Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 78

Yesu Oyantikidi Samuna e Nsangu za Kintinu

Yesu Oyantikidi Samuna e Nsangu za Kintinu

Ke vavioka kolo ko vava Yesu kavubwa, wayantika longa vo: ‘E Kintinu kia Nzambi kifinamene.’ Alongoki bayendanga yandi entwadi ekolo kavanganga nkangalu muna mavata ma Ngalili ye Yuda. Vava Yesu kavutuka kuna mbanza bazingilanga ya Nazarete, wayenda muna sambilu, waziula o nkand’a Yesaya yo tanga mu nding’a ngolo vo: ‘Yave umpene mwand’avelela kimana yasamuna e nsangu zambote.’ Ediadi aweyi diasonga? Diasonga vo kana una vo wantu bazolanga vo Yesu kavanga masivi, e kuma kiantete kavaninua mwand’avelela i samuna e nsangu zambote. Wavovesa nkangu vo: ‘O unu, ungunza wau ulunganene.’

I bosi, Yesu wayenda kuna Mbu a Ngalili, i kûna kawana alongoki andi yá bakala vo abaki a mbizi. Wababokela vo: “Nwiz’andandi, ikunukitula se nu abaki a wantu.” Alongoki awaya i Petelo, Andere, Yakobo yo Yoane. Vana vau, bayambula e salu kiau kia baka e mbizi yo landa Yesu. Bayenda muna Ngalili yawonso mu samuna e nsangu za Kintinu kia Yave. Balongelanga muna masambilu, mazandu ye muna nzila. Ndonga yabalandanga konso kuna bayendanga. E nsangu mu kuma kia Yesu zamuangana mu zunga yawonso yo lwaka nkutu kuna Suria.

Kuna kwalanda, Yesu wavana alongoki andi nkuma wa wuka yimbevo yo vaikisa nkuya. Wantu ankaka bayenda yo Yesu ekolo kasilanga umbangi muna mbanza ye mavata. Akento ayingi akwa kwikizi kumosi yo Maria Mandala, Yoana, Susana ye akaka, balunga-lunganga Yesu ye alongoki andi.

Vava kamanisa longa alongoki andi, Yesu wabatuma benda samuna e nsangu zambote. Ekolo basilanga umbangi muna Ngalili, ayingi bakituka alongoki yo vubwa. Wau vo wantu ayingi kikilu bazola kituka alongoki, Yesu wabatezanesa ye mbongo yafwana kutikwa. Wavova vo: ‘Nusamba kwa Yave kimana  katuma diaka asadi mu kutika e mbongo.’ Kuna kwalanda, wasola 70 lwa alongoki andi yo kubatuma nwole nwole benda samuna e nsangu zambote muna Yuda yawonso. Basamuna e nsangu za Kintinu kwa wantu a mpila zawonso. Vava alongoki bavutuka, bakala ye kiese kia zayisa kwa Yesu mana mavangama. Nkadi ampemba kalenda vanga diambu ko mu ningamesa e salu kia samuna e nsangu zambote.

Yesu wavanga mawonso kimana alongoki andi bakwamanana sala e salu kiaki kiamfunu vava kevutuka kuna zulu. Wabavovesa vo: ‘Nusamuna e nsangu zambote mu nza yawonso. Nulonga o wantu e Diambu dia Nzambi yo kubavuba.’

“Mfwete kwenda mpe muna mavata mankaka, yasamun’e nsangu zambote za Kintinu kia Nzambi, kadi i diau yatuminwa.” —Luka 4:43