Tala mambu

Tala ntu mia mambu

Mbangi za Yave

Sola ndinga Kikongo

 KAPU KIA 17

E Sambu lau Diampwena

E Sambu lau Diampwena

“Ona wavang’ezulu ye nza” ozolele wá e sambu yeto.—Nkunga 115:15

1, 2. Ekuma obadikilanga e sambu se lukau lwamfunu? Ekuma tufwete zayila dina Nkand’a Nzambi ulonganga mu kuma kia sambu?

O NTOTO wakete kikilu avo ututezaneso yo nsema wawonso. Vava Yave ketalanga ova ntoto, o wantu muna zula yawonso okubamwenanga nze tonsi dia maza muna nkalu. (Nkunga 115:15; Yesaya 40:15) Kana una vo twakete kikilu avo tutezaneso yo nsema wawonso, e sono kia Nkunga 145:18, 19 kivovanga vo: “O Yave ofinamene awonso bekumbokela, ana bekumbokelela kuna ziku. Olunganisa luzolo lu’awana bekumvumina; Owa kazu kiau yo kubavuluza.” Ekwe lau diampwena tuna diau! Yave wa Mpungu-ngolo, ozolele vo twamfinama ye una ye luzolo lwa wá e sambu yeto. Kieleka, e sambu lau diampwena kikilu. I lukau lwamfunu kavana o Yave kwa konso muntu mu yeto.

2 Kansi, Yave owá kaka e sambu yeto avo tusambidi kwa yandi muna mpila ikunyangidikanga. Aweyi tulenda wo vangila? Yambula twabadika dina Nkand’a Nzambi uvovanga mu kuma kia sambu.

EKUMA TUFWETE SAMBILANGA KWA YAVE?

3. Ekuma ofwete sambilanga kwa Yave?

3 Yave ozolele vo wasambanga kwa yandi yovo mokena yandi. Aweyi tuzayidi wo? Tanga Filipi 4:6, 7Yindula e mboka yayi yamfunu. O Mfumu a nsema otokananga mu kuma kiaku. Ozolele vo wanzayisa una omonanga ye mana mekutokanesanga.

4. O samba kwa Yave lumbu yawonso awayi dilenda kumikina kikundi kiaku yo yandi?

4 E sambu kikutusadisanga mu toma finama Yave. Vava  akundi bemokenanga lumbu yawonso mu kuma kia mana beyindulanga, mana mekubatokanesanga ye una bemonanga, e kikundi kiau kikumamanga. I diau mpe divangamanga vava tusambanga kwa Yave. Osadilanga Nkand’a Nzambi mu kusonga e ngindu zandi ye una kemonanga yo kuzayisa mana kevanga kuna sentu. Olenda kunzayisa konso diambu dina muna ntim’aku muna sambanga kwa yandi lumbu yawonso. Avo ovangidi wo, kikundi kiaku yo Yave kikumama.—Yakobo 4:8.

ADIEYI TUFWETE VANGA KIMANA NZAMBI KAWA E SAMBU YETO?

5. Aweyi tuzayidi wo vo Yave ke wanga sambu yawonso ko?

5 Nga Yave owanga e sambu yawonso? Ve. Muna lumbu ya Yesaya wa ngunza, Yave wavovesa Aneyisaele vo: “Ovo nusamba nsamba zayingi, kiwa kwame ko: o moko meno mazele yo menga.” (Yesaya 1:15) Oyeto mpe avo katuyikebele ko, tulenda vanga mambu malenda kutuvambula yo Yave yo kumfila mu lembi wá e sambu yeto.

6. Ekuma o lukwikilu lwinina o mfunu? Aweyi olenda songela vo lukwikilu una lwau?

 6 Avo tuzolele vo Yave kawa e sambu yeto, tufwete kala yo lukwikilu muna yandi. (Maku 11:24) Paulu wa ntumwa wasasila vo: “Kondwa kwa lukwikilu ke dilendakana ko mu yangidika Nzambi una ufwene, kadi konso ona ofinama Nzambi kafwete kwikila vo una, yo kala nsendi a awana bekumvavanga ye ziku kiawonso.” (Ayibere 11:6) Mayingi mevavuanga muna kala yo lukwikilu lwakieleka, ke vova kaka ko vo tuna ye lukwikilu. Tufwete songanga lukwikilu muna lemvokelanga Yave lumbu yawonso.—Tanga Yakobo 2:26.

