Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 71

Yave Watanina Yesu

Yave Watanina Yesu

Mu nsi mosi yakala kuna este ya Isaele, mwazingilanga wantu bakwikilanga vo e ntetembwa zilenda kubafila. Lumbu kimosi muna fuku, akaka muna wantu awaya bamona lekwa kiakala nze ntetembwa yakezimanga yo kangala kuna zulu, balanda yo. E ntetembwa yayi yabafila kuna Yerusaleme. Vava balwaka, bayantika yuvula wantu vo: ‘Akweyi kena o mwana ona okala ntinu a Ayuda? Twizidi kumfukamena.’

Vava Erodi wa ntinu a Yerusaleme kawá e nsangu mu kuma kia ntinu ndioyo wampa, wamona kikilu wonga. Wayuvula kwa mbuta za nganga vo: ‘Akweyi kewutukila o ntinu ndioyo?’ Bamvovesa vo: ‘Edi bavova angunza vo kuna Beteleme kewutukila.’ Muna kuma kiaki, Erodi wabokela wantu batuka kuna Este yo kubavovesa vo: ‘Nuenda vava o mwana kuna Beteleme. I bosi, nuvutuka nuanzayisa kuna kena. Mono mpe nzolele kumfukamena.’ Kansi, vuna kavuna.

E ntetembwa yayantika kangala diaka. Wantu awana balanda yo yakuna Beteleme. E ntetembwa yaningama vana ntandu a nzo mosi, bakota muna kati. Bamona Yesu yo Maria wa ngudi andi. Bafukamena mwana yo kumvana tukau twa wolo, ndumbu ye mazi ma mô. Nga Yave kikilu wafila wantu awaya benda vava Yesu? Ve.

Muna fuku wauna, Yave wavovesa Yosefe muna ndozi vo: ‘Erodi ozolele vonda Yesu. Baka nkaz’aku yo mwana nutinina kuna Engipito. Nukala kûna yavana ikunuvovesa vo nuvutuka.’ Vana vau, Yosefe ye esi nzo andi bayenda kuna Engipito.

Yave wavovesa wantu batuka kuna Este vo ke bavutuki kwa Erodi ko. Vava Erodi kamona vo ke bavutukidi ko, wafunga kikilu makasi. Wau vo kalenda solola Yesu ko, wakanikina vo wan’awonso amakala kuna Beteleme ana bena muna ntel’a Yesu  bafwete vondwa. Kansi, Yesu kakala mu vonza ko kadi kwandá kikilu kakala, kuna Engipito.

Kuna kwalanda, Erodi wafwa. Yave wavovesa Yosefe vo: ‘Owau, nulenda kweno vutuka.’ Yosefe, Maria yo Yesu bavutuka kuna Isaele yo zingila muna mbanz’a Nazarete.

“I una diambu diame divaika mu nu’ame: ke dikumputukila nkatu ko, . . . , disikila mun’edi ntwikidi dio.” —Yesaya 55:11