Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 72

Yesu Okitukidi se Toko

Yesu Okitukidi se Toko

Yosefe yo Maria mu mbanz’a Nazarete bazingilanga yo Yesu kumosi ye wan’au ankaka amakala ye amakento. Yosefe salu kia kimvadi a nti kasalanga muna dikila esi nzo andi. Wabalonganga oma ma Yave ye nsiku miandi. Yau awonso bayendanga kuna sambilu mu sambila Nzambi ye kuna lambu dia Nduta kuna Yerusaleme diavangamanga konso mvu.

Vava Yesu kalungisa kimbuta kia mvu 12, e yitu yandi bavanga nkangalu wandá kuna Yerusaleme nze una bavanganga konso mvu. E mbanza yazala ye wantu ana bayiza kuna nkinzi a Nduta. Vava o nkinzi wafokoka, Maria yo Yosefe bayantika nkangalu mu vutuka kuna mbanza batuka, babanza vo Yesu muna buka kakala. Kansi, vava bamvava vana vakala yitu yau, ke bansolola ko.

Bavutuka kuna Yerusaleme, bavava mwan’au lumbu tatu. I bosi, bayenda muna tempelo. I mûna bawana Yesu, wavuanda  vana kati kwa alongi, wabawanga ye sungididi kiawonso yo kubayuvula yuvu yayingi. Alongi basivika kikilu mu kuma kia Yesu ye bayantika kunyuvula yuvu. E mvutu kabavananga zabasivikisa. Bamona vo Yesu watoma bakulanga Nsiku a Yave.

Yosefe yo Maria batokana kikilu. Maria wavova vo: ‘E mwana, mu fulu yayingi tuvavidi kala. Akweyi wakedi?’ Yesu wavova vo: ‘Ke nuzeye wo ko vo mfwete kala mu nzo a Se diame?’

Yesu wayenda kuna nzo kuna Nazarete ye mase mandi. Yosefe walonga Yesu e salu kia kimvadi a nti. Nkia mpil’a muntu Yesu kakala vava kakala nleke? Vava kakulanga, Yesu wazikuka muna ngangu yo tondakana kwa Nzambi ye wantu.

“Ovanga luzolo luaku, e Nzambi ame, kwau nyangalelele; o nsiku aku wina muna nsi ame a ntima.”—Nkunga 40:8