekwa kazolele. Kansi, Mose kavilakana Yave ko. Wazaya wo vo mwisi Isaele kakala, ke mwisi Ngipito ko. Muna kuma kiaki, wasola sambila Yave.

Vava kalungisa mvu 40, Mose wabaka e nzengo za sadisa nkangu andi. Vava kamona mwisi Engipito wawandanga mwisi Isaele, Mose wawanda mwisi Engipito ndioyo yavana kamvonda. Mose wasweka e vimbu muna senge kimana dialembi zayakana. Vava Faro kazaya wo, wavava vonda Mose. Kansi, Mose watinina kuna Midiani. Yave wanlunga-lunganga ekolo kakala kuna nsi yayina.

“Muna lukwikilu, Mose . . . i kamengena yikilwa vo ntekelo a Faro, wasola bangikwa kumosi yo nkangu a Nzambi.”—Ayibere 11:24, 25