Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 75

Nkadi Ampemba Otontele Yesu

Nkadi Ampemba Otontele Yesu

Vava Yesu kavubwa, mwand’avelela wamfila muna makanga. Kadia kana lekwa kimosi ko mu lumbu 40. Nzala kikilu kakala zau. Nkadi ampemba wayiza tonta Yesu. Wamvovesa vo: ‘Avo u Mwan’a Nzambi kikilu, vovesa matadi mama vo makituka se mbolo.’ Kansi, Yesu wasadila e Sono yo kumvovesa vo: ‘Diasonama vo muntu mayingi kevuanga o mfunu muna zinga, ke madia kaka ko. Kafwete lemvokelanga mawonso kevovanga o Yave.’

I bosi, Nkadi ampemba wavovesa diaka Yesu vo: ‘Avo u Mwan’a Nzambi kikilu, uyituba vana ntoto tuka vana lusangidiku lwa tempelo. Diasonama vo Nzambi otuma mbasi zandi kimana basimba.’ Kansi, Yesu wasadila diaka e sono kia Nkand’a Nzambi yo vova vo: ‘Diasonama vo kufwete tonta Yave ko.’

I bosi, Satana wasonga Yesu yintinu yawonso ya nza ye mavua ye nkembo au. Wavova vo: ‘Ikuvana yintinu yayi yawonso yo nkembo au avo unsambidi kana nkutu nkumbu mosi kaka.’ Kansi, Yesu wamvovesa vo: ‘Katuka, e Satana. Diasonama vo Yave kaka ofwete sambila.’

I bosi, Nkadi ampemba wayenda. Mbasi zayiza kwa Yesu yo kumvana madia. Tuka muna lumbu kiakina, Yesu wayantika samuna e nsangu zambote za Kintinu. Kiaki i salu katuminua ova ntoto. Wantu bayangalelanga mana Yesu kabalonganga. Muna kuma kiaki, banlandanga konso kuna kayendanga.

“Vava [Nkadi ampemba] kevovanga luvunu, muna yandi kibeni i kevovelanga, kadi nkwa luvunu kwandi, se dia luvunu mpe.”—Yoane 8:44