7. (a) Ekuma tufwete songelanga lulembamu yo luzitu vava tusambanga kwa Yave? (b) Aweyi tulenda songela vo tu akwa ziku vava tusambanga?

7 Tufwete songanga lulembamu yo luzitu vava tusambanga kwa Yave. Ekuma? Avo tuzolele mokena yo ntinu yovo nyadi a nsi, tuvanga wo kuna luzitu lwawonso. Yave i Nzambi wa Mpungu-ngolo. Muna kuma kiaki, tufwete songanga lulembamu yo luzitu vava tumokenanga yandi. (Etuku 17:1; Nkunga 138:6) Tufwete kalanga mpe akwa ziku yo samba kwa Yave ye nsi a ntima ke vutukila kaka mvovo ko.—Matai 6:7, 8.

8. Vava tulombanga diambu muna sambu, adieyi tufwete vanga?

8 Avo tulombele diambu muna sambu, tufwete vanga mawonso tulenda mu vua dina tulombele. Kasikil’owu, avo tusambidi kwa Yave mu kuma kia nsatu zeto za lumbu ke lumbu, ka tufwete zinga moko ko yo vingila vo Yave katuvana lekwa yawonso, kana nkutu vo tuna ye nkuma wa sala mu vua yo. Tufwete salanga ye fululu kiawonso yo tambulwila konso salu tulenda sala. (Matai 6:11; 2 Tesalonika 3:10) Avo tulombele lusadisu kwa Yave kimana twayambula vanga edi diambi, tufwete venga konso diambu  dilenda kutufila mu vanga dio. (Kolosai 3:5) Yambula twafimpa yaka yuvu itoma yuvulwanga mu kuma kia sambu.

YUVU ITOMA YUVULWANGA MU KUMA KIA SAMBU

9. Kwa nani tufwete samba? E sono kia Yoane 14:6, adieyi kikutulonganga mu kuma kia sambu?

9 Kwa nani tufwete samba? Yesu walonga alongoki andi basambanga kwa ‘Se dieto koko zulu.’ (Matai 6:9) Wavova mpe vo: “Mono i nzila ye ludi yo moyo. Ke vena ona okwiza kwa Se ko avo ke mu mono ko.” (Yoane 14:6) Muna kuma kiaki, tufwete sambanga kaka kwa Yave muna nkumbu a Yesu. O samba muna nkumbu a Yesu aweyi disongele? E sambu yeto muna wakana kwa Yave, tufwete zitisanga e kiyekwa kiamfunu kavana kwa Yesu. Nze una twalongokele, Yesu wayiza ova ntoto muna kutuvuluza muna sumu ye lufwa. (Yoane 3:16; Roma 5:12) Yave watumbika mpe Yesu se Ngang’ambuta ye Mfundisi.—Yoane 5:22; Ayibere 6:20.

Olenda samba konso ntangwa

10. Nga vena ye mpila yasikidiswa ina tufwete kala vava tusambanga? Sasila.

10 Nga vena ye mpila yasikidiswa ina tufwete kala vava tusambanga? Ve. Yave ke kutulombanga ko vo twakala twafukama, vuanda yovo telama vava tusambanga. Nkand’a Nzambi ukutulonganga vo tulenda kala konso mpila ina vo yaluzitu vava tusambanga kwa Yave. (1Tusansu 17:16; Nekemiya 8:6; Daniele 6:10; Maku 11:25) Edi disundidi o mfunu kwa Yave ke mpila ina tukalanga ko vava tusambanga, kansi i samba ye kani diasikila. Tulenda samba mu ndinga ya wakana yovo mu nsi a ntima konso fulu twina ye konso ntangwa muna mwini yovo muna fuku. Vava tusambanga kwa Yave tulenda kala ye vuvu vo okutuwa kana nkutu vo wantu ke batuwidi ko.—Nekemiya 2:1-6.

