Tala mambu

Tala ntu mia mambu

Mbangi za Yave

Sola ndinga Kikongo

 LONGI DIA 58

Yerusaleme Ifwasilu

Yerusaleme Ifwasilu

O nkangu a Yuda nkumbu miayingi wabembolanga Yave yo sambila nzambi zaluvunu. Mu mvu miayingi, Yave wavavanga kubasadisa. Wabatwikila ngunza zayingi mu kubalukisa, kansi ke bawanga ko. Basevanga nkutu e ngunza zazina. Aweyi Yave kafokolwela e nsambil’au ya teke?

Nebukandesa wa ntinu a Babele wayantika sunda zula kimosi kimosi. Muna nkumbu antete kasunda Yerusaleme, wakanga ntinu Yoyakine, akuluntu, makesa ye akwa umbangu, Yau awonso wabanata kuna Babele. Wanata mpe lekwa yawonso yantalu yakala muna tempelo a Yave. I bosi, Nebukandesa watumbika Sedekiya se ntinu a Yuda.

Kuna lubantiku, Sedekiya walemvokelanga Nebukandesa. Kansi, esi zula ina yabazunganga kumosi ye ngunza zaluvunu, bazayisa Sedekiya vo kakolamena ntinu a Babele. Yeremiya wanlukisa vo: ‘Avo okolamene, wantu ayingi bevondwa muna Yuda, mukota mpe mvengele ye yimbevo.’

Vava kayala mvu nana, Sedekiya wabaka e nzengo za kolamena ntinu a Babele. Walomba lusadisu kwa makesa ma Engipito. Nebukandesa wafila makesa mandi benda nuanisa Yerusaleme. Bazunga e mbanza. Yeremiya wavovesa Sedekiya vo: ‘Yave ovovele vo avo uyiyekwele kwa Babele, ngeye ye mbanza vuluzwa nuvuluzwa. Kansi, avo ke wau ko, esi Babele  beyoka Yerusaleme yo kunata nze mbundu.’ Sedekiya wavova vo: ‘Kilendi kukiyekola ko.’

Vava vavioka mvu mosi ye ndambu, makesa ma Babele bawula e yaka ya Yerusaleme yo yoka e mbanza. Bayoka mpe tempelo, bavonda wantu ayingi yo nata ulolo wa wantu muna ubundu.

Sedekiya watina muna Yerusaleme. Kansi, esi Babele bayenda kumvava. Bambaka lukufi ye Yeriko yo kuntwasa kwa Nebukandesa. O ntinu a Babele wayambula vo Sedekiya kamona muna meso ekolo wan’andi bavondwanga. I bosi, Nebukandesa wavonda Sedekiya meso yo kunsia muna pelezo. I mûna kafwila. Kansi, Yave wasia nsilu kwa nkangu a Yuda vo: ‘Vava vevioka 70 lwa mvu, ikuvutula kuna Yerusaleme.’

Adieyi diabwila aleke ana banatwa nze abundu kuna Babele? Nga basikila ye kwikizi muna Yave?

“Yave wa Nzambi ampungu, e mfundisa zaku zaludi ye nsongi.”—Lusengomono 16:7