Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 88

Bezidi Kanga Yesu

Bezidi Kanga Yesu

Yesu ye ntumwa zandi baviokela muna Ndimb’a Kiderone mu kwenda kuna Mongo a Olive. Mu fuku bakangalanga kuna nsi a mienzi mia ngonde. Vava balwaka muna mpatu a Ngetesemane, Yesu wabavovesa vo: “Nukala vava, nwayingila.” I bosi, Yesu wavavuka fioti muna mpatu yo fukama. Kana una vo mpasi zayingi kamonanga muna ntima, wasamba kwa Yave vo: “Yambula luzolo lwaku lwavangama.” I bosi, Yave watwika mbasi mu kasakesa Yesu. Vava Yesu kavutuka vana vakala antumwa, wawana atatu muna yau baleka. Wabavovesa vo: ‘Nusikama! E yayi ke ntangwa ya leka ko. E ntangwa ifwene iyekolwa vana moko ma mbeni zame.’

Vana vau Yuda walwaka, watwasa buka kia wantu bakala ye nsosolo ye bota. Wazaya kuna kalenda wana Yesu kadi nkumbu miayingi bayizanga mu mpatu yayi. Yuda wavovesa masoladi vo okubasonga Yesu. Wayenda vana vakala Yesu yo vova vo: ‘Kiambote kiaku e Nlongi.’ I bosi, umfibidi. Yesu wamvovesa vo: ‘E Yuda, nga umfibidi mu kungiekola?’

Yesu wakisunzula yo yuvula e buka kia wantu vo: “Nani nuvavanga?” Bavutula vo: “Yesu wa mwisi Nazarete.” Wabavovesa vo: “I mono oyu.” Masoladi bavutuka manima yo bwa vana ntoto. Yesu wabayuvula diaka vo: “Nani nuvavanga?” Bavutula diaka vo: “Yesu wa mwisi Nazarete.” Yesu wavutula vo: ‘Inuvovese kala vo i mono oyu. Nuyambula wantu awaya benda kwau.’

Vava Petelo kabakula dina diavangamanga, wabaka nsosolo yo zenga kutu kwa Maleko wa ntaudi a ngang’ambuta. Kansi, Yesu wasimba kutu kwa muntu ndioyo yo kunwuka.  I bosi wavovesa Petelo vo: ‘Vutula nsosolo aku. Avo onuanini muna nsosolo mu nsosolo ofwila.’ Masoladi babaka Yesu yo kunkanga e moko, antumwa batinini. I bosi, masoladi banata Yesu kwa Anasi wa ngang’ambuta. Anasi wafundisa Yesu yo kumfila kuna nzo a Kayafa wa Ngang’ambuta. Nkia diambu diabwila antumwa?

“Ova nza mpasi numona, kansi nukala yo unkabu! Omono nsundidi e nza.”—Yoane 16:33