11. Nkia mambu tulenda lomba kwa Yave?

 11 Nkia mambu tulenda lomba muna sambu? Tulenda lomba konso diambu dina ketondanga o Yave. O Nkand’a Nzambi uvovanga vo: “Konso diambu tulombele mun’owu wa luzolo lwandi, okutuwá.” (1 Yoane 5:14) Nga tulenda samba mu kuma kia mambu ma yeto kibeni? Elo. O samba kwa Yave kufwete kala nze yeto tumokenanga yo nkundi ona tutoma zolanga. Tulenda zayisa kwa Yave konso diambu dina muna ngindu ye muna ntima mieto. (Nkunga 62:8) Tulenda samba kwa Yave katuvana o mwand’andi avelela kimana watusadisa mu vanga edi diansongi. (Luk 11:13) Tulenda lomba mpe kwa Yave katuvana ngangu mu baka nzengo zambote yo lomba vo katukumika mu zizidila e mpasi. (Yakobo 1:5) Tufwete lombanga kwa Yave kaloloka masumu meto. (Efeso 1:3, 7) Tufwete sambanga mpe mu kuma kia akaka, kumosi ye yitu yeto ye mpangi zeto muna nkutakani.—Mavangu 12:5; Kolosai 4:12.

12. Nkia diambu difwete sunda o mfunu muna sambu yeto?

12 Nkia diambu difwete sunda o mfunu muna sambu yeto? Yave yo luzolo lwandi. Tufwete vutulanga matondo ye nsi a tima eto yawonso muna mawonso kevanganga o Yave mu kuma kieto. (1Tusansu 29:10-13) Tuzeye wo kadi vava Yesu kakala ova ntoto, walonga alongoki andi e mpila bafwete sambidila. (Tanga Matai 6:9-13.) Wavova vo bafwete lombanga ntete vo e nkumbu a Nzambi yazitiswa, i sia vo, yabadikilwa vo yavauka yovo yavelela. I bosi, Yesu wavova vo twasambanga vo e Kintinu kia Nzambi kiza, o luzolo lwa Yave lwavangama ova nza yawonso. Vava Yesu kamana vova oma masundidi o mfunu, i bosi kayika vo tufwete sambanga mu kuma kia mana tuvuidi o mfunu muna zingu kieto. Vava tusianga Yave yo luzolo  lwandi va fulu kiantete muna sambu yeto, tusonganga edi disundidi o mfunu muna zingu kieto.

13. Ola kwa ifwete zingila e sambu yeto?

13 Ola kwa ifwete zingila e sambu yeto? Nkand’a Nzambi ke usikidisanga ola ko ifwete zingila e sambu. E sambu yeto ilenda kala yankufi yovo yanda mun’owu wa diambu tulombanga. Kasikil’owu, tulenda vanga sambu kiankufi vitila twadia, kansi tulenda vanga sambu kianda vava tuzayisanga kwa Yave mana mekututokanesanga  yovo kumvutula matondo. (1 Samuele 1:12, 15) Ke tuzolele vanga sambu yanda ko mu vava sivikisa akaka, nze una bavanganga akaka muna lumbu ya Yesu. (Luka 20:46, 47) Yave kesivikiswanga kwa sambu ya mpila yayi ko. Edi disundidi o mfunu kwa Yave i samba ye nsi a ntima eto yawonso.

14. Nkumbu nkwa tufwete samba? Ediadi adieyi ditulongele mu kuma kia Yave?

14 Nkumbu nkwa tufwete samba? Yave okutulombanga vo twasambanga kwa yandi ntangwa zawonso. Nkand’a Nzambi uvovanga vo tufwete “kwamanana samba,” ‘kwaminina muna sambu,’ ye ‘samba ntangwa zawonso.’ (Matai 26:41; Roma 12:12; 1 Tesalonika 5:17) Yave wakubama kena mu wá e sambu yeto. Tulenda kumvutula matondo lumbu yawonso mu kuma kia zola yo ntim’andi a mvevo. Tulenda mpe kunlomba luludiku, nkuma ye lufiaulwisu. Avo tuzitisanga kieleka e lau tuna diau dia samba  kwa Yave, tusadila dio konso ntangwa mu mokena yandi.

15. Ekuma tufwete vovelanga “amen” kuna mfoko a sambu?

15 Ekuma tufwete vovelanga “amen” kuna mfoko a sambu? O mvovo “amen” una ye nsasa vo “i wau kikilu” yovo “yambula diakala wowo.” Eyayi i mpila yasongela vo mana tuvovele mu nsi a ntim’eto matukidi. (Nkunga 41:13) Nkand’a Nzambi ukutulonganga vo diambote mpe mu vova vo “amen,” kiakala muna nsi a ntima yovo mu nding’a ngolo, kuna mfoko a sambu kivangilu vana fulu kia ndonga. Vava tuvanganga wo tusonganga vo tutondele mawonso mavovelo.—1 Tusansu 16:36; 1 Korinto 14:16.

