Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 15

Mpila Yambote ya Sambila Nzambi

Mpila Yambote ya Sambila Nzambi

1. Nani olenda kutuvovesa e mpila yambote ya sambila Nzambi?

MABUNDU mayingi mevovanga vo ludi belonganga mu kuma kia Nzambi. Kansi ediadi ke dialudi ko, kadi mabundu mama mambu maswaswana belonganga mu kuma kia Nzambi ye una tufwete kunsambidila. Aweyi tulenda zayila e mpila yambote ya sambila Nzambi? Yave kaka olenda kutuvovesa e mpila tulenda kunsambila.

2. Aweyi olenda zayila e mpila yambote ya sambila Nzambi?

2 Yave watuvana o Nkand’a Nzambi kimana twazaya e mpila yambote ya kunsambila. Muna kuma kiaki, longokanga o Nkand’a Nzambi, Yave okusadisa wabaka e nluta mitukanga muna malongi mandi kadi mfunu kekuvuanga.—Yesaya 48:17.

3. Adieyi o Nzambi kazolele vo twavanga?

3 Akaka bevovanga vo Nzambi otondanga mabundu mawonso, kansi ediadi ke diau ko katulonga o Yesu. Wavova vo: “Ke awonso ko bekumpovesanga vo, ‘E Mfumu, e Mfumu,’ i bekota muna Kintinu kia zulu, kansi awana kaka bevanganga luzolo lwa Se diame.” Muna kuma kiaki, tufwete zaya alweyi i luzolo lwa Nzambi yo vanga lo. Ediadi diamfunu kikilu, kadi Yesu watezanesa awana ke belemvokelanga Nzambi ko ye yimpumbulu vava kabayikila vo, “avangi a umpumbulu.”—Matai 7:21-23.

4. Adieyi Yesu kavova mu kuma kia vanga luzolo lwa Nzambi?

4 Yesu watuvovesa vo avo tutambulwidi vanga luzolo lwa Nzambi, mpasi tumweswa. Wavova vo: ‘Nukotela  muna mwelo ambatakani, kadi o mwelo wampwena ye nzila yasanzuka ina ifilanga kuna lufwasu, ndonga bena ana bekotelanga mo; kuna diak’e sambu, o mwelo ambatakani ye nzila yamfinangani, ina ifilanga ku moyo, ye akete kaka bena ana besololanga yo.’ (Matai 7:13, 14) E nzila yamfinangani, yovo e mpila yambote ya sambila Nzambi, ifilanga ku moyo a mvu ya mvu. E nzila yasanzuka yovo mpila yambi ya sambila Nzambi, ifilanga kuna lufwa. Kansi, Yave kazolele ko vo muntu kafwa. Ovananga e lau kwa konso muntu kanzaya.—2 Petelo 3:9.

MPILA YAMBOTE YA SAMBILA NZAMBI

5. Aweyi olenda zayila awana besambilanga Nzambi mu mpila yambote?

5 Yesu wavova vo tulenda zaya awana besambilanga Nzambi mu mpila yambote. Tulenda kubazaya muna fimpanga mana bekwikilanga ye mana bevanganga. Yesu wavova vo: “Muna mbongo au i nukubazayila. . . . konso nti ambote mbongo ambote uyimanga.” (Matai 7:16, 17) Ediadi ke disongele ko vo awana besadilanga Nzambi wantu alunga. Kansi, e selo ya Nzambi besianga ngolo za vanga oma mambote. Owau tubadika mana mekutusadisa mu zaya awana besambilanga Nzambi mu mpila yambote.

6, 7. Ekuma malongi ma nsambil’aludi mafwete tukila mu Nkand’a Nzambi? E mbandu a Yesu adieyi ikutulonganga?

6 E malongi meto mafwete tuka muna Nkand’a Nzambi. Nkand’a Nzambi uvovanga vo: “Sono yawonso yavumunwinwa kwa Nzambi, yamfunu muna longa, muna tumba, muna singika mambu, muna ludika kuna unsongi, kimana muntu a Nzambi kakala watoma fwana, watoma kubama muna mavangu mawonso  mambote.” (2 Timoteo 3:16, 17) Paulu wa ntumwa wasonekena Akristu vo: “Vava nwatambula diambu dia Nzambi, dina nwawá kwa yeto, ke nwatambula dio nze diambu dia wantu ko, kansi wauna dina kieleka, diambu dia Nzambi kaka.” (1 Tesalonika 2:13) E malongi ma nsambila aludi mu Nkand’a Nzambi kaka metukanga, una vo i Diambu dia Nzambi. Ke metukanga mu ngindu za wantu ko ngatu mu tusansu twa wantu.

7 Mawonso kalonganga Yesu mu Diambu dia Nzambi matukanga. (Tanga Yoane 17:17.) Nkumbu miayingi wayikanga e sono. (Matai 4:4, 7, 10) Selo yakieleka ya Nzambi betangininanga mbandu a Yesu. Mawonso belonganga mu Nkand’a Nzambi metukanga.

