Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 85

Yesu Owukidi Muntu Muna Lumbu kia Vundu

Yesu Owukidi Muntu Muna Lumbu kia Vundu

Afarisi ke bazolanga Yesu ko. Bavavanga kuma kimana bansia mu pelezo. Bamvovesa vo kafwete wukanga mbevo mu Lumbu kia Vundu ko. Muna lumbu kimosi kia Vundu, Yesu wawana yakala dimosi diafwa meso muna nzila. Wavovesa alongoki andi vo: ‘Nutala una o nkum’a Nzambi usadisila muntu ndioyo.’ Yesu wasanga mete mandi ye nteke, i bosi wasia yo muna meso ma muntu ndioyo. Yesu wamvovesa vo: ‘Wenda yo sukula meso maku vana zinga kia Siloa.’ I diau kavanga o muntu ndioyo. Meso mandi matemoka yo mona mu nkumbu antete muna zingu kiandi.

Wantu basivika kikilu. Bavova vo: ‘Nga ndioyo i muntu wafongelenge muna nzila yo lomba? Yovo fwanana kaka bafwananene?’ O muntu ndioyo wavova vo: ‘I mono kikilu ndiona wawutuka mpofo.’ Wantu banyuvula vo: ‘Ekuma kwinina diaka mpofo ko?’ Vava kabazayisa dina diavangama, banata muntu ndioyo kwa Afarisi.

O muntu ndioyo wavovesa Afarisi vo: ‘Yesu osidi nteke muna meso mame yo kumpovesa vo ngienda sukula meso. I diau mpangidi, owau mu mona se ngina.’ Afarisi bavova vo: ‘Avo Yesu mu Lumbu kia Vundu kewukanga, o nkum’andi ke utukanga kwa Nzambi ko.’ Kansi, akaka bavova vo: ‘Kele vo nkum’andi ke utuki kwa Nzambi ko, kadi lenda wuka ko.’

 Afarisi babokela mase ma muntu ndioyo yo kubayuvula vo: ‘Aweyi o meso ma mwan’eno matemokene?’ Mase mandi bamona kikilu wonga kadi Afarisi bavova vo konso ndiona okwikila muna Yesu, ovaikiswa muna sambilu. Muna kuma kiaki, bavova vo: ‘Ke tuzeye kweto ko. Nuyuvula kwa yandi kibeni.’ Afarisi bayuvula muntu ndioyo yuvu yayingi yavana kavova vo: ‘Inuzayisi kala mawonso mana nzeye. Ekuma nukwamanenanga kaka kungiuvula?’ Afarisi bafunga makasi yo kumvaikisa kuna mbazi.

Yesu wayenda wanana yo muntu ndioyo yo kunyuvula vo: ‘Nga okwikilanga muna Masia?’ Wavova vo: ‘Yadi kwikila muna yandi kele vo yanzaya.’ Yesu wavova vo: ‘Mono i Masia.’ Nga diadi ke vangu dia zola ko kasonga o Yesu? Kawuka kaka muntu ndioyo ko, kansi wansadisa mpe mu kala ye lukwikilu.

“Nwavila, wau nulembele zaya e Sono ngatu nkum’a Nzambi.”—Matai 22:29