Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 102

Yoane Wasongwa Mona-meso

Yoane Wasongwa Mona-meso

Vava Yoane wa ntumwa kakala muna pelezo kuna sanga kia Patemo, Yesu wansonga mona-meso 16 ya mambu mevangama kuna sentu. E mona-meso yayi yasonga una e nkumbu a Yave iveleleselwa, una Kintinu kiandi kikwizila ye una luzolo lwandi luvangamena ova ntoto nze kuna zulu.

Muna mona-meso kimosi, Yoane wamona Yave ovuende vana kunda kiandi kia kimfumu kuna zulu, ozietelo kwa akuluntu 24 bavuete mvuatu mia mpembe ye kolowa za wolo vana ntu miau. Nsiemo ye zú dia miandazi diavaika vana kunda. Akuluntu 24 bavumbama vana ntadisi a Yave yo kunsambila. Muna mona-meso kiankaka, Yoane wamona ndong’ayingi yatuka mu zula, makanda ye ndinga zawonso besambilanga Yave. O Mwan’a meme, i sia vo, Yesu, okubavungulanga yo kubafila kuna maza ma moyo. I bosi, muna mona-meso kiankaka, Yoane wamona Yesu wayantika yala se Ntinu kuna zulu, kumosi ye akuluntu 24. Muna mona-meso kialanda, Yoane wamona Yesu  onuananga ye ngobodi, i sia vo, Satana, kumosi ye nkuya miandi. Yesu wabayinga kuna zulu yo kubatuba ova ntoto.

I bosi, Yoane wamona Mwan’a meme ye 144.000 ma wantu batelamene vana Mongo a Zione. Wamona mpe mbasi yatilumukanga va nza yo zayisa wantu vo bavumina Nzambi yo kumvana nkembo.

Muna mona-meso kialanda, Yoane wamona vita ya Armangedo. Muna vita yayi, Yesu ye makesa mandi bafwasa e nza yambi ya Satana. Muna mona-meso kiansuka, Yoane wamona luvuvamu lwakala kuna zulu ye va ntoto. Satana ye mbongo andi bafwasilu emvimba. Awonso kuna zulu ye va ntoto, bezitisa e nkumbu a Yave yo sambila kaka yandi.

‘Kitantu isia vana vena ngeye yo nkento, vana ven’e mbongo aku ye mbongo a nkento. Oyandi obosola o ntu aku, ongeye otatika e bombo kiandi.’—Etuku 3:15