8. Adieyi Yesu katulonga mu kuma kia sambila Yave?

8 Yave kaka tufwete sambila. E sono kia Nkunga 83:18 kivovanga vo: “Bazaya wo vo nge kaka wina nkumbu a Yave, u Mpungu omu nza yawonso.” Yesu wazola vo wantu bazaya kana nani kikilu i Nzambi aludi ye wabalonga e nkumbu a Nzambi. (Tanga Yoane 17:6.) Yesu wavova vo: “Yave wa Nzambi aku kaka ofwete sambila, yandi kaka ofwete sadila salu kiavauka.” (Matai 4:10) Muna kuma kiaki, wau vo tu selo ya Nzambi, mbandu a Yesu tulandanga. Yave kaka tusambilanga, tusadilanga e nkumbu andi yo longa yo kwa akaka. Tusamunanga mpe kwa akaka mana Nzambi kevanga mu kuma kieto.

9, 10. Aweyi tufwete songela zola kwa muntu yo nkandi?

9 Tufwete songanga zola kwakieleka kwa muntu yo nkwandi. Yesu walonga alongoki andi vo bazolaziananga. (Tanga Yoane 13:35.) O zola kwaku ke kusolanga nsi ko, fu ya kisi nsi yovo mvuama ngatu nsukami. O zola kweto muna muntu yo nkwandi kufwete kutuyikakesa nze ampangi. (Kolosai 3:14) Muna kuma kiaki, ke  tukwendanga mu vita ko yo vonda wantu. Nkand’a Nzambi uvovanga vo: “O wan’a Nzambi yo wan’a Nkadi ampemba bazayakene mu diambu edi: Konso ona olembi kuyivananga muna mambu mansongi ke wa Nzambi ko, ngatu ndiona olembi zolanga mpangi andi.” Ukudikilanga vo: “Tufwete zolaziananga; ke nze Kaini ko, wina vo wa ndiona wambi, wavonda nleke andi.”—1 Yoane 3:10-12; 4:20, 21.

10 Tusadilanga e ntangwa eto, ngolo ye mavua meto muna sadisa yo kasakesa muntu yo nkwandi. (Ayibere 10:24, 25) Tuvanganga “edi diambote kwa wantu awonso.”—Ngalatia 6:10.

11. Ekuma tukwikidilanga vo Nzambi watuma Yesu mu kutuvuluza?

11 Tufwete lemvokelanga Yesu kadi Nzambi wantuma mu kutuvuluza. O Nkand’a Nzambi uvovanga vo: “Ke vena luvuluzu muna muntu akaka ko, ke vena mpe nkumbu yankaka ko oku nsi a ntangwa yavewa kwa wantu ina tufwete vuluzilwa.” (Mavangu 4:12) Muna Kapu kia 5 kia nkanda wau twalongoka vo Yave watuma Yesu kimana kavana o moyo andi se lukûlu lwa awana bekunlemvokelanga. (Matai 20:28) Yave wasola Yesu se Ntinu mu yala e nza yawonso. Ekiaki i kuma o Nkand’a Nzambi ukutuvoveselanga vo avo tuzolele zinga yakwele mvu, tufwete lemvokela Yesu.—Tanga Yoane 3:36.

12. Ekuma ke tufwete kuyisilanga mu mambu ma tuyalu ko?

12 Katufwete kuyisia mu mambu ma tuyalu ko. Yesu kayisianga mu mambu ma tuyalu ko. Vava kafundiswa, wavova kwa Pilato wa nyadi a Roma vo: “E Kintinu kiame ke kia nza yayi ko.” (Tanga Yoane 18:36.) Nze Yesu, tusonganga kwikizi muna Kintinu kia Nzambi. Muna kuma kiaki, kana nkutu nkia nsi tuzingilanga, ke tukuyisianga mu mambu ma tuyalu ko. Kansi, o Nkand’a  Nzambi ukutukanikinanga twasakalela “akwa wisa,” i sia vo, ayadi. (Roma 13:1) Tulemvokelanga e nsiku mia nsi ina tuzingilanga. Kansi vava nsiku ukululanga nsiku a Nzambi, tutangininanga antumwa ana bavova vo: “Tufwete lemvokela Nzambi nze mfumu ke mu wantu ko.”—Mavangu 5:29; Maku 12:17.

13. Adieyi tusamunanga mu kuma kia Kintinu kia Nzambi?

13 Tukwikilanga vo Kintinu kia Nzambi kaka kifokola e mpasi ova nza. Yesu wavova vo ‘e nsangu zambote za Kintinu’ zisamunwa mu nza yawonso. (Tanga Matai 24:14.) Ke vena luyalu lwa wantu ko lulenda vanga mana Kintinu kia Nzambi kivanga mu kuma kieto. (Nkunga 146:3) Yesu watulonga twasambanga mu kuma kia Kintinu kia Nzambi vava kavova vo: “E Kintinu kiaku kiza. O luzolo lwaku lwavangama ova ntoto nze koko zulu.” (Matai 6:10) Nkand’a Nzambi ukutuzayisanga vo Kintinu kia Nzambi kifwasa tuyalu twawonso twa wantu ye kiau kaka ‘kitongama yakwele mvu.’—Daniele 2:44.