AWEYI NZAMBI KEVANINANGA E MVUTU ZA SAMBU YETO?

16. Nga Yave ovananga kieleka e mvutu za sambu yeto? Sasila.

16 Nga Yave ovananga kieleka e mvutu za sambu yeto? Elo. Nkand’a Nzambi uvovanga mu kuma kia Yave vo: “Ongeye owanga sambu.” (Nkunga 65:2) Yave owanga yo vana e mvutu za sambu ya ziku ya ulolo wa wantu. Yave ovananga mvutu za sambu yayi mu mpila zaswaswana.

17. Aweyi Yave kesadilanga mbasi ye selo yandi mu vana e mvutu za sambu yeto?

17 Yave osadilanga mbasi ye selo yandi ova nza mu vana mvutu za sambu yeto. (Ayibere 1:13, 14) Vena ye nona yayingi ya wantu balomba lusadisu kwa Nzambi kimana babakula Nkand’a Nzambi. Ke vavioka kolo ko, bakingulwa kwa Mbangi a Yave. Nkand’a Nzambi usonganga mpe vo ambasi beyikamanga e salu kia samuna e “nsangu zambote” mu nza yawonwo. (Tanga Lusengomono 14:6.) Ndonga mu yeto tusambanga kwa Yave mu kuma kia diambu dimosi diasikididi yovo mu kuma kia nsatu zeto. Yave osadilanga mpangi zeto za Akritu mu kutuvana lusadisu tuvuidi o mfunu.—Ngana 12:25; Yakobo 2:16.

Yave olenda vana e mvutu za sambu yeto muna lusadisu tutambulanga kwa Akristu akaka

18. Aweyi Yave kesadilanga mwand’andi avelela yo Nkand’a Nzambi mu vana mvutu za sambu yeto?

 18 Yave osadilanga mwand’andi avelela mu vana e mvutu za sambu yeto. Vava tukunlombanga lusadisu mu zizidila e mpasi, osadilanga mwand’andi avelela mu kutuvana luludiku yo nkuma. (2 Korinto 4:7) Yave osadilanga mpe Nkand’a Nzambi mu vana mvutu za sambu yeto yo kutusadisa mu baka nzengo zambote. Vava tutanganga Nkand’a Nzambi, tulenda solola sono kilenda kutusadisa. Vava tukalanga muna tukutakanu, Yave olenda sadila mpangi mu vana mvutu yo vova diambu dina tuvuidi o mfunu. Olenda mpe sadila nkuluntu muna nkutakani mu kutuzayisa diambu diamfunu ditukidi muna Nkand’a Nzambi.—Ngalatia 6:1.

19. Ekuma tulenda yindulwila vo Yave ozingilanga mu vana e mvutu za sambu yeto?

19 Ezak’e ntangwa tulenda kukiyuvula: ‘Ekuma Yave kezingilanga mu vana e mvutu za sambu yame?’ Sungamena dio vo, Yave ozeye e ntangwa ye mpila ya vanina e mvutu za sambu yeto. Ozeye dina tuvuidi o mfunu. Tulenda kwamanana samba mu songa vo tuna ye ziku muna dina tulombele kwa Yave yo songa vo tuna kikilu ye lukwikilu muna yandi. (Luka 11:5-10) Ezak’e ntangwa, Yave ovananga e mvutu za sambu yeto mu mpila ina ke tuyindulanga ko. Kasikil’owu, tulenda samba mu kuma kia diambu diampasi ditubwididi, kansi vana fulu kia fokola e mpasi, olenda kutuvana nkuma mu zizidila zo.—Tanga Filipi 4:13.

20. Ekuma tufwete sambilanga kwa Yave?

20 Ekwe lau diampwena tuna diau dia samba kwa Yave! Tulenda kala ye ziku vo okutuwa. (Nkunga 145:18) Ekolo tusambanga kwa Yave ye nsi a ntima eto, e kikundi kieto yo yandi kikumama.