Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 19

Vuku Tatu Yantete

Vuku Tatu Yantete

Aneyisaele bakomekenuanga mu sala e salu yangolo kadi abundu bakala. Yave wafila Mose yo Arone kwa Faro mu kumvovesa vo: ‘Sindika nkangu ame kimana bansambila muna makanga.’ Kuna lulendo lwawonso, Faro wavova vo: “Kizeye Yave ko; vana ntandu kisindika Isaele ko.” Faro wasakisa diaka kubabangika. Yave diambu diamfunu kadi longa kwa Faro. Nga ozeye mu nkia mpila? Watwasa Vuku Kumi muna Engipito. Yave wavovesa Mose vo: ‘O Faro kazolele wila nding’ame ko. Muna mene-mene, ku Nzadi a Nile kekwenda. Wenda wanana yandi yo kumvovesa vo, wau vo kuzolele sindika nkangu ame ko, e maza mawonso ma Nzadi a Nile menga mekituka.’ Mose walemvokela Yave yo kwenda kwa Faro. Faro watalanga vava Arone kawandanga maza ma Nzadi a Nile yo nkau andi, maza makituka se menga. E nzadi yayantika tà nsudi, e mbizi zafwa ye ke mwakala maza ma nua ko muna Nzadi a Nile. Kansi, Faro kazola sindika Aneyisaele ko.

 Vava vavioka lumbu nsambwadi, Yave wafila diaka Mose kwa Faro mu kumvovesa vo: ‘Avo kusindikidi nkangu ame ko, Engipito yawonso izala ye yula.’ Arone wawanda nkau andi muna maza, vana vau e yula yayantika zala muna nsi. O nkangu wawananga e yula muna nzo, vana mfulu ye muna malonga mau. E nsi yawonso yazala ye yula. Faro wavovesa Mose vo kadodokela Yave kimana kakatula e yula yayi. Faro wasia nsilu vo avo Yave okatwidi e vuku kiaki, osindika Aneyisaele. Muna kuma kiaki, Yave wakatula e yula. Esi Ngipito bakutika ulolo wa yula yafwa. E nsi yayantika tá nsudi. Kansi, Faro kazola sindika nkangu ko.

I bosi, Yave wavovesa Mose vo: ‘Vovesa Arone vo kalambula o nkau yo wanda mbundukutu a ntoto, ukituka se mbwengene yovo lekwa yakete-kete itatikanga.’ Vana vau, e mbundukutu yawonso ikitukidi se mbwengene muna Engipito yawonso. Akaka muna nkangu a Faro bamvovesa vo: ‘E vuku yayi kwa Nzambi itukidi.’ Kansi, Faro kazola sindika Aneyisaele ko.

“Nzayisa mosi ikubazayis’o koko kwame yo nkuma bezaya vo nkumbu ame i Yave.”—Yeremiya 16:21