14. Aki nani obenze besambilanga Nzambi mu mpila yambote?

14 Wau olongokele mambu mama ukiyuvula: ‘Aki nani belonganga mana mena muna Nkand’a Nzambi? Aki nani belonganga e nkumbu a Nzambi kwa akaka? Aki nani besonganga zola kwakieleka kwa muntu yo nkwandi yo kwikila vo Nzambi watuma Yesu mu kutuvuluza? Aki nani ke bekuyisianga mu mambu ma tuyalu ko? Aki nani besamunanga vo Kintinu kia Nzambi kaka kifokola e mpasi zeto?’ Mbangi za Yave kaka.—Yesaya 43:10-12.

ADIEYI OFWETE VANGA?

15. Adieyi tufwete vanga avo tuzolele vo Nzambi katonda e nsambil’eto?

15 O kwikila vo Nzambi una ke diau kaka ko divavuanga.  Kadi kana nkutu nkuya bekwikilanga vo Nzambi una, kansi ke bekunlemvokelanga ko. (Yakobo 2:19) Avo tuzolele vo Nzambi katonda e nsambil’eto, ka tufwete kwikila kaka muna yandi ko, kansi tufwete vanganga mpe mana kekutulombanga.

16. Ekuma tufwete bembolwela e nsambil’aluvunu?

16 Avo tuzolele vo Nzambi katonda e nsambil’eto, tufwete bembola e nsambil’aluvunu. Yesaya wa ngunza wasoneka vo: “Nuvaika vana kena, nuvelela kweno.” (Yesaya 52:11; 2 Korinto 6:17) Ekiaki i kuma tufwete bembolwela e nsambil’aluvunu.

17, 18. Nki i “Babele a Nene?” Ekuma tufwete mo vayikila mu nzaki?

17 Nki i nsambil’aluvunu? I konso dibundu difilanga wantu mu sambila Nzambi mu mpila itumbwanga muna Diambu dia Nzambi. Nkand’a Nzambi uyikilanga mabundu mawonso maluvunu vo: “Babele Anene.” (Lusengomono 17:5) Ekuma? Kadi, vava Kizalu kia lumbu ya Noa kiavioka, malongi mayingi maluvunu kuna mbanz’a Babele mayantikila. Malongi mama maluvunu mamwangana mu nza yawonso. Kasikil’owu, awana bazingilanga kuna Babele basambilanga buka yayingi ya nzambi mu ntatu. O unu mpe, mabundu mayingi melonganga vo wantu tatu bena muna Nzambi, kansi Nkand’a Nzambi utoma kiesesanga vo vena ye Nzambi mosi kaka aludi, Yave, o Yesu i Mwan’andi. (Yoane 17:3) O wantu bazingilanga kuna Babele bakwikilanga mpe vo avo muntu ofwidi, vena ye lekwa muna nitu kikwamanananga zinga yovo mona e mpasi kuna bilungi bia tiya. Ediadi ke dialudi ko.—Tala e Mvovo Misasilu 1417, ye 18.

18 Nzambi wasakula vo ke kolo ko mabundu mawonso maluvunu mefwaswa. (Lusengomono 18:8) Nga  obakwidi ekuma tufwete vayikila mu nzaki muna nsambil’aluvunu? Yave wa Nzambi ozolele vo wavayika mo ekolo e ntangwa yakinu.—Revelation 18:4.

Avo osadidi Yave kumosi ye nkangu andi, okala muna kintwadi kia wan’a ngudi mu nz’amvimba

19. Nkia lusadisu kekuvana o Yave avo obakidi e nzengo za kunsadila?

19 Vava obaka e nzengo za vayika muna nsambil’aluvunu yo sadila Yave, akaka muna yitu yaku yovo akundi nanga ke beyangalala ko. Ke bebakula ko ekuma obakidi e nzengo zazi, balenda nkutu kubangika. Kansi, Yave ke kuyambula ko. Okala muna kintwadi kia wan’angudi kia nz’amvimba ana besonganga o zola kwakieleka kwa muntu yo nkwandi. Okala mpe ye vuvu kia zinga yakwele mvu muna nz’ampa ya Nzambi. (Maku 10:28-30) Kuna sentu, akundi ye yitu yaku ana bekusianga kitantu mu kuma kia nzengo zaku za sadila Yave, nanga balenda longoka o Nkand’a Nzambi.

20. Ekuma tufwete sambidila Nzambi mu mpila yambote?

20 Ke kolo ko, Nzambi ofwasa yimpumbulu yawonso. E Kintinu kiandi kiyala nza yawonso. (2 Petelo 3:9, 13) Eyayi ntangw’a kiese yikala. Wantu awonso besambila Yave mu mpila ina kezolanga.Muna kuma kiaki, diambote wabaka e nzengo owau yo sambila Nzambi mu mpila yambote.