Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 93

Yesu Ovutukidi Kuna Zulu

Yesu Ovutukidi Kuna Zulu

Yesu wamonana ye alandi andi kuna Ngalili. Wabavana salu kiamfunu. Wabavovesa vo: ‘Nwenda, nwakitula wantu a zula yawonso se alongoki ame. Nubalonga mawonso yanulonga yo kubavuba.’ I bosi, wabasia nsilu vo: ‘Ikala yeno e lumbu yawonso. Nusungamenanga nsilu wau.’

Vava kafuluka, Yesu lumbu 40 kakala ova ntoto. Wamoneka kwa ulolo wa alongoki andi kuna Ngalili ye Yerusaleme. Wabalonga mambu mamfunu yo vanga masivi mayingi. I bosi, Yesu wakutakana ye ntumwa zandi mu nkumbu wansuka vana Mongo a Olive. Wabavovesa vo: ‘Ke nuvaika mu Yerusaleme ko. Nuvingila yavana nutambula kina Se diame kanusila nsilu.’

E ntumwa zandi ke babakula ko dina kavova. Banyuvula vo: ‘Nga mu ntangwa yayi okituka se Ntinu muna Isaele?’ Yesu wavova vo: ‘E ntangwa ina Yave kasikidisa mfwete kituka Ntinu ke yafwene ko. Ke kolo ko se nuatambula nkuma utuka muna mwand’avelela, nukituka nu mbangi zame. Nuenda samuna e nsangu zambote muna Yerusaleme, Yuda, Samaria yakuna nsuk’a nza.’

I bosi, Yesu otombokele kuna zulu, e tuti dimfukidi. Alongoki andi bakwamanana kuntala ekolo katombokanga.

Alongoki bakatuka vana Mongo a Olive yo kwenda kuna Yerusaleme. Bakutakana mu suku dimosi diantandu yo yantika samba. Bavingilanga vo Yesu kabazayisa dina bafwete vanga.

“E nsangu zazi zambote za Kintinu zisamunwa mu nza yawonso muna umbangi kwa zula yawonso, i bosi ikwiza e mbaninu.”—Matai 24:14